Judith Estrada-Larino

Inilarga na ngayong araw na ito ang bagong oras ng curfew sa Caloocan City.

Nakasaad sa kautusan ni Caloocan City Mayor Oscar Malapitan na alas-12 ng hatinggabi hanggang alas-3  ng madaling araw ang bagong curfew hours sa lungsod para bigyang daan ang pagsisimula nang tradisyunal na simbang gabi.

Mahigpit naman ang bilin ni malapitan sa mga simbahan at mga dadalo sa simbang gabi na sundin ang ATF guidelines gayundin ang health and safety protocols para makaiwas sa COVID- 19.

Patuloy din ang paalala ni Malapitan na bawal pa ring lumabas ang mga may edad 17 pababa at 65 taong gulang pataas na hindi kabilang sa essential work force.

Tiniyak ni Laguna Governor Ramil Fernandez ang hustisya sa pamilya nang pinaslang na Los Baños Mayor Cesar Perez.

Sinabi ni Fernandez na pinakilos na niya ang mga otoridad para masusing imbestigahan ang nasabing krimen.

Nagpaabot na rin ng pakikiramay si Fernandez sa pamilya at kaanak ni Perez at maging sa mga  mamamayan ng Los Baños

Magugunitang si Perez ay 2 binaril sa likod ng mga hindi pa nakilalang suspek na biglang sumulpot sa kung saang direksyon sa waiting area ng multi purpose hall ng munisipyo ng Los Baños kagabi.

Isa si Perez na pinangalanan ng Pangulong Rodrigo Duterte na dawit sa iligal na droga.

Sa social media na nag-rant si Valenzuela City Mayor Rex Gatchalian kaugnay sa aniya’y problema sa RFID sensors sa North Luzon Expressway (NLEX).

Sinabi ni Gatchalian na matinding trapiko ang nararanasan sa NLEX dahil sa palpak na sensors ng RFID.

Nainis pa si Gatchalian kay NLEX Chief Operating Officer Raul Ignacio nang sabihing wala namang problema sa RFID sa NLEX at tanging ang Alkalde lamang ang nagrereklamo.

Ayon kay Gatchalian maaaring si Ignacio na lamang ang hindi nakakakita na malaki na ang problema na ilang taon na ring hindi inaayos ng pamunuan ng NLEX.

Lalo pa aniyang tumindi ang problema ngayong ipinatutupad na ang cashless transactions.

Ipinag-utos ng IATF sa lahat ng establishment na i-adopt ang stay safe application at QR code nito para ma-consolidate o mapag-isa ang data sa kung sino ang mga nakasalamuha ng mga COVID-19 patients.

Ito ayon kay Presidential Spokesman Harry Roque ay kasunod na rin nang pag-apruba ng IATF sa rekomendasyon ng Office of the Cabinet Secretariat na magpatupad ng safety seal certification program bukod pa sa stay safe DOTph.

Sinabi ni Roque na dapat mai-paskil sa lahat ng entrance ng establishments tulad ng government offices, private companies, hotels at business establishments at public transportation units ang stay safety application at QR code nito.

Ayon kay testing Czar Vince Dizon ang stay safe app na libreng mada-download at hindi kailangang magkaroon ng load para gumana ay magagamit ng users kung saan kukunan lamang ng litrato ang QR codes sa mga mall, banks, restaurants, trains at buses sa halip na manual na magsulat sa mga contact tracing sheets.

Ipinagpaliban ng MMDA ang pagsasara ng U- turn slot sa EDSA na malapit sa General Malvar/Bagong Barrio na dapat ay isasara sa Lunes, Disyembre 7.

Sa halip ayon sa MMDA sa Enero 4, 2021 na lamang itutuloy ang pagsasara ng nasabing  U-turn.

Binigyang diin ng MMDA  na layon ng pagsasara ng mga  U-turn sa EDSA na mapabilis ang biyahe sa EDSA busway.

Patuloy na bumubuti ang serbisyo ng internet sa bansa.

Batay ito sa November 2020 report ng Ookla, ang global leader sa mobile and broadband network intelligence, testing applications at technology.

Para sa fixed broadband latest report, nakasaad na sa average download speed na 28.69Mbps, umaabot sa 262.71% ang increase mula sa dating download speed na 7.91Mbps nitong July 2016.

Samantala, ang overall mobile network performance ay nagbunga ng average download speed na 18.4Mbps na may pagtaas ng 148.52% mula sa speed na 7.44Mbps noong July 2016.

Ang consistent increase sa internet speed ay nangyari sa kasagsagan ng coronavirus disease 2019 (COVID-19) pandemic related lockdowns at naghudyat ng infrastructure roll out at maintenance ng cell sites sa iba’t ibang lugar sa bansa simula March 2020.

Nangyari ang pagbuti ng internet speed habang ang bansa ay bumabangon sa pinsalang dulot ng mga Bagyong Ambo, Quinta, Rolly at Ulysses.

Ang improvement ay dumating sa tamang panahon habang ang telco services ay sinisikap na makamtan ang 500% increase sa demand ng internet services dahil sa pagtaas ng work, education at entertainment related usage dahil sa pag-iral ng community quarantine guidelines.

Una nang inobliga ng Pangulong Rodrigo Duterte ang telco na paghusayin ang kanilang serbisyo hanggang sa katapusan ng taong ito.

Inaasahang lalo pang mapaghuhusay ang internet speed sa bansa sa collaboration ng Department of the Interior and Local Government (DILG) sa local government units para sa pagpapabilis ng pagkuha ng permits sa pagpapatayo ng cellular towers.

Ayon kay DILG secretary Eduardo Año, naaprubahan na ang mahigit 2,200 applications for permits ng telco firms para makapagpatayo ng cell towers upang mapabilis ang konstruksyon ng cell sites para sa mas maayos na connectivity services hanggang sa katapusan ng taon.

Samantala, pinalalakas na ni Department of Information and Communications Technology (DICT) Secretary Gregorio Honasan ang free Wi-Fi sa lahat ng proyekto sa buong bansa para mapaunlad ang online class learning experience ng mga guro at estudyante sa remote areas.

Lumobo pa ang bilang ng mga pasyenteng may leptospirosis sa National Kidney and Transplant Institute (NKTI).

Dahil sa dami ng pasyente, maging ang gym ng ospital ay na-convert na rin bilang ward para sa mga leptospirosis patients na ngayon ay nasa 30 hanggang 40

Sa mga nasabing pasyente ng leptospirosis, sinabi ni NKTI Executive Director Rose Marie Liquete na siyam ang nagpositibo sa coronavirus disease 2019 (COVID-19) na kaagad naman aniya nilang dinala sa COVID-19 designated wards para maiwasan ang paghahawaan.