Nasagip ng mga otoridad ang 28 anyos na lalaki matapos ilang oras na ma-trap sa gumuhong tunnel sa Purok Dose, Barangay Mainit, Nabunturan, Davao De Oro.
Ang biktima na nakilala lamang na si Alvin ay kaagad isinugod sa ospital para magamot matapos hindi makalabas ng tunnel ng mahigit sampung oras.
Gumamit ng heavy equipment tulad ng backhoe ang rescue team para mapabilis ang operasyon at makuha ang biktima.
Iniimbestigahan na ng mga otoridad ang dahilan nang pagguho ng tunnel.
Nagpositibo sa South African variant ng coronavirus ang isang COVID-19 patient na nasawi mula sa Davao Oriental.
Ito ayon sa Provincial Epidemiologic Surveillance Unit ay matapos isalang sa test ang swab specimen na kinuha mula sa nasabing 63 taong gulang na lalaki mula sa Mati City.
Ang naturang pasyente na na-confine sa Davao Regional Medical Center nuong Mayo 9 ay nasawi dahil sa respiratory failure secondary to acute distress syndrome secondary to COVID-19 pneumonia at nagtataglay din ito ng hypertension at diabetes.
Kasabay nito patuloy ang paalala ng Provincial Task Force COVID-19 sa mga taga-Davao Oriental na mahigpit pa ring sumunod sa standard health protocols at quarantine guidelines para hindi na kumalat ang virus.
Ipinauubaya na ng Pangulong Rodrigo Duterte sa mga local government unit kung o obligahin pa o hindi na ang negative RT-PCR test para sa mga indibidwal na papasok sa kani-kanilang mga teritoryo.
Kasunod na rin ito nang pagbaligtad ng pangulo sa pasya ng IATF na huwag nang i-require ng LGU’s ang negatibong swab test matapos umalma at umapela sa pangulo ang ilang LGU’s hinggil sa pinaluwag na border control dahil sila ang nakakaalam sa tunay na sitwasyon sa kanilang mga lugar.
Ayon kay Health Secretary Francisco Duque III bahala na ang LGU’s na magsagawa ng sariling risk assessment kung ire-require ang RT-PCR testing sa sinumang papasok sa kanilang lugar.
Ipinabatid ni Duque na inihahanda na ng DICT ang digital vaccine certification para sa mga LGU na ire-require lamang ang vaccination cards para sa mga papasok sa kanilang lugar matapos aniyang mag commit ang ahensya na ie-encode at ia-upload ang 90% ng kabuuang bilang ng mga nabakunahan na hanggang Hulyo 31.
Nahalal bilang bagong Pangulo ng CBCP si Caloocan Bishop Pablo Virgilio David.
Kasunod na rin ito nang unang araw ng two day online plenary assembly ng mga obispo.
Bago maging Pangulo ng CBCP, ang anim naput dalawang taong gulang na si david ay nagsilbing vice president ng CBCP simula pa noong Disyembre 2017 at naging katuwang ni CBCP outgoing President Romulo Valles.
Si David ay lantad ding kritiko ng drug war campaign ng Pangulong Rodrigo Duterte kaya’t ilang beses nang nakastigo ng punong ehekutibo sa paggamit aniya ng pulpito para atakihin ang gobyerno.
Samantala, si Pasig Bishop Mylo Hubert Vergara ay nahalal namang Vice President ng CBCP.
Suportado nina Pangulong Rodrigo Duterte at Senador Bong Go si Senador Manny Pacquiao sa nalalapit na laban nito kay Errol Spence, Jr.
Tiniyak ito ni Go sa kabila ng mga alegasyong katiwalian ni Pacquiao laban sa gobyerno at isyu sa pagitan nito at ng ilang lider ng PDP laban.
Sinabi ni Go na nais nilang manalo si Pacquiao dahil isa na naman itong karangalan sa bansa.
Nananatili aniya silang magkaibigan ni Pacquiao sa kabila ng mga isyu at hindi aniya siya banta sa planong pagtakbo ng kapwa Senador sa pagka-Pangulo dahil hindi siya interesadong sumabak sa 2022 national elections.— ulat mula kay Cely Ortega-Bueno (Patrol 19)
Dapat na mas paigtingin pa ang border control para mapigilan ang pagkalat sa bansa ng mga bagong variant ng COVID-19.
