Judith Estrada-Larino

Nakakasa na ang Plan B ng Department of Education.

Ito ayon sa DepEd ay kapag nagkaruon ng aberya ang pagbubukas ng klase sa October 5 bagamat syento porsyento na silang naghahanda para rito.

Sinabi ni Education Undersecretary Diosdado San Antonio na naiintindihan nila ang duda ng ilan sa kahandaan nila sa pagbubukas ng bagong school year.

Hindi naman aniya mape perfect ng DepEd ang pagbubukas ng klase na ilang beses na ring naantala subalit tiwala silang wala nang magiging balakid sa tuluyang pagbubukas nito sa Lunes.

Ipinabatid ni San Antonio na mayruon naman silang contingencies sakaling hindi pa makarating sa ilang lugar ang mga gagamiting modules ng mga mag-aaral.

Binigyang diin ni San Antonio na walang naging aberya sa final dry run ng kanilang broadcast media learning modality maging ang iba pang uri ng pagtuturo ngayong nakakaranas ang bansa ng COVID-19 pandemic.

Ibinabala ni Senate Minority Floorleader Franklin Drilon ang nagbabadyang hunger crisis kapag hindi kumilos ang gobyerno.

Kasunod na rin ito nang pagka bahala ni Drilon sa lumalalang kondisyon ng mga mahihirap na Pilipino kung saan mayruong mahigit 7 milyong pamilyang Pilipino ang natutulog ng walang laman ang sikmura.

Kinuwestyon ni Drilon kung bakit nasikmura ng gobyerno na hindi magsama ng pondo para sa social amelioration program sa ilalim ng panukalang 2021 national budget.

Isinulong ni Drilon na gamitin ang P9 bilyong confidential at intelligence fund ng gobyerno P16.4 billion na anti-insurgency fund at P468 billion na umano’y lump sum para sa sap o pang ayuda sa susunod na taon.

Sa latest survey ng Social Weather Station lumitaw na nadagdagan ang bilang ng mga nagugutom sa bansa dulot ng COVID-19 pandemic kung saan mula sa 5.2 million families nuong Hulyo ay tumaas ito sa 7.6 million families ngayong Setyembre. —ulat mula kay Cely Ortega-Bueno (Patrol 19)

Hindi pinapayagan ang mga ospital na idagdag sa bayarin ng mga pasyente ang mga Personal Protective Equipment (PPE) na donasyon sa kanila.

Nilinaw ito ni Health Undersecretary Maria Rosario Vergeire bagamat nakasaad naman sa Department Order na pinapayagan ang pag-charge sa mga pasyente ng 30% lamang ng halaga ng PPE ng hindi naman galing sa donasyon.

Sinabi ni Vergeire na mayroon silang inventory ng mga donated PPE’S para ma-monitor kung mayroong overpricing.

Ayon pa kay Vergeire  kung ang pasyente ay nasa Intensive Care Unit na maituturing na critical care mas maraming PPE ang magagamit subalit kung nasa ward lang sa lang ang PPE na magagamit pag nag rounds ang doktor.

Kinalampag ng palasyo ang kongreso para sa agarang pagpapasa ng ‎₱4.5 trilyon sa 2021 national budget.

Ito ayon kay Cabinet Secretary Karlo Alexi Nograles ay dahil nakasasalay sa 2021 budget ang response, recovery at rehabilitation program ng gobyerno sa COVID-19.

Sa ngayon ay welcome naman aniya sa Malakanyang ang pagkaka-apruba ng budget sa House Committee on Appropriation.

Sinabi ni Nograles na hindi kakayanin  ng pamahalaan na ma-delay muli ang pondo dahil wala nang magagastos sa mga proyektong susuporta sa pagbangon ng ekonomiya ng bansa.

Binigyang diin pa ni Nograles na nakasasalay din sa 2021 budget ang pag responde sa edukasyon, kalusugan, transportasyon at pang imprastruktura.

Ibinunyag ni Congressman Edgar Erice ang pagpapaikot ng manifesto para manatili sa puwesto si House Speaker Alan Peter Cayetano.

Sa katunayan inamin ni Erice na pumirma na siya sa naturang manifesto subalit itinangging nangako ang kampo ni Cayetano na mabibigyan ng  malaking pondo mula sa 2021 budget ang sinumang kongresistang susuporta sa Taguig Congressman para manatiling Speaker of the House.

Sinabi ni Erice na hindi niya alam kung ilang kongresista na ang lumagda sa naturang manifesto subalit batid niyang may malakas na suporta si Cayetano mula sa minority at majority bloc sa kamara.

Binigyang diin ni Erice na hindi praktikal ngayong panahon ng pandemya na magpalit ng house leadership bukod pa sa nakita naman ng lahat ang leadership skills ni Cayetano.