Judith Estrada-Larino

Inila-lobby ni Maguindanao Congressman Esmael “Toto” Mangudadatu sa Malakanyang ang pagpapalawig ng Bangsamoro Transition Authority (BTA) hanggang 2025.

Ayon kay Mangudadatu, suportado ng maraming kapwa niya mambabatas ang pagpapalawig ng bta kaya’t umaapela sila sa Pangulong Rodrigo Duterte na gawin ito para sa kapayapaan.

Binigyang diin ni Mangudadatu na ang Bangsamoro Autonomous Region in Muslim Mindanao (BARMM) ay bunga aniya ng dugo, pawis at kayamanan ng mga Mujahideen.

Ang BARMM aniya ay para sa mga taong naninirahan sa Bangsamoro homeland na maipapamana sa susunod na henerasyon.

Susuportahan ng partido ng dating Pangulong Joseph Estrada ang presidentiable at vice presidentiable na isasabak ng Hugpong Ng Pagbabago(HNP) sa 2022 national elections.

Ibinunyag ito ni dating Senador Jinggoy Estrada matapos ihayag na muling nakipag-alyansa ang Partido ng Masang Pilipino (PMP) sa HNP na pinangungunahan ni Davao City Mayor Sara Duterte-Carpio.

Sinabi ni Jinggoy na sa katunayan ay walang isasabong sa national candidates ang pmp kaya’t lumalabas sa kanilang kasunduan na ang HNP ang pipili sa kanilang presidentiable at Vice Presidentiable.

Habang 2019 midterm elections nang dalhin ng HNP si Jinggoy bilang isa sa Senatorial bets nito bagamat natalo ito.

Umapela si Vaccine Czar Carlito Galvez, Jr. sa local officials na huwag gamitin para sa first dose ang mga bakunang nakalaan para sa second dose.

Sa gitna na rin ito ng kakulangan ng supply ng bakuna kaya’t ilang LGU ang pansamantalang itinigil ang kanilang pagbabakuna.

Ipinabatid ni Galvez na halos 12 milyon na ang nabakunahan sa bansa kung saan halos 3 milyon ang naturukan ng second dose at halos 9 milyon naman ang nabigyan ng first dose.

Inilabas na ng Independent International Commission of Investigation into Human Rights Violations in the Philippines (ICHRP) ang ikalawang report nito hinggil sa mga paglabag sa karapatang pantao sa ilalim ng Duterte administration.

Kasunod na rin ito ng unang bahagi ng report na inilabas ng grupo noong Marso kung saan inilatag ang anila’y lumalala pang sitwasyon ng patuloy na paglabag sa mga karapatang pantao sa Pilipinas.

Dahil dito, ipinaabot ni Peter Murphy, Chairperson ng Core Group ng Investigate PH ang panawagan sa  administrasyon na makipag tulungan sa imbestigasyon ng International Criminal Court (ICC) at panagutin ang Pilipinas kapag sumuway sa kautusan ng tribunal na imbestigasyon sa Drug War Campaign ng gobyerno.

Sa ikalawang report ng Investigate PH, sinuri nito ang human rights violations sa Pilipinas na anito’y kagagawan ng state agents dahil sa security policies ng Duterte Administration.

Pinagtuunan ni dating Australian Senator Lee Rhiannon ang presentation niya sa tinawag nilang War On Poor People na itinatago sa kampanya ng gobyerno na War On Drugs na tinagurian namang War On The Moral People ni Atty. Suzanne Adely, pangulo ng National Lawyers Guild ng Amerika sa paglalatag niya ng ebidensya hinggil dito.

Tila nagsagawa pa ng flashback si Rhiannon sa pagsisimula ng Drug War Campaign ng Pangulong Rodrigo Duterte simula nang mailuklok ito sa Malakanyang kung saan bahagi ng ebidensya ng grupo ang pagpatay sa mga biktima sa kanilang mga bahay, sa kalye at iba ay matapos dukutin.

Iginiit ni Rhiannon na panahon na para itigil ang aniya’y giant killing machine ng gobyerno ng Pilipinas.

Limitado na ang suplay ng bakuna kontra COVID-19 para sa first dose sa Metro Manila, ngayong araw na ito.

