Judith Estrada-Larino

Patay ang 25 anyos na student pilot matapos bumagsak ang minamaniobrang tecnam P-200 aircraft sa Barangay Urayong bayan sa Bauang, La Union.

Ayon sa operations and rescue coordination center ng Civil Aviation Authority of the Philippines (CAAP) ang estudyante na mula sa first aviation academy sa Subic bay international airport ay nagsasagawa ng solo cross country flight.

Batay sa flight plan ang nasabing aircraft na may registry number na RP-C8230 na nagmula sa Iba airport sa Zambales at patungong La Union airport at Lingayen airport bago bumalik ng Iba airport.

Ipinabatid ng Philippine coastguard na ang biktima ay kaagad isinugod sa Caba Municipal Health Office kung saan ito idineklarang patay at ngayo’y nasa Mapanao Funeral Service sa bayan ng Aringay.

Ilang debris ng aircraft ay nakuha ng mga otoridad sa halos tatlong daang Metro ang layo mula sa pampang.

Ipinadala na ng CAAP ang mga imbestigador nito mula sa aircraft accident investigation and inquiry board para imbestigahan ang nasabing aksidente.

Arestado ng NBI Special Task Force sa malaking hotel sa Parañaque City ang isang umano’y puganteng hapon na kilala bilang big boss sa pinakamalaking telecommunications fraud syndicate.

Kinilala ni NBI OIC Eric Distor ang suspek na si Watanabe Yuki na kilala rin bilang Kenji Shimada o Shi Shimada nasa blue notice ng international police.

Sinabi ni Distor na si Yuki ay nagtatago sa bansa dahil sa pagkakasangkot sa ibat ibang krimen sa Japan at iba pang bansa kabilang ang umano’y extortion at online fraud activities sa Pilipinas.

Ite turn over na sana ng NBI si Yuki at dalawa pang kasamahan nito sa Bureau of Immigration subalit nag positibo ito sa COVID-19 at negatibo naman ang dalawang kasamahan nya bagamat mananatili sila sa isolation at quarantine para sa kaukulang re swabbing.

Nasa custody na ng NBI security management section ang mga suspek.

Umaayos na ang  sitwasyon sa National Capital Region (NCR) at itinuturing na itong moderate-risk area mula sa high-risk area kaugnay sa coronavirus disease 2019 (COVID-19).

Ayon kay Professor Guido David, fellow ng OCTA Research group, bumaba sa halos 1,100 ang bagong COVID-19 cases sa Metro Manila kada araw sa nakalipas na isang linggo at nasa 10% ang positivity rate.

Sinabi ni David na nasa .57 na lamang ang reproduction rate sa NCR kung saan limang lungsod ang kabilang sa top 10 cities na nakapagtala ng mataas na kaso ng COVID-19 at lima naman sa labas ng NCR Plus.

Binigyang diin ni David na positibo ang mga indikasyong ito at inaasahan na ang mas maluwag na sitwasyon subalit hindi pa aniya nila irerekomenda ang pagluluwag ng restrictions sa mga panahong ito.

Nag-aapply na para makapagsagawa ng clinical trials sa bansa ang tatlong developer ng coronavirus disease 2019 (COVID-19) vaccines.

Kabilang dito, ayon kay Department of Science and Technology (DOST) Undersecretary Rowena Cristina Guevarra, ang West China Hospital and Sichuan University, Shenzhen Kangtao Biological Products Company at Eubiologics Company Limited.

Sinabi ni Guevarra na sinimulan nang pag-aralan ng Task Group on Vaccine Evaluation and Selection ang clinical trial applications ng mga nasabing vaccine developers.

Una nang inaprubahan ng Food and Drug Administration ang clinical trials ng COVID-19 vaccine manufacturers na Janssen, Clover Biopharmaceuticals at Sinovac Biotech.

Hindi sapat ang kampanya ng gobyerno para sa coronavirus disease 2019 (COVID-19) vaccination program.

Ayon ito kay House Health Committee Chair Helen Tan dahil ang information drive sa pagpapabakuna ay idinadaan lamang sa social media at posters.

Sinabi ni Tan, isang doktor na kailangan ang personal na pagpapaliwanag sa mga tao nang kahalagahan ng pagpapabakuna para higit na maintindihan at ma engganyong tumanggap ng COVID-19 vaccine.

Hindi naman aniya nasasagot ng posters at maging ng social media ang mga kadalasang tanong ng tao kaya’t kailangang may interaction.

Dahil dito, inirekomenda ni Tan na magtalaga ng vaccine campaigners na lalapit sa mga tao para mabigyan ng kaalaman ang publiko sa bakuna at tumaas ang tiwala ng mga ito sa pagbabakuna, anumang brand o tatak ng COVID-19 vaccine ang iturok sa mga ito.