Sinabi ni Senador Bong Go na dapat habaan na lamang ng mga Pilipino ang pasensya lalo na ang mga biyahero at sumunod sa mga itinakdang protocols ng gobyerno.
Dapat aniyang sundin kung ano ang sinabi ng ITAF na bilang ng araw ng quarantine dahil iniiwasan lang ng pamahalaan na bumagsak ang healthcare ng bansa sakaling muling dumami ang kaso ng COVID-19.
Ayon pa kay Go, binabalanse ng gobyerno ang kalusugan at ekonomiya ng publiko subalit mas mahalaga pa rin ang buhay kayat kaunting tiis na dahil ginagawa ng pamahalaan ang lahat para malampasan ng sambayanan ang COVID-19 pandemic.— ulat mula kay Cely Ortega-Bueno (Patrol 19)
Ibinasura ng Philippine Nurses Association (PNA) ang panukala ni Labor Secretary Silvestre Bello III na buwagin na ang licensure examinations.
Ipinabatid ni Melbert Reyes, National President ng PNA na kaagad nilang binaril maging ng board of nursing ang nasabing panukala ni Bello nang makipagpulong ito sa kanilang hanay kaugnay sa deployment ban sa health workers.
Sinabi ni Reyes na hindi u-ubrang hindi sumalang sa board examination ang mga nursing graduate dahil buhay ang kanilang hinahawakan kayat kailangang matiyak na competent ang health professionals.
Bababa aniya ang kalidad at level ng mga nurse sa bansa kapag hindi magbo-board exam ang mga nursing graduates.
Binigyang diin pa ni Reyes na ang board exams ay magsisilbing check and balance para sa kalidad ng edukasyon sa gitna na rin ng mga aniya’y naglipanang fly by night schools.
Nagbanggaan ang isang cargo vessel at foreign utility boat sa South harbor anchorage area kaninang madaling araw.
Dahil dito, nakalubog sa dagat ang kalahating bahagi ng MV Palawan Pearl na may bitbit na 3,000 litro ng diesel sa oil storage tank nito.
Kaagad namang sumaklolo ang Philippine Coastguard sa banggaan ng MV Palawan pearl at bkm 104 na isang foreign utility vessel na kinontratang magsagawa ng dredging at iba pang land development activity na kinakailangan sa pagpapatayo ng new manila airport.
Matapos ma obserbahan ang pagkalat ng oil sheen sa paligid ng MV Palawan pearl naglatag na ng apat na segment ng oil spill boom ang coastguard marine environmental protection command sa paligid ng barko.
Walang nasaktan sa mga tripulante ng dalawang sasakyang pandagat na inabisuhang maghain ng marine protest hinggil sa insidente.
Umalma si Vaccine Czar Carlito Galvez sa umano’y favoritism sa pamamahagi ng COVID- 19 vaccines sa buong bansa.
Una nang inihayag ni dating Health Secretary ngayo’y Iloilo Congresswoman Janette Garin na mayruong palakasan o patronage system sa distribusyon ng mga bakuna kontra COVID-19.
Ipinabatid ni Galvez na ang mga bakuna ay ipinamamahagi nila sa regional centers for health development ng DOH gayundin sa mga local government unit at mga Alkalde ng highly urbanized areas.
Hindi aniya pupuwede ang gustong mangyari ni Garin na ibigay sa kanya ang supply ng bakuna dahil maguguluhan ang ibang LGU’s lalo na’t hindi naman sila kabilang sa mga lineage ng distribution.
Bukod dito , binigyang diin ni Galvez na ilang pulitiko ang gustong gamitin ang COVID-19 vaccination program para sa sariling political agenda.
Limitado muna ang tatanggaping pasyente sa ospital ng Sampaloc sa Maynila.
Ito ay dahil sa isasagawang installation ng negative pressure system sa delivery room, operating room at intensive care unit ng pasilidad para ma isolate ng maayos ang mga pasyenteng mayruong nakakahawang sakit tulad ng COVID-19 at maagapan ang hawahan ng mga pasyente, watchers at maging medical staff.
Ayon kay Dr. Aileen Lacsamana, Director ng ospital ng Sampaloc ang hakbang ay pag-upgrade na rin ng kanilang COVID-19 ward upang magkaruon ng ICU capability para sa moderate at severe cases.
Bandang alas-8 kaninang umaga nang isara ang Dr, Or at ICU ng ospital at hanggang Hulyo 15 sarado ang mga nasabing bahagi ng ospital ng Sampaloc.