Dapat masusing piliin ng publiko ang mga bibilhing panghanda sa noche buena.
Payo ito ni DTI Undersecretary Ruth Castelo na nagsabing simple, mura at mabigat lamang na pang noche buena ang ihanda.
Sinabi ni Castelo na mayruong food items na mabigat subalit mura kaya’t dapat maging mapili ang mga mamamayan upang makatipid ngayong holiday season.
Magugunitang inilabas na ng DTI ang price list ng mga noche buena items na karamihan ay nagtaas ng presyo.
Iginiit ni Vice President at Education Secretary Sara Duterte ang pagbabasa ng mga kabataan ng pisikal na libro.
Binigyang halaga ni Duterte sa National Annual Congress ng Philippine Librarians Association ang pagbabasa ng libro sa kabila ng laganap na makabagong teknolohiya.
Pinuri rin ni Duterte ang mga librarian na aniya’y mayruon ding malaking papel sa paghuhubog ng tamang kaalaman ng mga bata.
Kasabay nito, umapela ng tulong ang pangalawang pangulo sa mga negosyante para makapagpatayo ng library o silid aklatan sa bawat bayan sa bansa partikular sa mga liblib na lugar.
Nakikiisa si DILG Secretary Benhur Abalos, Jr. sa pagkilala ng Pangulong Ferdinand Marcos sa 10 Local Government Unit Awardees sa 2022 Galing Pook Awards bilang huwaran ng good governance at innovation.
Binigyang diin ni Abalos na natutuwa siya sa epektibong liderato ng mga naturang LGU sa pamamagitan ng mga binubuong programa at solusyon sa mga problema.
Sinabi ni Abalos, Chairperson ng Board of Judges, na dapat maipagpatuloy ang isinusulong ng mga nasabing LGU na innovation para sa pinaigting na public service na dapat magsilbing inspirasyon sa iba pang LGU.
Isa aniya itong malaking tagumpay sa pagkilala sa kahusayan sa paglilingkod bayan.
Kabilang sa mga pinarangalang LGU sa 2022 Gawad Pook Award ang Libertad Fish Forever Savings Club ng Libertad, Antique; Advancing and Sustaining Good Governance and Community Actions Towards Resiliency and Empowerment mula sa Basilan Provincial Government; I-Bike: A Program Promoting the Development of the Iloilo City Bike Culture ng lungsod; Yaru: A Whole Community Approach Towards Disaster Management mula sa Itbayat, Batanes.
Pasok din sa nasabing parangal ang mga programa ng lalawigan ng Bataan; Tanay, Rizal; Alcala, Cagayan; Goa, Camarines Sur; Biñan, Laguna; at Piddig, Ilocos Norte.
Halos 200 LGUs ang nagsumite ng kanilang application para sa naturang parangal na ang tema ay: Padayon Para Sa Ligtas, Matalino at Matatag na Pamayanan.
Tuloy na ang pulong ng United Nations Security Council at ni Ukrainian President Volodymyr Zelensky.
Kaugnay ito sa apela ni Zelensky sa UN na tutukan nito ang patuloy na pagpapakawala ng missile ng Russia sa ilang kabahayan sa Kyiv kung saan 10 katao na ang nasawi.
Iginiit ni Zelensky na patuloy ang isinasagawang terorismo ng Russia na idinadamay maging ang mga sibilyan.
Bukod sa mga nasawi, nagdulot din nang pagkawala ng power supply ang nasabing pagpapaulan ng missile.
Posibleng sumirit pa ang presyo ng kada kilo ng asukal.
Ayon ito mismo sa mga nagtitinda ng asukal , batay na rin sa abiso ng kanilang suppliers.
Nasa P105 kada kilo ang presyo ng refined o white sugar samantalang P85 naman ang brown at washed sugar sa maraming pamilihan partikular sa Quezon City.
Samantala, tuluy-tuloy naman ang bentahan ng murang asukal sa tanggapan ng Sugar Regulatory Administration sa QC.
Gayunman, limitado lamang sa limang kilo o P70 kada kilo ang uubrang bilhin ng bawat isang tao.
Matagumpay na idinaos ang 44th Catholic Mass Media Award (CMMA) ngayong taon.
Kasunod na rin ito ng dalawang magkasunod na taong hindi naisagawa ng face to face ang naturang paggagawad ng parangal sa mga natatanging programa , palabas o artikulo sa dyaryo , radyo, telebisyon at digital media.
Sa kanyang mensahe, ipinaabot ni CMMA Acting Chairman at ALC Group Chairman D. Edgard Cabangon.
Ang pagbati sa iba’t ibang media organization na nakatanggap ng parangal sa pagkakaroon nito ng tapang at dedikasyon sa paghahatid ng mga impormasyon sa publiko.
Binigyang pagkilala rin ni Cabangon ang paggamit ng mga talento ng broadcast communicators sa pagbuo ng malilikhain at worthy media broadcast na nagpapakita ng kaugalian at pananampalataya ng isang kristiyano.
Habang kabilang sa mga binigyang diin naman ni Manila Archbishop Jose Cardinal Advincula ang tema ng CMMA ngayong taon na umikot sa temang “Communicating by Encountering People Where and as They Are”.
Kabilang na sa mga parangal ay ang Student CMMA Awards para sa mga natatanging gawa o produksyon ng mga mag-aaral.
