Jopel Pelenio

Hinimok ng National Telecommunications Commission (NTC) ang publiko na ireport sa kanilang ahensya ang mga natatanggap na scam text messages.

Ayon sa NTC, maaring isumite o ipadala sa kanilang email account na kontratextscam@ntc.gov.ph ang mga kinakailangang dokumento gaya ng kumpletong pangalan ng complainant,  address, email, contact number, ang inirereklamong cellphone number, screenshot ng text scam message kasama ang mobile number ng sender, at ang photo copy ng kahit na anong government-issued ids.

Giit ng ahensya, sisiguruhin nilang magiging confidential ang personal data ng sinumang maghahain ng reklamo sa kanilang tanggapan alinsunod sa Data Privacy Act.

Pwede rin anilang i-upload sa NTC website ang mga kinakailangang katibayan sa pamamagitan ng pagfill-up o pagpirma sa text scam complaint form.

Pumalo na sa mahigit isang bilyong piso ang naipamahaging cash assistace ng Department of Social Welfare and Development (DSWD) sa mga mahihirap na estudyante sa bansa.

Ayon sa DSWD, umaabot na sa kabuang P1, 033, 610 800 ang educational assistance sa mga indigent learners mula noong August 20 hanggang kahapon September 17, 2022.

Tinatayang nasa 414,482 students ang nabigyan ng ayudang ito na kinabibilangan ng 136,349 College students, 58,502 Senior High School, 92,856 Junior High School, at 126,775 Elementary students.

Matatandaan na nitong nakalipas na Setyembre a-10, inanunsyo ng DSWD na itinigil na nila ang online registration para sa educational assistance program para sa mga kapus palad na mag-aaral bunsod narin ng mataas na bilang ng mga aplikasyon at limitadong pondo.

Itinalaga ni Pang. Ferdinand Marcos Jr., si Atty. Victor Rodriguez bilang Presidential Chief of Staff (COS).

Inanunsyo ang bagong posisyon ni Atty. Rodriguez matapos ang kanyang pagbaba sa pwesto.

Pahayag ng newly installed Chief of Staff, maayos syang nagpaalam kay Pang. Marcos bago tuluyang nilisan ang posisyon.

Ayon kay Atty. Rodriguez, isang prebilihiyo ang mapagsilbihan ang bayan lalo na’t hindi lahat nabibigyan ng ganitong pagkakataon.

Pinasalamatan naman ni Atty. Rodriguez si Pang. Marcos sa patuloy na pagtitiwala sa kanya at sa ibinigay na pang-unawa sa kanyang naging desisyon.

Gayunman, tuloy-tuloy parin aniya siyang magsisilbi sa bayan at sa mga Pilipino, makaraang  maitalaga bilang bagong Presidential Chief of Staff ni Pang. Marcos.

Hinihinalang biktima ng human trafficking ang 43 dayuhan na nasagip ng Department of Interior and Local Government (DILG) makaraang ipasara ang isang Philippine Offshore Gaming Operators (POGO) establishment sa Pampanga.

Ayon kay DILG secretary Benhur Abalos, kasama nila ang Philippine National Police Anti-Kidnapping Group nang salakayin at permanenteng ipasara ang Lucky 99 Outsourcing Inc., na matatagpuan sa Fil-Am friendship Hi-way, Angeles City, Pampanga.

Pahayag ng Kalihim, nagresulta ang raid na ito sa pagkakasagip sa mga foreign nationals na natagpuan sa loob ng establiyemento.

Babala ni Abalos, tuloy-tuloy ang kanilang pagtugis sa mga indibidwal na sangkot sa mga kaparehong iligal na aktibidad na bahagi ng pinaigting na kampanya ng pamahalaan laban sa mga pogo na dawit sa human trafficking.

Makikipag-ugnayan din aniya ang dilg sa Philippine Amusement and Gaming Corporation (PAGCOR) at Securities and Exchange Commission (SEC) upang mas mapalalim pa ang imbestigasyon sa mga ganitong kaso o problemang kinakaharap ng bansa.

Nakapagtala ang Department of Health ng 2,275 new COVID-19 infections, dahilan upang umabot na sa 3,918,329 ang kaso sa buong bansa.

Ayon  sa DOH, bumaba ang bilang na ito mula sa 2,619 infections nitong nakalipas na Biyernes at ikatlong sunod na araw na mas mababa sa 3K ang naitalang kaso ng ahensya.

Sa datos ng Health Department, nagkaroon din ng pagbaba  ang active infections ng bansa, na nasa 26,271 na lamang, mula sa dating 26,363 cases.

Nakuha naman ng National Capital Region ang highest number of cases sa nakalipas na dalawang linggo, matapos makapagtala ng 10,073 infections, na sinundan ng CALABARZON- 3,666, Central Luzon -2,185, Davao Region – 1,189, at Western Visayas – 957.

Umakyat sa 3,829,544, ang mga nakarekober habang umabot sa 62,514 ang fatality cases.

Nakipag-usap at nakipagkamay si King Charles III ng Britain sa mga nakapilang mga tao na nais magbigay galang yumaong si Queen Elizabeth II, na nakahimlay sa Palace of Westminster, sa London.

Kasama ni King Charles III na humarap sa publiko ang anak na si Prince William.

Libu-libong tao ang pumila at naghintay sa kanilang pagkakataon na makita sa huling pagkakataon si Queen Elizabeth.

Karamihan sa mga nagtungo sa Westminster Hall ang magdamag na naghintay para lamag makita ang yumaong reyna ng United Kingdom.