Judith Estrada-Larino

Pantay-pantay ang makukuha ng kuwalipikadong beneficiary sa implementasyon ng Extended Electricity Lifeline Rates Subsidy.

Tiniyak ito ni Energy Assistant Secretary Mario Marasigan kaugnay sa nilagdaang Implementing Rules and Regulations (IRR) ng Republic Act 11552.

Ayon kay Marasigan, ang IRR ay nagbibigay daan sa mga nasa marginalized sector na patuloy na makatanggap ng government subsidies sa singil sa kuryente sa loob ng 30 taon pagkatapos ng unang 20 years sa orihinal na republic act.

Bukod sa DOE, kabilang sa mga lumagda sa IRR ang Energy Regulatory Commission at DSWD.

Puspusan ang pagtulong ng gobyerno sa mga nasa sektor ng pangingisda partikular sa problema ng mga mangingisda.

Binigyang diin ito ng NEDA kasunod nang ikinakasang Philippine Fisheries and Coastal Resilience Project (FishCoRe) na inaasahang pakikinabangan ng halos 400,000 rehistrado at itinuturing na poorest of the poor na mga mangingisda.

Bukod dito, tiniyak ng NEDA na mahigit 26,000 trabaho ang lilikhain ng programa na magpapataas din ng aquaculture production at imbak na isda.

Sa inaprubahang P11.2-B na pondo para sa FishCoRe Project, P9.6-M ay huhugutin sa Official Development Assistance (ODA) ng World Bank, P660. 6-M ay mula mismo sa gobyerno sa pamamagitan ng BFAR at magmumula naman sa pribadong sektor ang natitirang P1.16-B.

Tuluy-tuloy ang pagkilos ng MMDA para maayos ang trapiko lalo na ngayong Christmas holiday kung kailan inaasahan ang dagdag na 20% nang pagdami ng sasakyan sa mga kalsada partikular sa EDSA.

Ipinabatid sa DWIZ ni Col. Bong Nebrija, hepe ng MMDA Special Operations Task Force na kalagitnaan pa lamang ng Nobyembre ay ikinasa na nila ang adjusted malls hours, late night delivery ng malls, suspensyon ng mga road works and repairs at pagpapalawig ng schedule ng kanilang mga tauhan.

Pinaaayos rin aniya ni MMDA Chairman Romando Artes ang mga open diggings hanggang December 1 para hindi na makadagdag pa sa bigat ng trapiko.

Whole of nation approach ang ikakasa ng gobyerno sa paglulunsad ng bagong Anti -Drug War.

Ipinabatid ito sa DWIZ ni DILG Secretary Benhur Abalos matapos ilunsad ang Buhay ay Ingatan, Droga ay Iwasan (BIDA) Campaign.

Habang yung puno may branches ‘yan, may sanga miski putulin mo ng putulin ‘yan hindi malayong baka lang, may tumubong iba na naman kailangan ugatin mo.

 

Yung puno ay parang problema ng droga, habang tinatanggal natin ang sanga at may tumutubong hinuhuli pa inuugat naman natin ang problema at andiyan lahat ng ahensiya ng gobyerno ang DOLE tutulong andiyan ang DTI, DOH, DSWD at iba pa para naman to make sure on the ground hanggang barangay level… in short its a whole nation approach…”

Ipinagmalaki ni Abalos ang mga malalaking isdang natimbog ng mga otoridad sa Anti Drug Campaign sa nakalipas na apat na buwan kaya’t dapat itong palakasin pa.

Nagpadala na ang bansa ng note verbale sa China matapos ang komprontasyon sa pagitan ng pwersa ng Pinoy at Chinese soldiers malapit sa Pag -asa Island.

Ipinabatid ito ni Foreign Affairs Secretary Enrique Manalo para aniya malinawan ang insidente.

Binigyang diin ni Manalo ang paninindigan ng Pilipinas hinggil sa nasabing pangyayari.

Sinabi ni Manalo na naka depende sa magiging sagot ng China ang susunod na hakbang ng Pilipinas kaugnay sa sitwasyon.

Nagtagumpay ang ilang Pilipino na makapasok sa pulitika sa Amerika matapos ang idinaos na midterm elections ngayong buwan.

Ayon kay Brendan Flores, Pangulo at National Chairperson ng National Federation of Filipino American Associations (NAFFAA), itinuturing nilang pinakamalaking achievement sa November elections ang mas marami pang Pilipinong nagwagi sa pagtakbo sa public office.

Binigyang diin ni Flores na ang panibagong tagumpay ng mga Pilipino ay magsisilbing inspirasyon sa mga Pinoy Americans at iba pang minority community para magsalita, makiisa at makinig.

Excited na aniya silang makita ang pag-unlad ng mga komunidad dahil sa pangangasiwa ng mga Fil Ams na nagbibigay ng kakaibang uri ng liderato na hinugot mula sa kanilang malalim na pagmamahal sa kanilang mga pamilya at mga komunidad.

Si Steven Raga ang kauna-unahang Fil Am sa New York State Legislature samantalang si Maria Cervania ay ngayo’y unang Pinoy American na miyembro ng North Carolina Legislature matapos manalo sa eleksyon para katawanin ang District 41.

Ilan pa sa mga Fil Am na wagi sa eleksyon sina Justin Jones bilang kinatawan sa District 52 sa Tennessee, Luz Bay sa New Hampshire House of Representatives bilang kinatawan ng Straford County District 21, Genevieve Mina sa Alaska House of Representatives para sa District 19.

Pasok din sina Erica Mosca na State Assembly Member para sa District 14 sa Nevada, Rosebella Martinez sa State House of Representatives para sa District 40 sa Ewa, Hawaii ; Brandon Elefante at Henry Aquino ay mga nabotong senador sa Hawaii State Senate.

Sa California, re-elected si Rob Bonta bilang Attorney General para sa estado ng California kung saan mahigit kalahating milyong Pilipino ang nakatira samantalang nananatiling highest ranking Fil Am na elected official si Bobby Scott na nanalo sa Third Congressional District sa Virgnia.

Si Kenneth Mejia ng Los Angeles ay naluklok bilang first Pinoy American City Controller sa Burbank City.

Duda si PAO Chief Atty. Percida Rueda-Acosta na mababayaran ng Pulis Caloocan ang P2-M danyos na ipinataw ng korte matapos mapatunayang guilty sa pag torture at pagpatay sa dalawang teenagers.

Si PO1 Jefrey Perez ay hinatulang guilty ng dalawang hiwalay na bilang nang pag torture kina Carl Angelo Arnaiz at Reynaldo Kulot De Guzman at pagtatanim ng sachet ng marijuana, shabu at revolver para palabasing umalma sa pag aresto si Arnaiz.

Sinabi ni Acosta na hindi mababayaran ni Perez ang danyos dahil wala itong trabaho subalit natutuwa na rin ang mga pamilya sa naging hatol ng korte sa kaso.

Dapat aniyang magsilbing babala sa mga pulis at iba pang otoridad ang nasabing kaso laban sa paggamit ng sobrang puwersa sa mga sibilyan.

Bukod sa habambuhay na pagkabilanggo, si perez ay pinagbabayad din ng P2-M sa kada pamilya nina Arnaiz at De Guzman bukod pa sa kumpensasyong dapat makuha ng mga biktima sa ilalim ng batas na nagtatag sa Board of Claims para sa mga biktima ng Unjust Imprisonment o Detention at maging violent crimes.