Jopel Pelenio

Haharangin ng Philippine Rural Electric Cooperatives Association o PhilRECA ang anumang hakbang na magpapataas ng presyo ng kuryente.

Sinabi ni Philreca Partylist Representative Presley De Jesus, hindi sang-ayon ang mga electric cooperatives sa anumang balakin ng DOE na bigyan ng permanenteng kontrata ang ilang power plants, gamitin man o hindi ang kanilang kuryente.

Siguradong lugi ang taumbayan ayon kay de Jesus dahil tuwing ‘summer’ lang naman nagkakaroon ng pagnipis ng supply at tuwing nagkakaroon ng mga ‘forced maintenance’ ang mga planta.

Ayon kay de Jesus, mas dapat na ma-amyendahan sa lalong madaling panahon ang epira law para makapagtayo ng sariling planta ang gobyerno na magagamit ng taumbayan sa oras na numipis ang supply ng kuryente sa Luzon at Visayas grid.

Mula kasi nang naisabatas ang Epira, tanging mga private investors lamang ang pinapayagan nitong makapagtayo ng mga planta na ibebenta sa gobyerno subalit dito rin nagkakaroon ng malawakang korupsiyon at hindi maampat na pagtaas ng presyo ng kuryente base sa idinidikta ng mga private investors.

Pinabulaanan ng National Grid Corporation of the Philippines o NGCP na nagwaldas ito ng pera para lamang sa mga entertainment at advertising gaya ng iginigiit ni Senator Risa Hontiveros.

Ayon sa NGCP, dumaan sa pagaaral ng energy regulatory commission ang kanilang mga sinisingil na transmission charges bago ito ipasa sa publiko. Nabatid na pinuna ni hontiveros ang umano’y higit sa P1 bilyong ginasta ng NGCP para lamang sa ‘entertainment, adverstising at PR’.

Sa katunayan ayon sa NGCP, matalinong ginasta ang nasabing pondo para sa pagkain ng mga linemen at iba pang staff nito sa pagsasaayos ng mga transmission facilities na pinabagsak ng mga hindi na mabilang na nagdaang bagyo.

Kungsaan ginamit din umano ito para sa transportation allowances at gasoline and mobilization allowances ng mga empleyado.

Hindi rin basta bastang advertising at PR campaign ang ginawa diumano ng NGCP para bigyang aral at babala ang publiko mula mga pagtatayo ng mga istruktura sa ilalim ng mga high-voltage wires, pagsusunog sa ilalim nito at pagbabalewala sa mga paalalang hindi dapat patubuan ng mga matatayog na puno ang ilalim ng mga transmission lines.

Kabilang na ang pagsasagawa ng mga forum para maging aware ang publiko at higit sa lahat ang pagtulong sa mga nasasalanta ng bagyo.

Handa ang Presidential Anti-Corruption Commission (PACC) na imbestigahan ang anumang alegasyon laban sa mga energy officials na isinasangkot ni Senator Manny Pacquiao.

Ayon kay PACC Chairman Greco Belgica, welcome ang sinuman na magbigay sa kanila ng mga ebidensya kung may nalalaman sila sa umano’y sabwatan ng Department Of Energy at ng pribadong Independent Electricity Market Operators of the Philippines o IEMOP.

Matatandaang kabilang ang doe sa mga binanggit ni sen.pacquiao sa mga ahensya ng gobyernong batbat diumano ng korupsiyon bukod sa DOH, DSWD at DENR.

Partikular na binanggit ng fighting Senator ang umano’y maanomalyang pagtatayo ng IEMOP base sa isang DOE circular no.2018-01-002 na naglilipat ng function ng wholesale electricity spot market sa IEMOP mula sa Philippine Electricity Market Corporation o PEMC.

Ayon sa ilang energy industry players, ginawa ang ganitong organisasyon para umano’y mapaboran ang isang malaking power producer na dating pinaglingkuran ni Energy Sec. Alfonso Cusi.

Libo-libo umanong bonafide at original grassroots members ng PDP-laban ang kumukondena sa mga personalidad at party officials na pasimuno ng sinasabing national assembly ng kanilang partido sa Clark Pampanga.

Base sa pahayag ng PDP-laban faction nina Sen. Manny Pacquiao at Sen. Koko Pimentel, sinabi nilang ilegal at hindi sanctioned ng general membership ng PDP-laban ang pagtitipon kahapon.

Ayon kay Ron Munsayac Executive Director ng PDP-laban habang isinasagawa ang pagpupulong sa Clark Pampanga, kanila naman itong sinabayan ng sarilig zoom assembly na dinaluhan umano ng nasa 100 PDP-laban chapters sa buong kapuluan.

Nabatid na nagpadala umano ng mensahe si Pimentel para sa mga myembro ng partido kungsaan nanawagan ito na manatiling nagkakaisa sa kabila ng mga pagsubok na kinakaharap ng PDP-laban sa likod ng liderato ni Pacquiao.

