Judith Estrada-Larino

Kinasuhan na ang suspek sa pagkamatay ng isang kadete ng Philippine Merchant Marine Academy (PMMA) na natagpuan sa barracks sa San Narciso, Zambales.

Ipinabatid ni PMMA Chief of Staff of the Superintendent Chuck Dela Cruz na sinampahan na ng homicide case si Cadet 3^rd class Jomel Gloria sa Office of the Provincial Prosecutor.

Hawak na ng mga otoridad si Gloria na ayon kay Dela Cruz ay nakipag ugnayan kaagad sa pamunuan ng pmma at umaming hindi sinasadya ang dalawang beses na pagsuntok sa dibdib ni cadet 4^th class Jonas Bondoc.

Magkaibigan aniya sina Gloria at Bondoc kaya’t wala siyang alam na nag away ang mga ito.

Kaugnay nito, sinabi ni Dela Cruz na lumalabas sa imbestigasyon ng pmma gayundin ng prosecutor na walang hazing na sangkot sa insidente.

Hindi na i-aapela ng Ombudsman ang pagkaka-absuwelto ni Senador Ramon Bong Revilla, Jr. sa 16  na graft charges kaugnay sa pork barrel scam.

Kasunod na rin ito ng polisiyang pinaiiral ni Ombudsman Samuel Martires na hindi na dapat i-apela ang pagbasura ng mga kaso o quashal of information and judgments of acquittal.

Sa inisyung resolusyon ng special first division ng sandiganbayan nuong Hulyo 1 pinagbigyan nito ang demurrer to evidence na isinampa ng kampo ni Revilla dahil sa kawalan ng sapat na ebidensya laban dito bagamat ibinasura ang parehong mosyon ng negosyanteng si Janet Lim Napoles.

Ang demurrer to evidence ay kapareho ng motion to dismiss sa basehang insufficiency of evidence.

Naitala ng PhiVolcs ang isang maikling phreatomagmatic eruption ng bulkang Taal kaninang umaga.

Ayon sa Paolo Reniva, Volcanologist sa Taal volcano observatory  ang pagsambulat ng bulkang Taal ay umabot hanggang 200 meters mula sa main crater at ika-7 beses nang nangyari simula kahapon.

Una nang inihayag ng Phivolcs na asahan na ang phreatomagmatic eruption sa Taal volcano katulad ng pagsabog nito noong Hulyo 1.

Nananatili sa alert level 3 ang bulkang Taal.

Kulang pa ang paliwanag sa mga senior citizens hinggil sa epekto ng bakuna.

Inamin ito ni Dr. Nina Castillo-Carandang, miyembro ng national immunization technical advisory group kaya’t marami pa rin aniyang senior citizen ang takot magpa bakuna kontra COVID-19.

Kasunod na rin ito ng report na nasa halos 9% lamang ng mga senior citizens ang naka kumpleto ng second dose samantalang target ng gobyerno na maturukan ang mahigit 8.2 milyon sa age category na ito.

Naging maayos ang unang araw nang pagbabakuna sa mga manggagawa sa Boracay island.

Ipinabatid ito ni Malay Mayor Frolibar Bautista kasunod nang isinagawang ceremonial vaccination para sa Boracay workers kahapon.

Malaking tulong aniya ang pagbabakuna sa Boracay workers para na rin sa kaligtasan ng mga turistang tutungo sa isla.

Pabor si Dr. Ted Herbosa, medical expert sa National Task Force against COVID-19 na ipagpatuloy ang COVID-19 test.

Ito ayon kay Herbosa ay bagama’t bumababa ang mga naitatalang bagong kaso ng COVID-19 subalit nangangahulugan namang mayroon pa ring transmission ng virus.

Sinabi sa DWIZ ni Herbosa na tanging ang paghahanap sa mga positibo sa virus ang paraan para matigil ang transmission ng COVID-19.

