Judith Estrada-Larino

Hindi pa bibitiw si Manila Mayor Isko Moreno sa pagiging ‘ama’ ng lungsod ng Maynila.

Kasunod na rin ito nang pag-amin ni Moreno sa pagtakbong muli bilang alkalde sa 2022.

Sinabi sa DWIZ ni Moreno na kailangang maipagpatuloy ang mga nasimulang programa sa Maynila, bukod sa marami rin aniyang mga sakop ng lungsod ang kailangan nilang mabawi na ang pinakahuli ay Villa De Banco sa Escolta-Sta. Cruz, Area.

Definitely tatakbo po ako,” ani Moreno. —sa panayam ng Santos at Lima sa 882

Tuluy-tuloy ang pagsisikap ng Manila City government na mapababa ang kaso ng coronavirus disease 2019 (COVID-19) sa lungsod.

Ayon kay Manila Mayor Isko Moreno, isang buwan na silang nakakapagtala ng mas mababa sa 500 kaso ng COVID-19 sa lungsod, bagamat patuloy ang pagkilos nila para matiyak ang pagpapatupad ng health protocols lalo na’t wala pa aniyang bakuna kontra sa nasabing virus.

Sinabi pa sa DWIZ ni Moreno na patuloy ang apela nila sa mga taga-Maynila na makiisa sa gobyerno para malabanan ang pagkalat ng COVID-19.

Sa awa ng Diyos, ang Maynila po… isang buwan na po naming na-break ‘yung 500 [cases]. Patuloy naman ang pagbaba nung impeksyon but as we all know, may panganib pa rin. ‘Yung isang impeksyon, delikado; pero ‘yung 300 plus na impeksyon, mas delikado. Kaya ang panawagan ko talaga sa taumbayan, manatili tayo doon sa ginagawa na natin over the past 10 months. ‘Wag na tayong bibitaw, magsuot po tayo ng mask, face shield, wash your hands, and continue practice physical distancing,” ani Moreno. —sa panayam ng Santos at Lima sa 882

Palalakasin ng gobyerno ang checkpoints nito para harangan ang pagkalat ng marijuana sa buong bansa.

Binigyang diin ito ni Department of the Interior and Local Government  (DILG) Secretary Eduardo Año dahil kailangang tapatan ang strategy ng mga grupong sangkot sa operasyon ng illegal drugs na nagagawang ihalo ang kanilang finished products o itinatago ang mga ito sa secret compartment ng sasakyan.

Sinabi ni Año na dapat paigtingin pa ang pagsasanib puwersa ng Philippine National Police (PN) at Armed Forces of the Philippines (AFP) para matigil na ang pagkalat ng marijuana na naging alternatibo na para sa mga drug users na hindi na makabili ng shabu.

Susuyurin aniya nila ang mga kabundukan hindi lamang ang Metro Manila para masira ang mga plantasyon ng marijuana.

Una rito, mahigit P26-milyon na halaga ng marijuana ang nasabat sa Quezon City nitong weekend.

Nagagamit na ng Manila Metro Rail Transit System Line 3 (MRT-3) ang bagong blast booth at painting booth sa depot nito para sa overhauling activity ng mga tren.

Ginagamit ang blasting booth para tanggalin ang pintura ng mga overhauled trains.

Ginagamit naman ang painting booth para sa paglalagay ng panibagong pintura sa mga tren.

Magugunitang nakapag-upgrade na rin ng depot equipment ang MRT-3 tulad ng balancing machine, wheel press machine, re-railing equipment, vertical storage carousel, carbon filter box at pressure washer.

Ang pag-upgrade ng mga equipment at facilities sa depot ay bahagi ng malawakang rehabilitasyon ng linysa sa tulong ng maintenance provider nito na Sumitomo.

MAGANDANG BALITA!

Mga bagong depot facilities, nagagamit na ng MRT-3 pic.twitter.com/960YTzeCgZ

— DOTr MRT-3 (@dotrmrt3) December 2, 2020

Wala pang nabuong pasya ang Metro Manila mayors kung papayagan na ang mga batang makagala sa mga mall.

Sa ginawang virtual meeting ng Metro mayors kagabi, inihayag ng mga ito na hihintayin pa nila ang opinyon ng health experts kung ligtas nga bang makalabas ng bahay ang mga kabataan bago magdesisyon sa usapin.

Una nang inihayag ni Department of the Interior and Local Government (DILG) Secretary Eduardo Año ang pagpayag sa mga kabataan na makalabas na ng kanilang bahay at makapunta sa mga mall basta’t kasama ang kanilang mga magulang, at kailangan ding mag-isyu ng local government units ng mga ordinansa hinggil sa isyung ito.

Nagpakita ng magang resulta ang virgin coconut oil (VCO) sa isinagawang clinical trial bilang food supplement sa coronavirus disease 2019 (COVID-19) patients.

Ayon kay Department of Science and Technology (DOST) Secretary Fortunato Dela Peña, gumaling ang lahat ng mga isinalang sa clinical trial ng VCO sa Sta. Rosa Community Hospital sa Laguna sa loob ng 18 araw, samantalang hindi nakarekober ang mga hindi nabigyan ng VCO —makalipas ang 23 araw.

Bagamat limang araw lamang ang pagitan ng paggaling ng mga isinailalim sa clinical trial ay mahalaga pa ring mas mabilis na gumaling ang nabigyan ng VCO.

Sinabi ni Dela Peña na ang mga isinailalim sa clinical trial ng VCO ay mga suspect at probable cases ng COVID-19.

Bukas inaasahang idedetalye ni Dela Peña ang resulta ng clinical trial ng VCO bilang supplement laban sa COVID-19.

Tuluy-tuloy pa rin naman ang clinical trial na kabilang sa severe at moderate cases ng COVID-19 sa Philippine General Hospital, samantalang pinag-aaralan na rin ang clinical trial sa mga comorbidities.

Sinuspinde ni Baguio City Mayor Benjamin Magalong ang operasyon ng night market sa lungsod na kakabukas lamang kagabi.

Ito, ayon kay Magalong, ay dahil sa kabiguang maipatupad ang crowd control.

Inatasan ni Magalong sina city treasurer Alex Cabarrubias at market superintendent Fernando Ragma, Jr., para kaagad pulungin ang mga vendors at magsagawa ng post night market assessment para pag-aralan ang nangyari sa unang araw ng pagbubukas ng night market.

Pinatutukoy din ni Magalong kung ano ang mga naging problema at pagkukulang sa pagpapatupad ng crowd control.

Nagpasya si Magalong na buksan ang night market sa lungsod ngayong holiday season para na rin makatulong sa ekonomiya at maibalik ang pangkabuhayan ng mga nagtitinda.

Gayunman, sinabi ni Magalong na hindi puwedeng isakripisyo ang kalusugan at kaligtasan ng mga residente kung mababalewala ang pagpapairal ng health protocols laban sa coronavirus disease 2019 (COVID-19).