Judith Estrada-Larino

Tiwala ang gobyerno na makakakuha na ng suplay ng bakuna ang bansa ng mas maaga pa sa naunang inihayag ng AstraZeneca matapos maselyuhan ang kasunduan hinggil sa ibibigay nitong bakuna kontra coronavirus disease 2019 (COVID-19).

Ayon ito kay Dr. Jaime Montoya, executive director ng Department of Science and Technology (DOST) Philippine Council for Health Research and Development, sa gitna na rin nang patuloy na pakikipagnegosasyon ng pamahalaan sa mga manufacturer ng bakuna kontra COVID-19.

Dapat nating isipin na patuloy po ang negosasyon, ang sinasabi lang po ni Secretary Galvez, sa ngayon ‘yung medyo nagkaroon na po ng kumpirmasyon na sila po ay magbibigay ng bakuna ng mga June or July. Pero meron pa pong ibang kinakausap na tayo po ay umaasa na baka mas maaga pa roon ay magkaroon na rin tayo,” ani Montoya.

Kasabay nito, sinabi ni Montoya na mayroon namang budget para sa pagbili ng bakuna at kung kinakailangan pa ay maghahanap ng pondo ang pamahalaan para mabigyan ng bakuna ang lahat ng mga Pilipino. —sa panayam ng Balitang Todong Lakas

Itinanghal na 2020 Word of the Year ng Merriam Webster ang salitang ‘pandemic’.

Ipinabatid ng Merriam Webster ang salitang pandemic bilang most online dictionary lookups ngayong taon.

Ang ‘pandemic’ ay iniuugnay sa kinakaharap na hamon ng mundo hinggil sa coronavirus disease 2019 (COVID-19).

Sa merriam-webster.com, ang pandemic ay may kahulugang outbreak ng isang sakit na nangyari sa isang malaking geographic area tulad ng maraming bansa o kontinente.

Tumaas ang search sa salitang pandemic simula ika-11 ng Marso nang opisyal na ideklara ng World Health Organization (WHO) ang pagkakaroon ng pandemic ng COVID-19.

Mananatili sa Malacañang ang Pangulong Rodrigo Duterte hanggang bago mag-Christmas break.

Ayon sa pangulo, tututukan niya ang tambak na dokumentong kailangan niyang basahin at pirmahan.

Nagbiro pa ang pangulo na wala sanang dumating na bagyo ngayong Pasko dahil tiyak na hahanapin na naman siya ng publiko.

Sinabi ng pangulo na ito na ang pinakamatagal niyang pamamalagi sa Malacañang.

Nangako ang pangulo na tuwing Lunes ay magbibigay siya ng aniya’y ‘Talk to the People’ para malaman ng taumbayan ang ginagawa ng pamahalaan kontra coronavirus disease 2019 (COVID-19).

Magugunitang binatikos ang pangulo dahil sa pananatili sa Davao habang nananalasa ang mga Bagyong Rolly at Quinta, samantala, dumadalo naman ito sa ASEAN Summit sa kasagsagan ng Bagyong Ulysses.

Nakaranas ng malamig na temperature ang mga taga-Metro Manila sa unang araw ng Disyembre.

Ayon sa automated weather station ng PAGASA, alas-5 ng madaling araw na maitala ang 20°C na temperatura sa PAGASA Science Garden sa Quezon City.

Kabilang sa mga nakapagtala rin ng mababang temperatura ang La Trinidad, Benguet sa 12°C; Atok, Benguet sa 14°C, kapwa kaninang alas-5:40 ng madaling araw at Tagaytay City, Cavite sa 18°C —alas-6 kaninang umaga.

Samantala, ilang beses nang nakapagtala ng mababang temperatura sa Baguio City na kaninang alas-5 ng madaling araw ay naitala sa 12°C ang temperatura.

Dumating na sa Catanduanes ang barko ng Philippine Red Cross na mayroong bitbit na relief goods para sa mga apektadong residente rito.

Sakay ng MV PRC Amazing Grace ng Red Cross ang mga dagdag relief tulad ng kitchen sets, sleeping mats at blankets, mosquito nets, GI sheets, hygiene kits, jerry cans, vans at Willy jeep.

Ang nasabing barko ay nakadaong para mamahagi ng humanitarian aid sa buong Bicol Region.

Sakay din ng barko ang dalawang Red Cross vehicle na tutulong sa mabilis na pamamahagi ng relief sa Catanduanes.