Ang curve natin kapag meron ka paring four thousand meron ka pa ring continued transmission, yun ang interpretation , nandoon hindi siya bumababa, hindi siya nag-paflat,  hindi siya ganon mataas pero nandoon siya sa kalagitnaan noong sa last year. There is continued transmission, bilib ako doon sa basis na siguro dapat baguhin natin ang positive.  When you have continued transmission  ang principle continue to test, continue to find out kung sino ang may COVID, para maalis at mahinto ang transmission, ″ pahayag ni Herbosa.

Paplantsahin pa ng mga otoridad ang mga requirements sa interzonal travel.

Ayon ito kay Dr. Ted Herbosa, medical expert sa national task force against COVID-19 matapos pumayag aniya ang doh at iatf sa hiling ng local executives na humingi sila ng negative COVID-19 test result sa sinumang papasok sa kani kanilang teritoryo.

Sinabi sa DWIZ ni Herbosa na ang gusto lamang ng DOH at IATF ay magkaroon ng standard COVID-19 test.

Pag-uusapan pa rin ito, at iyon nga sabi nga, pwede basta PCR, iyong gumagamit ng antigen, gumagamit ng antibodies para ma-standardized lang natin at ma-catch lang natin talaga ang pagpasok , pag-uusapan pa rin ito.

Naniniwala si Herbosa na balancing act ang dapat gawin para malabanan pa rin ang virus.

Una nang inihayag ni Presidential Spokesman Harry Roque na sapat na ang vaccination card para makapasok sa ibang lugar o lalawigan ang mga fully vaccinated individual na kinontra naman ng local executives.

It’s a balancing act talaga, Wala naman sigurong mali o tama rito, we balancing act kung ano ang gagawin. Kahit tayo we are balancing between GCQ, with restrictions minimal restrictions with GCQ hindi tayo sure there’s a lot of uncertainty pwedeng sumipa muli ang cases kasi plateau pa rin tayo ,″ wika ni Herbosa.

Hindi naman kailangang buwagin ang Professional Regulations Commission (PRC).

Ayon ito kay Labor Secretary Silvestre Bello III matapos niyang isulong ang pagbuwag sa nursing board at bar examinations.

Binigyang diin sa DWIZ ni Bello na ang PRC ay isang regulatory body na ang pangunahing trabaho ay i-evaluate ang kakayahan ng isang professional.

Andyan pa rin sila, kasi regulatory body  ang mga yan, sila ang nagdidisiplina, tinitingnan ang tamang performance ng ating mga professionals, pero hindi naman kailangan ang examination diba? Hindi naman yan ang tanging paraan na para malamang ang isang tao, kung handa nang i-practise ang kanyang profession,hindi naman examination hindi naman kailangang i-abolish ang PRC yung mga board of nursing, board of Engineering, hindi naman kailangan , nandiyan naman sila because they are the  regulatory body, ang sabi ko naman pag-aralan lang, ″ pahayag ni Secretary Bello .

Nanghihinayang si Labor Secretary Silvestre Bello III sa apat na taong ginugol ng isang nursing o law student para makatapos ng kanilang kurso subalit sa huli ay hindi papasa sa nursing board at bar examinations.

Ito ayon kay Bello ay kaya’t isinusulong niyang mapag-aralang buwagin na ang nursing board at bar exam.

Sinabi sa DWIZ ni Bello na sa mga nais maging abogado ay kailangan bunuin ang tig-apat na taong pre law course at law proper bago sumalang sa bar examinations.

Hindi rin naman aniya matatawaran ang magagaling na nursing at law schools na talagang sinasala ang kanilang mga estudyante.

Gayunman, inamin naman ni Bello na kailangang maamiyendahan ang batas at magkaroon ng basbas ang korte suprema bago tuluyang buwagin ang mga nasabing government examinations.

4 years ka diyan, aaral ka, daming examination graduate ka pumasa ka, graduate ka pagkatapos nag-board exam ka tapos hindi ka pumasa. Hindi ba nasayang yung pagod, gastos at pagsisikap mo ng apat na taon diba? Dahil lang sa isang examination? Hindi ba iyon, iyon ang sinabi ko pero hindi ko naman sinasabing dapat gawin , sabi ko dapat pag-aaralan, ″pahayag ni Bello.