Binato ng bote ng mga kabataan ang mga miyembro ng Quezon City Task Force Disiplina matapos silang sitahin dahil sa paglalaro ng volleyball sa NIA Road sa kabila ng curfew sa lungsod.

Bukod sa paglabag sa curfew, wala ring face mask ang ilan sa mga kabataan habang ang iba naman ay mali ang pagkakasuot, samantalang halos 20 kabataan ay walang physical distancing.

Nakita rin sa video ang pagtatago sa eskinita ng mga kabataan sa tuwing may dadaang police mobile.

Sinabi ng task force na dalawang beses na silang nakararanas ng pambabato sa buwang ito tuwing reresponde sila sa lugar.

Hindi lamang tanda ng desperasyon kundi nang pagiging ganid din at sagad sa butong kasamaan ng ilang Pilipino ang napaulat na vaccine at slot for sale.

Binigyang diin ito ni Senador Panfilo Lacson dahil walang pinipiling panahon at sitwasyon ang mga nagsasamantala pa para magpayaman.

Iginiit ni Lacson na habang maraming nagugutom dahil sa pandemya, may mga bago namang naging bilyonaryo na ang gamit na kapital ay kasakiman sa gitna nang pinakamatinding nararanasang health crisis.

Dapat aniyang arestuhin at kasuhan ang mga sangkot sa vaccine at slot for sale.

Kasabay nito, isinusulong ni Lacson ang mas mabilis at maayos na proseso nang pagbabakuna at maraming doktor ang nagsasabing alisin na ang pre-screening na nagpapatagal sa pagbabakuna bagamat dapat aniyang panatilihin ang 15-minute post vaccination monitoring bilang bahagi ng health protocols.

Sinabi pa ni Lacson nna mayroon namang form kung saan makikita ang pangalan ng mga babakunahan na may isyung pangkalusugan tulad ng hypertension at allergies kaya bakit pa sila kailangang kunan ng blood pressure. —ulat mula kay Cely Ortega-Bueno (Patrol 19)

Mahigpit na pinag-aaralan ng National Task Force Against COVID-19 ang pagpapagamit ng second dose sana ng bakuna bilang unang turok sa mga magpapabakuna.

Ito, ayon kay Dr. Ted Herbosa, special medical adviser sa task force, ay para mapabilis ang pagbabakuna kontra coronavirus disease 2019 (COVID-19), habang hinihintay ang pagdating ng susunod na supply ng bakuna na siya namang inirekomenda ni testing czar Vince Dizon.

Sinabi sa DWIZ ni Herbosa na nakadepende naman sa brand ng bakuna kung ilang linggo pa ang palilipasin bago magpaturok ng ikalawang dose mula sa unang pagturok ng bakuna.

Mayroon na rin naman aniyang bahagyang proteksyon ang mga naturukan na ng unang dose ng COVID-19 vaccine kaya’t ang ikalawang dose sana ay gagamitin muna sa mga hindi pa nakakatanggap ng bakuna.

Ang nangyayari, nakatabi ‘yung second dose, ina-assure natin ‘yung second dose. Ngayon, dahil ang supply ay maganda na, sinuggest ni Sec. Vince Dizon, sabi niya, gamitin na rin natin kasi parang hindi nagagamit ‘yan, sa rehistro naka-deliver ‘yan pero nasa store room ‘yan, naghihintay ng isang buwan bago gamitin. So, gamitin na lahat na first dose, anyway, assured na tayo do’n sa pagdating ng mga deliveries, so, mas bibilis pa pag ginamit natin ‘yon, kasi nga natatabi, e,” ani Herbosa. —sa panayam ng IZ sa Alas Sais

Iginiit ng Task Force Bangon Marawi na hindi hahayaang muling manganib ang buhay ng libu-libong internally displaced persons (IDPs).

Ayon sa task force, hindi pa nila bibigyan ng go signal ang mga residente na makapasok sa Marawi City at magtayo ng bagong istruktura sa loob ng pinaka-apektadong bahagi sa lungsod.

Sa kabila ito ng mga apela ng elected officials at private organizations sa gobyerno na makapasok na sila sa dating main battle area para magsimulang muli matapos atakihin ng grupong Maute Isis.

Binigyang diin ni Task Force Chairman Eduardo Del Rosario na kaunting tiis na lamang ay tuluyan na ring makakapasok sa maa ang mahigit 5,000 IDPs para mabuhay muli ng normal.

Sa Oktubre ay maaari na aniyang makapasok sa Marawi Advocacy Accompaniment (MAA) ang mga residenteng may hawak ng building permits, at target ng task force na matapos ang ilang infrastructure projects sa Setyembre.