Pahayag ni Pimentel, sa ngayon ang importante aniya’y manatili silang malakas at patuloy na magtiwala sa liderato ni pacquiao at hindi dapat na mag alala dahil tunay aniyang ipinaglalaban nito ay ang  boses ng kanilang mga chapter sa buong bansa.

Ipinakita naman ng PDP Laban Pacquiao -Pimentel faction ang litrato ng mga myembro ng partido sa iba’t ibang bahagi ng bansa kungsaan makikita na may dala silang streamers na nagpapahayag ng kanilang  pagsuporta sa boxing Senator.

Nagdulot ng pagbaha ang malakas na pag-ulang naranasan sa ilang lugar sa NCR, dulot ng southwest monsoon o habagat.

Dahil sa gutter deep na baha, marami sa mga motorista ang nahirapang dumaan sa kahabaan ng España Boulevard.

Hindi naman alintana ng mga bata ang paglangoy sa kulay putik na tubig baha sa kasagsagan ng malakas na pagbuhos ng ulan.

Ilan naman sa mga residente ng Sampaloc, Maynila ang kanya-kanyang kuha ng kanilang mga gamit na inanod ng baha.

Habang napilitan namang tumigil pansamantala ang ilang mga sasakyan sa bahagi ng taft avenue dahil sa gutter-high na pagtaas ng tubig.

Samantala, dahil sa matinding sama ng panahon, nakaranas ng halos zero visibility ang mga lugar ng Buendia hanggang osmeña highway sa makati City, Commonwealth Avenue sa Quezon City, at sa lunsod ng Caloocan.

Nagpulong kagabi ang Metro Manila Mayors upang talakayin ang kanilang preparasyon laban sa mas nakahahawang COVID-19 delta variant.

Kabilang sa mga pinag-usapan ng mga Alkalde sa National Capital Region o NCR ang mas mahigpit na border control sa Metro Manila; mas agresibong contact tracing, at ang agarang pagpapatupad ng granular lockdowns sakaling kailanganin.

Ayon kay MMDA Chairman Benhur Abalos, kasama din sa kanilang natalakay ang mga precautionary measures na maaring ipatupad sa buong kamaynilaan.

Giit ni Abalos, kahit kaunti lamang ang kaso ng Delta variant at bahagya pang maganda ang hospital care dito sa Metro Manila, hindi ito nangangahulugan na dapat nang magpakakampante ang mga lokal na pamahalaan sa NCR.

Sinabi naman ni PNP Chief Police Gen. Guillermo Eleazar, na ikinasa na nila ang mas pinaigting na monitoring at quarantine checkpoints, kasabay ng patuloy na pakikipag-ugnayan sa IATF at National Task Force against COVID-19 upang malaman ang mga dapat pang palakasin para mapigilan ang pagkalat ng delta variant sa Metro Manila.

Ilalaan bilang 2^nd shot ang malaking bahagi ng mahigit 2m doses ng AstraZeneca vaccine na dumating sa bansa mula sa Covax Facility.

Ayon kay National Task Force against COVID-19 Chief Implementer Sec. Carlito Galvez,  aabot sa 1.5-M doses ng AstraZeneca ang itatabi ng pamahalaan para magamit na ikalawang shot ng mga naturukan na ng unang bakuna noong Mayo at Hunyo.

Habang ang 500,000 doses naman aniya ay ipamamahagi sa mga rehiyon na may malaking populsayon at nasa priority groups na A2 at A3.

Sinabi ni Galvez, na ang vaccine supply na ito mula sa Covax ay gagamitin para sa mga healthcare workers at kanilang mga pamilya families na nasa A1 category, senior citizens na nasa A2, at mga  persons with co-morbidities o kabilang sa A3 category group.

Dumating na sa bansa ang karagdagang 37,800 doses ng Sputnik V vaccine na mula sa bansang Russia.

Lulan ang mga bakunang ito ng Korean Air Flight -E623 na lumapag sa NAIA terminal 1 dakong alas-9:42 kagabi.

Magugunitang, unang nai-deliver sa bansa ang first batch ng Sputnik V na pumapalo 15,000 doses noong Mayo a-1, na sinundan ng  50,000 doses  noong Mayo 30, at 100,000 vaccines naman noong Hunyo 11.

Kumpiyansa ang Malakanyang na sa gitna ng banta ng COVID-19 Delta variant at iba pang variants, magiging maganda parin ang Pasko ng mga Pilipino ngayong 2021 kung ikukumpara sa nagdaang taon.

Ayon kay Presidential Spokesperson Atty. Harry Roque, kung pagabasehan ang datus, nasa mahigit 10-million mark na ang bansa pagdating sa vaccination program ng pamahalaan.

Sa katunayan ani Roque, kontrolado na ng gobyerno ang COVID-19 cases sa metro manila plus 8 na itinuturing na kuta ng COVID-19.

Tiwala ani Roque ang pamahalaan na sa pagdating pa ng maraming suplay ng COVID-19 vaccine, mas marami pang mabibigyan ng proteksiyon at tiyak rin aniya na mapipigilan na ang pagkalat ng virus na magbibigay daan upang magkaroon ng maganda o mas masayang pasko ang mga Pilipino.