Judith Estrada-Larino

Kailangang maayos pa ang sistema sa pagtatakda para sa national COVID-19 vaccination program para maiwasan ang pagsisiksikan sa mga vaccination sites.

Ayon ito kay Dr. Benito Atienza, pangulo ng Philippine Medical Association (PMA) na nagsabing partikular na dapat ayusin ay ang timing ng pagbabakuna o oras nang pagpunta ng mga tao sa vaccination sites para hindi masyadong mahaba ang pila o kakaunti lamang ang tao.

Tinukoy din ni Atienza ang pagdadagdag ng vaccinators na tutulong para mas marami pa ang mabakunahan kontra COVID-19 taliwas sa sitwasyon aniya sa Quezon City kung saan marami ang vaccination sites subalit wala namang sapat na health care workers para mag bakuna.

Dapat aniyang madaliin ang pagkuha ng dagdag vaccinators para hindi masayang ang bakuna na malapit na ring mag-expire.

Gayunman tiniyak ni Atienza ang pakikipag-ugnayan sa gobyerno para makatulong sa pagbabakuna lalo na sa mga buwan ng hunyo at hulyo kung kailan inaasahang darating ang malaking supply ng COVID-19 doses.

Kasabay nito ikinatuwa ni Atienza ang pagsasama ng IATF sa mga miyembro ng pamilya ng healthcare workers sa A1 priority group.

Tila minadali ng house committee on legislative franchises ang pag-apruba sa franchise applications ng Maynilad at Manila Water.

Pananaw ito ni house deputy speaker at bagong henerasyon partylist representative Bernadette Herrera-Dy at naniniwala rin siyang kulang ito para proteksyunan ang consumers laban sa pang-aabuso at kuwestyonableng gawain ng water concessionaires.

Partikular na tinukoy ni Dy ang taliwas na nilalaman ng house bill 9313 at 9367 sa nakasaad sa revised concession agreement (RCA) ng gobyerno at ng Manila Water at Maynilad kung saan nakasaad ang pagpapatuloy ng concessions hanggang July 2037 o 16 na taon samantalang sa dalaang panukala ay bibigyan ng 25 year franchise ang mga ito.

Kailangan aniya suriing mabuti ang nilalaman ng dalawang panukalang batas at kawalan ng probisyon para sa dispute resolution na taliwas pa rin sa article 13 ng RCA.

Marso nang maghain si Dy ng panukalang congressional review sa pakikipag-usap ng gobyerno sa Manila Water at Maynilad dahil karapatan aniya ng publiko na malaman ang mga pagbabago sa kasunduan.

Mahigit 1,000 overstaying at illegal Pinoy sa Hong Kong ang babakunahan kontra COVID-19 sa Hulyo.

Ang mga nasabing Pinoy ayon sa Hong Kong government ay kabilang sa libo-libong illegal immigrants at refugees na tuturukan ng COVID-19 vaccine.

Sinasabing hindi ganun kataas ang demand ng Sinovac at Pfizer vaccines sa mga residente ng Hong Kong kaya’t inialok ng gobyerno ang pagbakuna sa illegal immigrants at refugees.

Ang mga nasabing bakuna ay mag-e-expire na sa Agosto.

Tuloy ang national council assembly ng ruling party PDP Laban.

Tiniyak ito ni Party Vice Chairman at Energy Secretary Alfonso Cusi sa kabila nang inisyung memorandum ni Senador Manny Pacquiao, pangulo ng ruling party sa mga miyembro na huwag makiisa sa nasabing event.

Binigyang diin ni Cusi na kailangang ma-assess ang estado ng partido sa suporta nito sa party chairman na si Pangulong Rodrigo Duterte.

Patapos na aniya ang kanilang mga termino at dapat na mabusisi kung ano ang mga na accomplish na ng partido at kung ano-ano pa ang mga kailangang gawin para patatagin ito bagamat kayang kaya ng ruling party na makipagsabayan sa mga talakayan batay na rin sa komposisyon ng PDP Laban National Council.

Iginiit ni Cusi na ang assembly ay bahagi ng demokratikong proseso na dapat niyayakap ng kada malalaking political party.

Muling tiniyak ni Cusi ang pagkakaisa at commitment ng uling party para maabot ang socio economic agenda ng Duterte administration.

Mga permanenteng residente ng Pasay City ang ilang Chinese nationals na nabakunahan na kontra COVID-19.

Ipinabatid ito ni Health Undersecretary Maria Rosario Vergeire batay sa impormasyong ibinigay ng Pasay City government kaya walang nalabag na government protocols ang ginawang pagbakuna sa mga nasabing Chinese nationals.

Ayon kay Vergeire malinaw sa Inter Agency Task Force resolutions na hindi dapat ituring na iba sa mga Filipino nationals ang sinumang dayuhan na permanent resident na sa Pilipinas na nangangahulugang kailangan pa ring bakunahan ang isang dayuhan dahil nakakasalamuha niya rin ang mga Pilipino.

Una nang inihayag ni Pasay City Mayor Emi Calixto-Rubiano na ang mga naturukang Chinese nationals ay kabilang sa A2 priority list o senior citizens at A3 priority list o mag mayroong co-morbidities.

Inaasahan nang masisimulan sa huling bahagi ng Hunyo ang walong buwang clinical trials sa paggamit ng Ivermectin bilang gamot sa COVID-19.

Batay ito sa report ng Philippine Council for Health Research and Development (PCHRD) kay DOST Secretary Fortunato Dela Pena.

Mahigpit na tututukan sa clinical trials ng Ivermectin ang efficacy, safety at epekto nito sa mga asymptomatic at non severe Filipino patients.

Pinaigting pa ng Grupong Aktib o Aktibong Kilusan tungo sa iisang bayan ang kampanya nito kontra paninigarilyo.

Kasunod na rin ito nang paggunita sa World No Tobacco Day bukas, May 31.

Iginiit ni Aktib President Ernesto Ofracio ang masamang epekto sa katawan ng pagyo-yosi tulad ng mga sakit lalo na ngayong panahon ng pandemya dahil sa matinding tama ng virus sa katawan.

Sadya aniyang nakakamatay ang paninigarilyo nang hindi napapanagot ang industriya ng tabako na siyang nagbebenta ng nasabing produkto.

Sinabi pa ni Ofracio na tema nang paggunita ng Pilipinas sa World No Tobacco Day ay ‘Commit to quit:   nagkakaisang pilipino para sa no yosi!’

Ipinabatid ni Ofracio ang pakikipag-isa sa DOH, Department of Education at iba pang ahensya ng gobyerno gayundin ng barangay, civil society groups at people’s organization sa ilalim ng Philippine Smoke Free Movement para isulong ang awareness sa masamang dulot ng paninigarilyo.

Isinusulong din ng Aktib ang agarang pagsasabatas ng smoke free act.

Magugunitang nilagdaan ng Pangulong Rodrigo Duterte ang Executive Order 26 na nagbabawal ng paninigarilyo sa lahat ng mga pampublikong lugar at sasakyan.