MORE HELP HAS ARRIVED.
As MV PRC Amazing Grace reached the shore of Catanduanes and fulfilled its first humanitarian mission – Philippine Red Cross has once again proved its commitment to deliver aid and hope to the most vulnerable, whatever way possible.#RedCrossHelps #RollyPH pic.twitter.com/euYmaE86js

— Philippine Red Cross (@philredcross) November 30, 2020

Tatlo pang kongresista ang sumanib sa Lakas–Christian Muslim Democrats (Lakas–CMD).

Kabilang dito, ayon kay House Majority Floorleader at Lakas–CMD Party President Martin Romualdez sina Cavite Congressman Strike Revilla, Cagayan Congresswomnan Samantha Vargas-Alfonso at Davao Occidental Representative Lorna Bautista-Bandigan.

Dahil dito, sinabi ni Romualdez na umaabot na sa 45 ang bilang ng Lakas–CMD members sa Kamara.

Binigyang diin ni Romualdez na sa pagpapalakas ng partido ay mas mapapaigting ang pakikipagtulungan nila kay House Speaker Lord Allan Velasco para maipasa ang mga legislative agenda ng Pangulong Rodrigo Duterte.

Inararo ng isang bus ang mga barrier sa EDSA Northbound malapit sa bahagi ng Kamuning.

Ayon sa Metropolitan Manila Development Authority (MMDA), ang naaksidenteng Dagupan Bus ay pribadong service ng isang kumpanya kaya’t hindi ito dapat dumaan sa loob ng EDSA Busway.

Nahagip din ng Dagupan Bus ang isa pang pampasaherong bus.

Masyado umanong mabilis ang takbo ng private service na bus habang dumadaan sa busway.

Kaagad namang inalis sa busway ang naaksidenteng bus para hindi makaabala sa biyahe sa EDSA Carousel.

MMDA ALERT: Vehicular accident at EDSA Q.Mart NB involving 2 buses as of 5:55 AM. 1 lane occupied. MMDA assisted. #mmda pic.twitter.com/onH24FjmdF

— Official MMDA (@MMDA) November 29, 2020

Walang bakunang masasabing 100% epektibo sa anumang sakit.

Ayon ito kay Dr. Lulu Bravo, kilalang vaccine trialist, sa gitna na rin nang pagbibida ng mga manufacturers sa potential coronavirus disease 2019 (COVID-19) vaccines sa effectivity nito.

Sinabi ni Bravo na malaking effectivity na ang 95% na claim ng AstraZeneca sa kanilang potential vaccine dahil sa nakamamatay na sakit tulad ng COVID-19 ay uubra na ang 50% effective lamang para sa mga scientist at expert.

Una na ring na publish sa kilalang research journal na the lancet na hindi dapat magpakakampante sa gitna ng mga development sa bakuna at matabang pa anito ang impormasyon ng mga bakunang nag-anunsyo lang ng kanilang efficacy rate sa press releases.

Kasunod na rin ito ng report na pag-amin ng AstraZeneca na nagkamali ito sa pagbibigay ng dose ng bakuna sa kanilang clinical trial participants at wala namang nai-report na adverse effect o hindi magandang epekto sa mga pasyente na hindi sinasadyang mabigyan lang ng kalahating dose ng bakuna.

Hinihintay naman ng Department of Health (DOH) ang opisyal na paliwanag ng AstraZeneca lalo na’t plano nitong mag clinical trial ng bakuna sa bansa.

Pinangunahan ni Manila Mayor Isko Moreno ang pagdiriwang ng ika-157 anibersaryo ng kapanganakan ni Gat Andres Bonifacio.

Ang nasabing aktibidad ay idinaos sa bagong renovate na Kartilya ng Katipunan.

Nag-alay ng bulaklak si Mayor Isko Moreno sa Kartilya ng Katipunan kung saan idinaos din ang isang programa.

Sa bahagi ng Divisoria, inalayan din ng bulaklak ang rebulto ni Bonifacio na itinuturing na Ama ng Himagsikan matapos pamunuan ang Kataas-taasang Kagalang-galangang Katipunan ng mga Anak ng Bayan (KKK) na nanguna sa pag-aaklas laban sa mga Español.

TINGNAN: Manila Mayor @IskoMoreno, pinangunahan ang aktibidad sa Kartilya ng Katipunan bilang paggunita ng ika-157 taong anibersaryo ng kapanganakan ni Andres Bonifacio https://t.co/HHOy7zaafm pic.twitter.com/8kwXhlRAHt

— DWIZ Newscenter (@dwiz882) November 30, 2020