Judith Estrada-Larino

Lusot na sa Bicameral Conference Committee meeting ang panukalang Corporate Recovery and Tax Incentives for Enterprises Bill (CREATE) .

Ayon kay House Ways and Means Committee Chair Joey Salceda, lagda na lamang ang kailangan para tuluyan nang ma ratipikahan ng Kamara at Senado bukas, Lunes o sa Martes ang CREATE bill para maipadala na sa Malakanyang at mapirmahan na ng Pangulong Rodrigo Duterte para maging ganap na batas.

Ipinabatid ni Salceda na aabot sa $18 billion dollars para sa foreign direct investments ang nawala sa bansa sa nakalipas na tatlong taon matapos maantala ang pagpasa sa nasabing panukala.

Nakasaad sa CREATE bill ang pagpapababa sa corporate income tax sa 25% mula sa 30% para sa large corporation at 20% naman para sa small and medium corporations na mayruong net taxable income na mababa sa P5 million  at total assets na mas mababa sa P100 million.

Magkakaruon din ng hanggang 17 taong incentives para sa exporters habang apat hanggang pitong taon naman na income tax holiday at 10 taong special corporate income tax holiday para sa critical domestic enterprises.

Nagpositibo sa COVID-19 ang 34 mula sa halos 3,000 indibidwal na isinalang sa COVID-19  test sa ikalawang mass testing sa Kamara.

Ayon kay House Secretary General Mark Llandro Mendoza ang naitalang mga bagong kaso ng COVID-19 sa Kamara ay katumbas ng positivity rate na 1.19% na mas mababa sa 5% positivity rate sa unang mass testing.

Sinabi pa ni Mendoza, na halos lahat ng mga bagong kaso ng COVID-19 sa Kamara ay asymptomatic at naka-isolate na habang isinasagawa na ang pagtukoy sa close contacts ng mga ito.

Gumaling na aniya lahat ang halos 100 empleyado sa Mababang Kapulungan na una nang nagpositibo sa COVID-19 sa unang bugso ng mass testing.

Binigyang diin ni Mendoza, ang epektibong pagpapatupad ng COVID-19 management program ng Kamara kayat bumaba ang kaso ng virus dito.

Pansamantala munang isasara simula bukas, pebrero a uno ang J. Fajardo bridge sa Sampaloc, Maynila.

Isasara muna ng DPWH ang nasabing tulay sa loob ng pitong buwan para sa kaukulang repair at reconstruction nito.

Isa isa nang dinala sa lugar ang mga construction equipment na umukupa na sa isang lane ng nasabing tulay.

Dahil dito pinayuhan ang mga motorista na gumamit ng alternatibong ruta kung saan ang mga patungong R. Magsaysay Blvd. ay pupuwedeng dumaan sa Vicente Cruz at D. Tuiazon at España Blvd. naman sa mga tutungo ng A.H Lacson Avenue.

Dumating na ang tatlong bagong multi role police helicopters para magamit sa pinaigting na law enforcement at public safety operations.

Ayon kay PNP Chief Debold Sinas tinanggap ng PNP Special Action Force – Air Unit ang tatlong bagong H125 airbus single engine turbine helicopters mula sa airbus helicopters Southeast Asia.

Sinabi ni Sinas na gagamitin ang mga nasabing helicopters sa pagpapalakas ng kakayanan ng pulisya sa kampanya laban sa insurgency at terorismo.

Dahil dito ipinabatid ni sinas na mayruon nang pitong H-125 airubs, dalawang R-22 Robinsons Police helicopters at fixed wing aircrop na naka-station sa Metro Manila ng PNP fleet.

Target ng PNP na makapag-deploy ng tig-dalawang helicopter sa Central Visayas at Mindanao at isa sa Northern Luzon habang naghahanda sa pagbili ng air ambulance bilang bahagi ng modernisasyon.