Nalubog sa baha ang ilang lugar sa Metro Manila dahil sa naranasang mga pag-ulan.
Halos mag zero visibility kahapon sa bahagi ng Commonwealth Avenue, Quezon City bunsod ng matinding sama ng panahon.
Nakaranas naman ng pagbaha sa bahagi ng Fourth Estate Subdivision, Dr. A. Santos Avenue-Sucat Road, Paranaque.
Binaha rin ang mga area ng EVACOM-Gatchalian Avenue, Valley 1, Doña Soledad, Evacom at SM Sucat.
Agad namang humupa ang mga pagbaha nang tumila ang ulan.
Sang-ayon si Department of Transportation (DOTr) secretary Jaime Bautista na panatilihin ang pagsusuot ng facemask sa mga pampublikong transportasyon upang masiguro ang kaligtasan ng mga commuter laban sa Covid-19.
Ginawa ni Bautista ang pahayag matapos sabihin ng Department of Health (DOH), na dapat paring pagsuotin ng facemask ang mga mananakay ng public transportation kasunod narin ng mga isinusulong na hakbang para gawin nang boluntaryo ang mask wearing sa mga open spaces.
Ayon sa DOTr official, mananatili parin ang istriktong implementasyon ng mga health and safety protocols sa mga pampublikong sasakyan sa buong bansa sa ilalim ng new normal.
Kabilang aniya sa mga guidelines na patuloy na ipatutupad ang no talking or making phone calls; no eating; keeping public utility vehicles well ventilated; frequent disinfection; pagbabawal sa mga pasahero na may Covid-19 symptoms na makasakay sa anumang public transportation at mahigpit na pagtalima sa physical distancing.
Giit ni Bautista, nananatili parin ang virus kayat kailangan parin na maging maingat lalo na sa mga public areas, hanggang sa dumating ang araw na tuluyan nang mapagtagumpayan ng bansa ang laban kontra Covid-19.
Tiklo sa ikinasang operasyon ng mga otoridad ang limang South Korean na miyembro umano ng sindikato na gumagamit ng text scam para makapanloko ng kanilang mga kababayan.
Base sa ulat, aabot na sa mahigit P1-B ang nakuha ng mga suspek mula sa kanilang mga biktima.
Hindi na nakapalag pa ang limang South Korean National nang arestuhin sa isang Subdivision sa Parañaque City ng pinagsanib na pwersa ng Bureau of Immigration-Fugitive Search Unit, Philippine National Police Criminal Investigation and Detection Group at South Korean Police.
Sa impormasyon ng BI-FSU, sa Pilipinas ginagawa ng Korean criminal syndicate ang kanilang operasyon at nagpapadala ng text scam na may kasamang link sa kanilang mga kapwa Koreano.
Kapag pinindot umano ang link, maari na itong makapag install ng malware na syang dahilan upang mamonitor ng mga scammer ang mga activity ng cellphone ng mga biktima.
Masusi namang pinag-aaralan ng mga otoridad ang kasong ito upang malaman kung may mga nabiktima nang Pilipino ang mga suspek.
Nakapagtala ang Department of Health (DOH) ng 3,165 new Covid-19 cases, dahilan upang umakyat na sa 3,904,133 ang kabuuang kaso sa buong bansa.
Habang tumaas naman sa 26,074 ang aktibong kasong naitala ng DOH.
Pumalo naman sa 8,335 ang Covid-19 cases sa NCR sa nakalipas na dalawang linggo, na sinundan ng CALABARZON na mayroong 3,533, Central Luzon – 2,254, Western Visayas – 1,154, at Davao Region – 1,004.
Samantala, sumirit sa 3,815,771 ang recovery tally nationwide makaraang madagdagan ito ng 1,287 na mga bagong gumaling.
Nakapagtala naman ang DOH ng 39 new fatalities kayat umabot na sa 62,288 ang bilang ng mga nasawi dahil sa virus.
Bago pa isilang, labis nang pagmamahal ang natatanggap ng unang baby nina athlete Melissa Gohing at aktor na si Rocco Nacino.
Makikita ito sa dalawang Instagram post ng aktor hinggil sa naganap na dalawang baby showers na isinagawa sa magkahiwalay na lugar.
Present sa Part 1 ng baby shower ang respective families ng mag-asawa at ang Q Team na ginanap sa Newport City.
Sunod naman itong isinagawa sa Illo’s home, Greenhills na syang paboritong lugar nina Rocco at Melissa.
Matatandaan na noong Hunyo, una nilang inanunsyo na isang baby boy ang nakatakdang isilang ni Melissa.
Taong 2020 naman nang maging engaged sina Nacino at Gohing, at ikinasal noong January 2021.
Pinagpaplanuhan na ng Philippine Basketball Association (PBA) na gawin ang ilan sa kanilang mga laro sa PhilSports Arena, na isa sa mga matagal nang venue na ginagamit ng liga noong mid-80s at early 90s.
