Timbog ang mahigit 200 indibidwal sa Cebu City matapos lumabag sa quaratine protocols.
Kabilang sa mga inaresto ayon sa Emergency Operations Center ng Cebu City ang 122 mula sa isang bar sa Archbishop Avenue at ang iba ay naggagala sa mga lansangan ng face mask.
Sinabi ni EOC Head Councilor Joel Garganera na nagkakasa sila ng surprise inspections sa mga establishment sa lungsod sa ilalim ng ‘Oplan Bulabog’.
Unti-unting bumababa ang kaso ng COVID-19 sa Metro Manila.
Pagmamalaki ito ni Health Secretary Francisco Duque III kung saan aniya ay nasa 800 na lamang ang average COVID-19 cases sa Metro Manila kumpara sa halos 7,000 kaso nuong kasagsagan ng pandemya.
Binigyang diin sa DWIZ ni Duque na tuluy-tuloy ang mahigpit na pagkilos ng gobyerno para makaagapay sa pandemya dahil ilang lugar din sa bansa ang nakakapagtala ng mataas na kaso ng COVID-19.
Kabilang aniya sa mga paraang ito ang pagpapalawig sa mga temporary treatment facilities at pagtataas ng COVID-19 bed allocation bukod pa sa pakikipagugnayan sa pribadong sector para labanan ang pandemya.
Naghahanda na ang Quiapo Church sa pista ni San Juan Bautista o Saint John the Baptist sa Hunyo 24 na pagdiriwang din ng araw ng Maynila.
Kilala ang quiapo church dahil sa itim na Nazareno subalit ito ay parish ni Saint John the Baptist na patron saint nito.
Bukod dito pinaghahandaan na ng Quiapo Church at mga deboto nito ang pormal na pagtatalaga kay Bishop Jose Cardinal Advincula bilang Arsobispo ng Maynila sa manila cathedral sa Hunyo 24 din.
Mahigit 700 trabaho ang nakalaan para sa health workers sa Metro Manila.
Ito ayon Kay Health Undersecretary at Treatment Czar Leopoldo Vega ay 22% ng mga bakanteng trabaho para sa health workers matapos buksan ang mahigit tatlong libong trabaho sa kalakhang Maynila.
Kailangan aniya ang health workers sa mga pampubliko at pribadong ospital, testing centers at isolation facilities sa kalakhang Maynila.
Umagaw ng eksena sa pila ng mga nagpa bakuna sa Marikina City si Spiderman.
Nag-viral sa social media ang pagsusuot ni Alfred Dizon ng costume niyang spiderman nang dumating sa vaccination facility sa lungsod.
Inakala ng staff na prank ang ginawa ni Dizon bagamat inalalayan nila ito nang makita ang vaccination card nito.
Ayon kay Dizon, nag-costume siya ng spiderman para magbigay ng good vibes at mahimok ang marami pang tao na magpabakuna kasabay ang paggamit sa mga linyang “with great power comes great responsibility mula sa 2012 Spiderman film.
Nagbabala si Anakalusugan Party List Representative Mike Defensor hinggil sa paggamit umano ng ilang milyong pisong allowance para sa mga health workers sa ilalim ng Bayanihan 2 law.
Kasunod na rin ito ng reklamo hinggil sa paggamit sa COVID-19 related activities ng P36 million na halaga ng allowances ng mga empleyado ng Philippine Orthopedic Center.
Ayon kay Defensor hindi uubrang gamitin ang nasabing pondo para sa allowance ng health workers dahil malinaw sa Bayanihan 2 Law na dapat bigyan ng dagdag na hazard pay, special risk allowance at iba pang benepisyo ng mga ito at mayruon aniyang hiwalay na pondo para sa pandemic response interventions tulad nang pagbili ng PPE o protective personal equipment.
Hindi kasali o partido ang PhilHealth sa idinismis na kasong kriminal at administratibo laban sa 11 opisyal ng ahensya.
Ayon ito kay PhilHealth President at CEO Dante Gierran dahil ang pasya ng Ombudsman ay para sa kada isang sangkot na opisyal ng ahensya bilang respondents sa kaso.
Gayunman sinabi ni Gierran na ang naturang pasya ng Ombudsman ay dapat igalang sa usapin ng hustisya at 110 million members na dapat mabigyan ng maayos na serbisyo ng PhilHealth.
Kabilang sa mga nilinis ng Ombudsman sina dating acting president at CEO Roy Ferrer, Interim President and CEO Celestina Dela Serna, EXP and COO Ruben Basa, SVP for Management Services sector Dennis Mas at Vice President for corporate planning and organizational and system development office Shirley Domingo.
Ang mga nasabing opisyal ay una nang inakusahan ng pagsasampa ng umano’y walang basehang administrative cases, mga hindi makatuwirang reassignments at pagsuspindi sa mga complainant bilang pagganti umano sa mga ito.
Gumulong na ang pagbabahay bahay ng Navotas City government para mabakunahan ang mga residente nito kontra COVID-19.
Ipinabatid ni Navotas City Mayor Toby Tiangco na priority nilang maturukan ang mga bed ridden senior citizens at iba pang walang kakayahang makapunta sa mga vaccination sites sa lungsod.
Tatlumpung senior citizens mula sa mga Barangay ng Tangos North at South ang kaagad nabakunahan sa unang araw ng house to house vaccination ng Navotas City Government.
Kasabay nito inihayag ni Tiangco na nasa 160 miyembro ng pantawid Pamilyang Pilipino program ang nabakunahan na.
Asahan na ang pagdami ng mga negosyong magbubukas sa Makati City.
Kasunod ito nang inilunsad na safety seal certification program na pinangunahan ni Makati City Mayor Abby Binay at ilang negosyante sa lungsod.
Sa pamamagitan ng safety seal certification madadagdagan ang bilang ng mga customer na uubrang makapasok sa mga establishment.
Ang saety seal certification ay patunay nang pagsunod ng mga establishment sa ipinatutupad na minimum public health standards kaugnay sa COVID-19 pandemic.
Sanib puwersa ang Philippine Consulate sa New York, New York City Health Office, mga ospital at ilang Pinoy American Organizations para magbakuna gamit ang gawang COVID-19 vaccine mula sa Johnson&Johnson.
Ayon kay Vice Consul Paolo Marco Mapula sa nakalipas na weekend ay tinatayang nasa 500 libreng bakuna ang itinurok sa mga Pilipinong nasa New York sa mobile vaccination site sa Fifth Avenue at 46th avenue na bukas din sa lahat, walk in clients partikular ang mga turista.
Isinulong naman ni New York City Mayor Bill De Blasio ang vaccine tourism hindi lamang para sa kaligtasan ng New Yorkers mula sa mga turista kundi para makapagpasok na rin ng kita sa ekonomiya ng lungsod.