Judith Estrada-Larino

Ibinunyag ng Pangulong Rodrigo Duterte na ilang pulis sa Zamboanga Del Sur ang nagtatangkang buhayin ang Kuratong Baleleng Gang.

Dahil dito binalaan ng Pangulo ang mga naturang pulis na mag shape up dahil mawawalan ng pag-asang mabuhay  ang mga ito sa gobyerno.

Sinabihan ng Pangulo ang mga nasabing pulis na hindi nila kaya ang gobyerno at kailanman ay hindi magtatagumpay kahit patayin pa nila siya, DILG secretary Eduardo Año, Defense Secretary Delfin Lorenzana o kahit ang republika ng Pilipinas.

Ang Kuratong Baleleng ay binuo noong 1986 para labanan ang komunistang New People’s Army sa Mindanao.

Binuwag ng militar ang nasabing gang noong 1988 subalit ilang miyembro umano ang nag-o-operate bilang organized crime syndicate na sangkot sa illegal activities tulad ng kidnapping, robberies at iba pang krimen.

Posibleng ngayong buwan o sa susunod na buwan simulan ang clinical trials sa bansa ng dalawang potential vaccines para sa coronavirus disease 2019 (COVID-19).

Tinukoy ni vaccine czar Secretary Carlito Galvez, Jr. ang Sinovac ng China at Sputnik V ng Gamaleya Research Institute of Epidemiology and Microbiology ng Russia na nakatakdang magsagawa ng clinical trials sa bansa.

Oktubre nang i-clear ng vaccine expert panel sa ilalim ng DOST ang anti-COVID-19 vaccine na Sinovac para sa clinical trials sa Pilipinas.

Samantala, inihayag ng Gamaleya na 95% na epektibo ang dini-develop nitong Sputnik V vaccine, batay na rin sa ikalawang interim analysis ng clinical trial data.

Ayon kay Galvez, ipinabatid sa kanya ng vaccine experts na ang Sinovac ang pinakaligtas na bakuna kontra COVID-19 dahil wala namang naitalang insidente na nakakamatay sa paggamit nito.

Binigyang diin naman ni Presidential Adviser for Entrepreneurship Joey Concepcion na reliable vaccine ang Sinovac na ginagamit na rin sa China.

Hinikayat ni Congresswoman Juliette Uy ang gobyerno na ikunsidera ang pagpo-produce ng sariling coronavirus disease 2019 (COVID-19) vaccines sa bansa.

Sinabi ni Uy na kung hindi pa handa ang bansa para sa maramihang cold storage facilities ay dapat pag-aralan na ng Department of Trade and Industry (DTI) ang pag-manufacture ng bansa ng mga bakuna.

Maaari aniyang magsagawa ng locally produced na COVID-19 vaccines sa mga industrial estate tulad ng Phividec sa ilalim ng lisensya ng original manufacturers.

Bukod dito, ipinabatid ni Uy na mangangailangan ang bansa ng ligtas na lugar kung saan maaaring iimbak ang mga bakuna at iba pang supply para sa hinaharap.

Maliban sa mga residente ng bansa, isasailalim rin sa pagbabakuna ang mga umuuwing balikbayan at Overseas Filipino Workers (OFWs), foreign tourists, crew ng international airlines, passenger ships. cargo ships, personnel ng mga foreign embassy at international regional headquarters mating ang visiting foreign troops.

Itutuloy ng Presidential Anti-Crime Commission ang imbestigasyon sa ma-anomalyang transaksyon sa paggamit ng pondo kaugnay sa ibinunyag ni Senador Panfilo Lacson na P650-milyon hanggang P15-bilyong infrastructure funds ng ilang distrito sa bansa.

Ayon kay PACC Commisioner Greco Belgica, maging ang pakikipagsabwatan sa Department of Public Works and Highways ng mga kongresista na kukuha ng kickbacks sa infrastructure projects ay sisilipin nila, at kaagad isusumite sa Pangulong Rodrigo Duterte ang resulta ng imbestigasyon.

Sinabi ni Belgica na hihingin nila kay Lacson ang listahan ng infrastructure projects sa distrito ng mga mambabatas at kanilang babantayan kung mayroong korupsyon sa pagpapatupad nito lalo na sa mga big ticket projects na pinaglaanan ng bilyong-pisong government funds.

Trabaho lamang ang gagawin nila at bagamat wala naman silang hurisdiksyon sa mga kongresista, ang anumang makukuha nilang ebidensya at impormasyon ay ipapasa nila sa Ombudsman at Task Force para sa pormal na imbestigasyon sa nasabing usapin.

Bababa ang singil sa tubig ng Maynilad at Manila Water simula sa Enero ng taong 2021.

Nabatid na P0.14 kada cubic meters ang bawas sa singil ng Manila Water habang P0.05 naman kada cubic meter ang tapyas naman sa singil ng Maynilad.

Ang bawas-singil ay dahil sa foreign currency differential adjustment kasunod na rin nang bahagyang paglakas ng palitan ng piso kontra sa US dollar at Yen.

Nag-isyu na ang Catholic Bishops Conference of the Philippines (CBCP) ng guidelines na susundin sa pagdaraos ng simbang gabi o Misa de Gallo.

Sa circular ng CBCP, magpapatupad ng physical distancing, pagsusuot ng face masks at face shields sa mga idaraos na simbang gabi na tradisyunal na nagsisimula sa ika-16 ng Disyembre at tatagal hanggang ika-25 ng Disyembre.

Ipinabatid ng CBCP na batay sa konsultasyon sa mga obispo at mga pari, dadagdagan ang schedule ng mga misa para mas marami ang makapagsimba lalo’t iilan lamang ang maaaring makapasok sa mga simbahan.

Hinimok din ng CBCP na ituloy ang pagsasagawa g live streaming ng mga misa para maaaring makadalo online ang mga hindi makakapunta ng personal sa simbahan.

Ayon kay CBCP President Davao Archbishop Romulo Valles, ang dawn mss para sa Pasko ay pupuwede ring gawin ng umaga ng ika-25 ng Disyembre.

Dahil kailangang mahigpit na pairalin ang social distancing at bawal ang paghalik at paghawak, hindi isasagawa ang tradisyunal na paghalik sa imahe ng sanggol na si Hesus.

Sa halip sinabi ni Valles na ang mga magsisimba ay hinikayat na magdala ng sariling imahe nila ng Infant Jesus sa Christmas masses.