Judith Estrada-Larino

Palasyo umalma sa kaugnay sa pagsisi sa kakulangan ng bakuna kaya sumisirit ang COVID-19 cases sa mga lalawigan.

Umalma ang Palasyo sa pagsisi sa kakulangan ng supply ng bakuna kaya’t sumisirit ang kaso ng COVID-19 sa mga lalawigan.

Kasunod na rin ito ng pagbatikos ni Iloilo City Mayor Jerry Treñas sa gobyerno sa aniya’y hindi patas na pamamahagi ng supply ng bakuna na dahilan nang pagtaas ng COVID-19 cases sa mga probinsya.

Una nang inihayag ni Treñas na ibinuhos ng gobyerno, batay na rin sa rekomendasyon ng OCTA Research Group ang malaking bulto ng COVID-19 vaccine sa Metro Manila at mga karatig lalawigan.

Sinabi ni Presidential Spokesman Harry Roque na sa katunayan ay 32% lamang mula sa 12 million doses ng bakuna ang napasakamay ng Metro Manila At mga lalawigan ng Bulacan, Cavite, Laguna at Rizal.

Tinitiyak aniya niya kay Treñas na mask, huwag, iwas gayundin ang bakuna ang solusyon para hindi tumaas ang kaso ng COVID-19 bagama’t maraming mga pilipino ang hindi sumusunod sa protocols.

Bultuhan ang pagdating sa bansa nang naselyuhang 40 million doses ng COVID-19 vaccine na gawa ng Pfizer.

Ipinabatid ito sa DWIZ ni National Task Force Spokesperson General Restituto Padilla kaya’t kung ano ang kaagad ma-poproduce ng Pfizer na bakuna ay kaagad ide-deliver sa bansa.

Sinabi pa ni Padilla na bago matapos ang taon ay inaasahan ang herd immunity dahil dagsa na ang bakuna na maaaring iturok sa mga Pilipino lalo pa’t target ng gobyerno ang limandaang libong mababakunahan kada araw.

Hindi po siya one trans, kasi magagamit po ito sa production facility… so kung ano man po yung na-iset aside nila para sa atin so siguro mga isa dalawang milyon kada delivery yan ang siyang darating po. Tamang-tama lang po ‘yon kasi ‘yung ating roll-out ay may tinatarget po tayo na mga bilang pagdating ng panahon na ‘yan ‘yung dagsa ng bakuna eh angkop dahil mag-iincrease na tayo ng roll-out rate natin sa 500,000 a day to more than that”, ani Padilla sa panayam ng Serbisyong Lubos sa Otso Otso Dos.

Uubrang suportahan ng PDP Laban si Davao City Mayor Sara Duterte-Carpio sa 2022 Presidential elections.

Ito ayon kay Cabinet Secretary Karlo Nograles ay bagamat hindi miyembro ng ruling party si Mayor Sara.

Sinabi ni Nograles, miyembro ng PDP laban na bahala ang Pangulong Rodrigo Duterte bilang National Chairperson na mag rekomenda sa partido nang isasabong na presidentiable subalit ang desisyon ay dadaan sa proseso ng partido.

Nakatakdang isagawa sa Hulyo 16 ang National Council Meeting ng PDP laban at kinabukasan nito ang National Assembly ng Ruling Party.

Labing pito (17) nang kaso ng nakakahawang Delta coronavirus mula sa India ang na-detect sa Pilipinas.

Ayon ito kay Health Undersecretary Maria Rosario Vergeire kung saan apat na kaso pa ang nadagdag kabilang ang returning overseas Filipinos mula sa MV Eastern Hope na barkong nakadaong ngayon sa South Korea.

Isa na aniya nasawi mula sa Delta variant at naka rekober na ang iba pa.

Ipinagmalaki ni Vergeire ang aniya’y epektibong pagpapatupad ng border controls dahil na-detect kaagad ang mga nasaging Delta corona variants mula sa mga biyahero o Pilipinong bumabalik sa bansa.

Una nang inihayag ng mga expert na ang Delta variant ay una nang natukoy sa India ay sinasabing mas mabilis makahawa at nagdudulot ng mas matinding sakit sa mga pasyente.

Nakatakdang pulungin ng Department of Energy  (DOE) ang malalaking electric companies para tiyaking sumusunod sa mga polisiya ang mga ito.

Ayon kay Energy Undersecretary Felix William Wimpy Fuentebella. I-eevaluate nila kung sumusunod ang mga electric company sa inisyu nilang direktiba hinggil sa pagsasagawa ng maintenance ng generators tuwing peak hours o sa mga buwan ng Abril, Mayo at Hunyo.

Tiniyak ni Fuentebella ang parusa ng ERC, Philippine Competition Commission at DOJ sa mga pasaway na electric companies.

Una nang inihayag ng DOE na malaki ang posibilidad na bumagsak ang electricity reserves ng bansa sa yellow o red signal.

Ipatutupad na simula ngayong araw ang scheduling system o appointment system sa vaccination sa Maynila kaya’t ipinagbabawal na ang walk-in sa mga vaccination site sa lungsod.

Binigyang diin ng Manila Public Information Office na kailangang hintayin muna ng mga residente ang text message mula sa Manila Covax na nagsasabi kung saan at anong oras ang vaccination slot nito bago pumunta sa mga vaccination site para magpa-bakuna.

Nilinaw ng Manila PIO na hindi uubrang screenshot ng text message lamang ang ipakikita sa vaccination site at kung nabura na ang mensahe, kailangang maghintay ng susunod na schedule.

Una nang inihayag ni Manila Mayor Isko Moreno ang pagsuspindi sa appointment system dahil sa kakulangan ng bakuna.

Inaasahang 28,000 Manilenyo ang mababakunahan ngayong araw sa apat na malls sa Maynila na may tig-2,500 doses at 18 community sites sa ibat-ibang paaralan na mayroong tig-1,000 doses.

Positibo ang National Task Force against COVID-19 na maaabot ang target na 500,000 shots ng COVID-19 vaccine kada araw.

Ito ayon kay Dr. Ted Herbosa, medical expert ng task force ay lalo pa’t nasa bansa na ang isang team mula sa health ministry ng Israel na tutulong para ibahagi ang strategy na ginamit nila sa mabilis na pagbabakuna ng kanilang citizens.

Sinabi pa sa DWIZ ni Herbosa na malaking tulong din ang bakuna nights ng mga local government units para mapabilis ang pagbabakuna lalo na pag dumagsa na ang supply ng COVID-19.