Judith Estrada-Larino

Tila kumita pa umano ang mga executive ng ABS-CBN sa pangunguna ng presidente at chief executive officer (CEO) nitong si Carlo Katigbak, sa kabila ng pagbasura ng kamara sa prangkisa ng dating media giant.

Ayon sa report, pumapalo sa kabuuang P28.2-milyong bonus ang tinanggap ng limang executive ng ABS-CBN noong 2020 at may makukuha pang halos P8-milyon ngayong taon.

Sa disclosure ng ABS-CBN sa Philippine Stock Exchange, pumalo saP 138.4-milyon ang pinasuweldo noong 2020 kina Katigbak, Aldrin Cerrado, Laurenti Dyogi, Roldeo Edrinal at Maria Soccoro Vidanes.

Bukod pa ito sa P28.2-milyong bonus at P9.2-milyong ibang kita ng mga naturang ABS-CBN executives.

Sa taong ito ay sinasabing aabot sa P146.1-milyon ang ipapasuweldo sa mga nasabing Kapamilya executives bukod pa sa mga bonus at iba pang benepisyo.

Batay pa sa report, 6% ang itinaas sa suweldo nina Katigbak, Ceraso, Dyogi, Edrinal at Vidanes.

Walang maaasahang malaking pagbabago sa trend ng coronavirus disease 2019 (COVID-19) hangga’t hindi nababakunahan ang 30% hanggang 50% ng populasyon ng bansa.

Binigyang diin ito ni Professor Ranjit Rye, fellow ng OCTA Research group, dahil masyado pang maliit ang bilang ng mga nababakunahan para makaapekto sa kaso ng COVID-19 sa bansa.

Samantala, hinimok ni Rye ang gobyerno na talasan ang mata sa vaccination rollout ng gobyerno lalo sa pagbabakuna sa mga nasa Metro Manila at mga kalapit na lalawigan kung saan mataas ang kaso ng COVID-19.

Kung tututukan lamang ng gobyerno ang naunang plano, sinabi ni Rye na asahan na ang magandang balita sa mga buwan ng Setyembre at Oktubre at kung higit pang magkakapit-bisig ang lahat, hindi na aniya malayo ang isang magandang Pasko para sa mga Pilipino.

Una nang iniulat ng Department of Health (DOH) na hanggang nitong ika8 ng Hunyo, nasa 1.6-milyon pa lamang o halos 4% ng populasyon ang nakatatanggap ng kumpletong dose ng COVID-19 vaccine.

Isang kandidato lamang ang dapat na isabong ng oposisyon sa 2022 national elections.

Ayon ito kay Atty. Howard Calleja, convenor ng 1Sambayan dahil committed sila sa pagbubuo ng matibay na koalisyon.

Sinabi ni Calleja na inaasahang ngayong weekend ilalabas na nila ang mga posibleng kandidato ng koalisyon sa eleksyon para makuha ang pulso ng taumbayan sa karapat dapat na dalhin ng 1sambayan at kung anu ano ang mga usaping dapat itong agarang tugunan.

Inamin ni calleja na nakipag usap na sila kina Manila Mayor Isko Moreno, Vice President Leni Robredo, Senador Grace Poe at Dating Senador Antonio Trillanes IV.

Ipinagmalaki ni Calleja ang kanilang  formula, system at tiwala sila sa proseso na ang mga tinukoy niyang personalidad ay magkakaisa para sa kapakanan ng mga Pilipino at isasantabi ang kanilang personal interests.

Napaanak sa sasakyan ng Quezon City Task Force disiplina ang isang ginang matapos hindi siya tanggapin sa isang ospital.

Ayon kay Ronessa Gelotin, staff ng task force disiplina pauwi na sila nang parahin sila ng isang lalaki sa IBP road at nagsabing manganganak na ang kanyang misis.

Inihayag pa aniya ng lalaki na hindi tinanggap ang ginang sa isang ospital dahil wala itong swab test.

Kaagad namang isinakay ng task force ang mag asawa sa kanilang sasakyan kung saan na ito pinutukan ng panubigan at napaanak na ito.

Kaagad namang dinala ng task force ang mag isa sa isang klinika.

Kinasuhan na ang tatlo mula sa 66 na police recruits na nagsumite ng pekeng RT PCR test results sa isinasagawang recruitment sa Police Regional Office – Bangsamoro Autonomous Region.

Dahil sa ginawa ng mga nasabing police recruits ipinabatid ni PNP chief Guillermo Eleazar na disqualified na ang mga ito sa pa a-apply samantalang 45 iba pag police recruits ang patuloy pang iniimbestigahan.

Ayon kay Eleazar umamin ang ilang police applicants na hindi sila sumailalim sa swab test at nagbayad lamang ng P500.00 para makakuha ng pekeng RT-PCR result habang ang iba naman ay sumailalim sa swab test subalit hindi batid na peke ang isnumite nilang RT-PCR result.

Binigyang diin ni Eleazar na dapat magsilbing leksyon sa iba pang aplikante ang nasabing insidente para hindi ma-disqualify.