Ayon kay Commissioner Willie Marcial, nais nilang isama na sa kanilang regular game rotation ang PhilSport Arena para sa nalalapit na Commissioner’s Cup.
Nakipagkita na si Marcial kay former PBA Commissioner at bagong Philippine Sports Commission (PSC) chairman Noli Eala upang talakayin ang plano ng liga na gamitin ang government-owned facility.
Pahayag ng PBA Commissioner, maganda ang resulta ng kanilang pakikipagpulong kay Chairman Eala dahil sumang-ayon ito sa kanilang mga napag-usapang kasunduan.
Present din si Deputy Commissioner Eric Castro sa naganap na meeting at courtesy call kay Eala nitong nakalipas na Biyernes.
Nakatakdang magsimula ang PBA Commissioner’s Cup sa darating na September 21, 2022, araw ng Miyerkules.
Masusing minomonitor ng Bataan Provincial Disaster Risk Reduction and Management Office (PDRRMO) ang kondisyon sa kanilang lalawigan dahil sa naranasang sama ng panahon.
Ito ang inihayag ng Bataan PDRRMO kasunod ng naranasang mga pagbaha sa ibat ibang lugar doon kasunod ng pananalasa ni Typhoon Henry.
Kabilang sa mga lugar na nalubog sa baha ang Balanga, Pilar, Orion, Limay, at Mariveles, Bataan na nakaranas ng zero visibility dulot ng malalakas na pagbuhos ng ulan.
Karamihan naman sa mga binahang residente doon ang nagsabing hindi na bago sa kanila ang ganitong sitwasyon dahil kahit wala umanong bagyo, basta’t bumuhos lamang ang may kalakasang ulan, tiyak na agad nang babahain ang kanilang mga lugar.
Nakaranas din ng mga pagbaha sa mga area ng La Trinidad, Benguet at Metro Manila dahil kay Bagyong Henry.
Pumalo na sa 3,889,160 ang kabuuang kaso ng COVID-19 sa bansa matapos na makapagtala ang Department of Health ng 2,812 new COVID-19 infections.
Bumaba naman sa 23,571 ang active cases mula sa 23,703 nitong nakaraang Biyernes.
Naitala ng National Capital Region ang pinakamataas na bilang ng mga bagong kaso ng COVID-19 sa nakalipas na dalawang linggo na umabot sa 9,900, sinundan ng CALABARZON na mayroong 4,774, Central Luzon – 3,227, Western Visayas – 1,636 at Davao Region – 1,482.
Umakyat naman sa 3,803,627, ang mga gumaling mula sa virus habang nasa 61,962 naman ang naitalang new fatalities.
Idinagdag na rin sa lesson plans ng mga guro sa Estados Unidos ang pagsasagawa ng Mental health check-in para sa kanilang mga estudyante ngayong nagbalik narin sila sa full face to face classes.
Layon ng hakbang na ito na malaman ang emosyon na nararamdaman ng mga estudyante kasunod ng naranasang health crisis na dulot ng COVID-19 pandemic.
Ayon sa Psychiatrist-in-chief ng Childrens Hospital of Philadelphia at president-elect ng American Academy of Child and Adolescent Psychiatry na si Dr. Tami Benton, labis ang kanyang paghanga sa proactive position o inisyatibong ito ng mga eskwelahan sa Estados Unidos.
Marami na aniya sa mga paaralan doon ang gumagawa ng kani-kanilang paraan upang ma-assess ang social-emotional development status ng mga bata.
Malaking bagay ani Benton ang ginagawang mental health check-in ng mga eskwelahan lalo na’t mahigit dalawang taong naantala ang pasok sa mga paaralan, at nalagay din sa economic stress ang lahat ng pamilya, na tiyak aniyang may malaking epekto sa kaisipan ng mga kabataan sa Amerika.
Umuugong ngayon sa National Basketball Association (NBA) ang posibleng pag-trade ng Utah Jazz kay Filipino-American Guard Jordan Clarkson.
Kasunod ito ng ginawang pag-anunsyo ng NBA na tuluyan nang nai-trade ng Jazz ang kanilang 3-time All-Star guard na si Donovan Mitchell patungo sa Cleveland Cavaliers, kapalit ni NBA guard Collin Sexton.
Dahil dito, naging laman ng usapan ng mga Sport Analyst sa Amerika ang posibilidad na si Clarkson ang sunod na mapupunta sa ibang koponan.
Maliban sa NBA 6th Man of the Year na si Clarkson, maugong din ang balita na nasa trading list din ng Utah Jazz ang dalawa pa nitong player na sina Mike Conley at Bojan Bogdanovic.
Base sa ulat, maraming NBA teams ang interesado kay Clarkson partikular na ang Milwaukee Bucks at Los Angeles Lakers.