Sa Lungsod ng Maynila, bagamat libo-libo ang nabakunahan kahapon, Martes, tigil muna ang pagbabakuna para sa unang dose at tanging para sa second dose lamang ang naka-schedule ngayong araw na ito.

Sa Malabon, isinara muna ngayong araw na ito ang Mega Vaccination Center at itinigil ang walk-in sa mga vaccination center dahil pa rin sa limitadong suplay.

Una na ring nag anunsyo ng suspendidong first dose ng vaccination ang Makati, Muntinlupa, Paranaque, Valenzuela at Las Piñas.

Ayon sa mga LGU, wala pang dumarating na bakuna mula sa national government at naghihintay rin sa pagdating ng mga bakunang binili nila mismo.

Samantala, inaasahang mamayang gabi ay darating ang 170,000 doses ng Sputnik V vaccine gayundin ang mga bakunang gawa ng Astrazeneca at Sinovac ngayong weekend.

Naibigay na ng Toll Regulatory Board (TRB) sa operator ng skyway stage 3 ang toll operations permit at notice to start collecting.

Ito ayon kay TRB Spokesman Julius Corpuz ay kaya’t tuloy na ang paniningil ng toll fee sa skyway stage 3 simula sa Lunes, Hulyo 12.

Nangongolekta na po an gating inspector diyan sa skyway stage 3,kung natatandaan po ninyo ito’y binuksan pa noong katapusan ng Disyembre noong nakaraang taon at tayo naman po ay pinahintulutan at binigyan ng pagkakataong gamitin ito ng libre hanggang July 11 mga 6 ½ months rin po itong binigay na libre sa atin. Naibigay na po natin sa ating investor yung kanilang toll operation permit at notice to start  collection noong July 1 pa. Subalit hiniling po natin sa ating investor na kung pwede mag-conduct sila ng info campaign nang sa gayon hindi naman mabulaga itong ating motorista pagdating ng Lunes na maniningil na sila,″ wika ni Corpuz.

Ipinabatid sa DWIZ ni Corpuz na posibleng mapababa pa ang singil sa toll fee sa skyway stage 3 na nasa P264 para sa class 1 vehicles o mga kotse mula Buendia hanggang Balintawak.

Patuloy naman po ang pagsusuri, pag-aaral ng ating pamunuan ukol dito sa toll rate na ating inapproved for skyway stage 3. Kung magkakaroon po tayo ng isang magandang basehan na ito’y pwede pang pababain darating din tayo sa puntong iyan sa mga darating na panahon kung maari bang ibaba o palitan itong toll fees na ito, ″pahayag ni Corpuz

Nag-apply na ang Sinovac para amiyendahan ang Emergency Use Authorization (EUA) at magamit ang bakuna nito sa tatlo hanggang 17 taong gulang.

Ipinabatid ito ni FDA Director General Eric Domingo at posibleng ngayong buwan ay maglabas sila ng desisyon sa application ng EUA amendment ng Sinovac para ubrang maiturok ang kanilang COVID-19 vaccine sa 3 hanggang 17 years old.

Una nang inaprubahan ng FDA ang amendment ng Pfizer sa EUA nito para magamit ang COVID-19 vaccine nito sa mga kabataan mula dose anyos pataas.

Ipinabatid naman ng DOST na target din ng moderna na maamiyendahan ang EUA nito para magamit sa menor de edad ang kanilang COVID-19 vaccine.

Ikinababahala ng United Nations Childrens Fund (UNICEF) ang kalagayan ng mga batang apektado nang pag-aalburuto ng bulkang Taal.

Binigyang diin ng unicef na nahaharap sa peligro at posibleng pagkakaruon ng respiratory problems pati na rin ng water borne at vaccine preventable diseases ang mga batang nakatira sa danger zones at nasa evacuation centers.

Posible anilang mahawahan pa ng COVID-19 ang mga bata sa evacuation center kasama ang kanilang pamilya lalo pat inaasahang siksikan dito bukod pa sa limitado ang pasilidad sa personal hygiene at kawalan ng access sa personal protective equipment.

Sinabi pa ng UNICEF na maaaring ma-stress ang mga nasabing bata kayat kailangang isailalim sa psychosocial interventions ang mga ito.

Tiniyak ng UNICEF ang tulong sa Pilipinas para ma protektahan ang mga bata kasabay ang nakakasa nang emergency supplies sa mga apektadong lugar.