Kabilang na rito ang Best Student Organ, Best Student Public Service Print Ad, Best Student Public Service Radio Ad, Best Student Public Service TV Ad, Best TV Production at Best Short Film gayundin ang Best Website para sa kategorya ng internet awards.
Bahagi rin ng CMMA ang Advertising Awards gaya ng Best Digital at TV Award samantalang naigawad na rin sa iba’t ibang pahayagan ang Best Special Feature, Editorial Cartoon, Comic Story, News Photograph at Opinion Column sa kategorya naman ng Print Awards.
Habang naigawad na rin ang CMMA Award sa mga natatanging programa sa radio kabilang na rito ang Best Counseling Program, News Commentary, News Feature, Best Public Service Program, Best Entertainment Program at Best Educational Program. —sa ulat ni Tina Nolasco (Patrol 11)
Muling magkakasa ang Department of Health ng panibagong round ng national vaccination days para mas marami pa ang mahimok na magpa-bakuna kontra COVID 19.
Ayon kay health OIC Maria Rosario Vergeire, makatutulong ang tatlong araw na bakunahan sa buong bansa para maging mas madaling ma-access ang COVID 19 jabs.
Ipinabatid ni Vergeire na ang ibinibigay ng gobyerno ay pangunahing bakuna sa lahat ng indibidwal na limang taong gulang pataas, mga unang booster sa lahat ng 12 taong gulang pataas at second booster para sa senior citizens, healthcare workers, with commorbidities at immunocompromised.
Kasabay nito, tiniyak muli ni Vergeire ang pagsusulong ng pagpasa sa panukalang Center for Disease Control Law para sa tuluy-tuloy na pagtugon kontra COVID 19 kahit pa matapos ang deklarasyon ng National State of Calamity sa December 31.
Puspusan ang paghahanda ng Department of Education sa pagpapatupad ng learning recovery program nito.
Kasunod na rin ito nang isinagawang 2022 national planning conference na may temang learning recovery, resiliency and unity.
Naka-sentro ang conference sa pagpapabatid sa mga field office nang pagkakasa ng BEDP 2030 o basic education development plan na kinabibilangan ng mga makabagong tugon at mga hakbangin mula sa lahat ng strand at unit ng DepEd para makatugon sa education needs sa sektor ng basic education .
Hinimok ni Vice President at education secretary Sara Duterte ang publiko na suportahan ang gobyerno para mapabuti ang kalidad ng edukasyon ng bansa sa pamamagitan ng evidence in planning, research programming at policy development.
Bumida ang mga katutubong sayaw ng Pilipinas sa idinaos na IECP 2022 international ethnic cultural performances sa Hong Kong
Kinatawan ni vice consul Jose Angelo D.G Manuel ang Pilipinas sa pagbubukas ng nasabing taunang event na inorganisa ng Hong Kong leisure and cultural services department kasabay nang ika-25 anibersaryo ng pagbuo sa Hong Kong special administrative region.
Ipinabatid ng Philippine Consulate General Hong Kong na dalawang organisasyon ng mga Pilipino ang nagtanghal ng mga katutubong sayaw sa IECP 2022 tulad ng tinikling group of migrants na sumayaw ng sakuting habang ang migrant Ilonggo Association International ay nagtanghal ng sayaw sa Cuyo.
Nakiisa sa special event na may temang The Art of Masks ang mahigit 20 bansa na nagpakita ng kani-kanilang natatanging artistry at mayamang kultura sa pamamagitan ng activity booths, cultural mask displays at stage performances.
Himas rehas sa susunod na 17 at kalahating taon sa California State Prison, ang dating Fil Am actor at decathlete na si David Bunevacz dahil sa kasong wire fraud at securities fraud.
Bukod dito, si Bunevacz ay pinagbabayad ni US district judge Dale Fischer ng mahigit 35 million dollars bilang restitution matapos i-scam ang mahigit 100 investor sa kanyang mga kumpanya.
Batay sa court documents, ang 53-anyos na si Bunevacz ay nakalikom ng mahigit 45 million dollars mula sa kanyang investors sa kanyang mga kumpanya tulad ng CB Holdings Group Corporation at Caesarbrutus LLC kung saan nagbebenta ang investors ng vape pens na may cannabis products tulad ng CBD oil at THC.
Sinasabing ginamit ni Bunevacz ang malaking porsyento ng nasabing halaga para suportahan ang magarbong pamumuhay tulad nang pagbili ng luxurious na bahay sa Calabasas, California, mamahaling bags, kabayo, pag-biyahe sa Las Vegas at maging paggastos sa maluhong party ng kanyang anak.
Ayon kay Fischer, hindi itinigil ni Bunevacz ang kanyang scheme kahit pa under probation para sa state court conviction.
Ang dating Fil Am actor ay naaresto nuong April 5 at nakipag kasundo sa Korte noong July 2022 matapos maghain ng guilty plea sa tig-isang count ng securities at wire fraud na kapwa may statutory maximum penalty ng 20 taong pagkakakulong.
Tila nakuha umano ni Bunevacz sa matatamis niyang salita ang mga investor tulad nang pagmamalaki sa Chinese manufacturer ng disposable vape pens at may nakukuha rin siyang raw pesticide free oil na pinadala sa isang laboratory na siyang naglagay ng flowers.