Judith Estrada-Larino

Tinutukan ng Pilipinas at European Union (EU) ang pagpapalakas ng kanilang ugnayan para mapigilan ang mga epekto ng climate crisis at mapalakas ang peace building efforts sa Mindanao.

Ito ang mga lumabas na mga pangunahing concerns sa pulong nina Finance Secretary Carlos Dominguez III at European Union Ambassador Luc Veron hinggil sa susunod na Multi Annual Indicative (MIP) program ng EU para sa 2021 hanggang 2027.

Ayon sa sugo ng EU sa Pilipinas priority ng M.I.P na masuportahan ang mga programa tungo sa malakas at matatag na ekonomiya ng bansa sa gitna na rin nang pagtala kay Dominguez bilang Chairman ng Climate Change Commission para isulong ang pagbabawal sa paggamit ng single use plastics bilang climate crisis mitigation measure.

Nakaayon din ang priority programs ng M.I.P sa layunin ni Dominguez bilang co-chair ng  Inter Governmental Relations Body (IGRB) na nakikipag ugnayan sa Bangsamoro government sa Muslim Mindanao para sa matagumpay at gumaganang otonomiya sa rehiyon.

Pinangunahan na ng  Philippine Statistics Authority (PSA) ang mga establisyemento na mahaharap sa parusa kung hindi tatanggapin ang Philippine Identification o National ID sa mga transaksyon.

Ito ayon sa PSA ay dahil uubra namang gamitin ang National ID sa mga transaksyon tulad nang pagbubukas ng bank account, money transfer, pag-a-apply sa trabaho at iba pa na nangangailangan ng personal na impormasyon o identification.

Binigyang diin ng psa na sa ilalim ng Philippine Identification System (PhilSys) Act maaaring managot ang mga establishment na hindi kikilala sa national ID bilang valid ID.

Ipinabatid ng psa na hanggang nitong May 19 lampas isang milyon na ang nagpa rehistro na para makakuha ng nasabing ID samantalang mahigit 103K IDs na ang hawak ng Philippine Postal Office na siyang magde-deliver ng mga ito sa publiko.

 Pumapalo na sa kabuuang 1, 184, 706 ang kumpirmadong kaso ng COVID-19 sa bansa kasama na ang 4,973 na mga bagong kaso ng virus.

Dahil dito, ipinabatid ng DOH na nasa 48, 917 ang active cases kung saan 92. 9%  ang mild, 2% ang asymptomatic, 2.1% ang severe at 1.6 % ang critical condition.

Umakyat pa sa 1,115,806 ang total recoveries matapos maitala sa 6, 666 ang mga bagong gumaling sa COVID-19.

Sumirit din sa 19,983 ang death toll nang maitala ang 39 na mga bagong nasawi sa virus.

May posibilidad na hindi na ituloy ng Pangulong Rodrigo Duterte ang plano nitong ipatawag ang mga dating Pangulo upang talakayin ang isyu ng West Philippine Sea (WPS).

Sinabi ni Presidential Spokesman Harry Roque na sa pagkaka-intindi niya sa naging pahayag ng Pangulo na hindi na nito papansinin ang kanyang mga kritiko hindi na nito pagtutuunan ng pansin ang mga banat sa kanya hinggil sa usapin ng WPS.

Sapat na aniya para sa Pangulo ang opinyon ni dating Senate President Juan Ponce Enrile na mayruong malawak na kaalaman sa mga pinag a agawang teritoryo sa WPS.

Ayon kay Roque, tiwala ang Pangulo na tama ang paninindigan nito sa WPS at gumagana ang polisiya nito sa nasabing usapin.

Magugunitang nanindigan ang Pangulo na hindi papayaang may mawalang teritoryo sa ilalim ng kanyang administrasyon at hindi niya papaalisin ang mga puwersa ng gobyerno na nagbabantay sa bahagi ng teritoryo ng bansa

Nagpaliwanag ang OCTA Research group sa isinusulong na hatian ng suplay ng bakuna kontra coronavirus disease 2019 (COVID-19).

Iginiit sa DWIZ ni Professor Guido David, fellow ng OCTA group, na 60% ang vaccine allocation ay mapupunta dapat sa National Capital Region (NCR) at CALABARZON at 10% naman sa Central Luzon, base na rin sa risk assessment na kanilang isinagawa.

Ayon pa kay David, inirekomenda rin nilang ibuhos ang 6% ng suplay ng bakuna sa Central Visayas at 4% naman sa Western Visayas.

Binigyang diin ni David na ang kanilang risk assessment ay ibinase rin nila sa economic impact ng COVID-19 pandemic.

Limampu’t isa (51) katao ang nagpositibo sa coronavirus disease 2019 (COVID-19) matapos dumalo sa isang pool party at inuman sa Barangay Nagkakaisang Nayon sa Quezon City.

Ang mga nasabing kaso ay kabilang sa 610 dumalo na isinailalim sa RT-PCR swab tests matapos ang nasabing event.

Sa ibinahaging video footage ng Quezon City local government, makikita ang mga dumalo na walang suot na face mask o face shield habang magkakatabi sa tinagurian nitong superspreader event.

Kasabay nito, pinayuhan ni Mayor Joy Belmonte ang publiko na bawal pa rin ang malalaking social gatherings sa ilalim ng general community quarantine.

Takot pa ring pumalaot sa Scarborough Shoal ang maraming mangingisda mula sa Mariveles, Bataan.

Sa halip, ipinabatid ng mga nasabing mangingisda na sa kabilang lugar na sila nangingisda tulad ng Mindoro matapos ipatupad ng China ang fishing ban sa West Philippine Sea (WPS).

Una nang inihayag ni Presidential Spokesman Harry Roque na dapat ituloy pa rin ng Pinoy fishermen ang pangingisda sa WPS matapos maghain ang Pilipinas ng diplomatic protest laban sa nasabing fishing ban na ipinatutupad ng China mula ika-1 ng Mayo hanggang ika-16 ng Agosto.

Umalma ang mga grupo ng mga kabataan sa isinusulong na flexible learning bilang ‘new normal’ ng Commission on Higher Education (CHED).

Sinabi ng National Union of Students of the Philippines na lalong magpapalala sa financial, mental at emotional na paghihirap ng mga estudyante ang nasabing hakbang ng CHED at nananatili pa ring epektibo ang face-to-face classes.

Kapabayaan sa sektor ng edukasyon naman kung ituring ng Kabataan party-list group ang nasabing pasya ng CHED na pagpapatupad ng flexible learning na pinaghalong online at offline na paraan.