Jenn Patrolla

Umabot sa 1,600 katao sa Metro Manila ang naparusahan dahil sa non-stop na pag-videoke.

Ayon kay National Capital Region Police Office Director Brigadier General Anthony Aberin, Maliban sa pagvi-videoke nang lampas sa itinakdang oras, lumabag din ang ilan pang nahuli dahil sa pag-inom ng alak at paninigarilyo sa pampublikong lugar; paglalakad sa kalsada nang walang damit pang-itaas; at ilegal na pagtatapon ng basura.

Nabatid na labag sa ordinansa ang paggamit ng magdamagang videoke kung saan maaaring makulong at patawan ng multa.

Nanatili ng mahigit 10 taon sa Pilipinas ang naarestong pinaghihinalaang Chinese spy.

Ayon kay Immigration Commisioner Joel Anthony Viado, unang pumasok sa bansa ang dayuhang si Deng Yuangin noong 2013 at nabigyan ng residence matapos makapag-asawa ng isang 36-anyos na Pinay sa Pilipinas.

Sinisimulan na anya ang proseso ng deportation pero hindi pa ito ipatutupad habang inaasahang pang magkakaroon ng mga kaso laban sa naturang dayuhan.

Tiniyak naman ng B.I. na ginagawa na ang lahat ng hakbang para protektahan ang pambansang seguridad alinsunod sa kautusan ni Pangulong Ferdinand Marcos Jr.

Muling iginiit ni House Committee on Basic Education and Culture Chairman at Pasig City Representative Roman Romulo na kailangan nang repasuhin ang hindi epektibong K-12 curriculum.

Sa panayam ng DWIZ, sinabi ni Congressman Romulo, na maaari nang pumili sa dalawang education pathways ang mga mag-aaral na magtatapos ng grade 10.

Bukod dito, maaari ring tumuloy sa kolehiyo ang isang grade 10 student nang hindi na daraan sa grades 11 at 12 kapag naipasa ang honors exam.

Una nang inaprubahan sa ikalawang pagbasa ng Kamara ang Education Pathways Act upang maibsan ang pasanin ng mga mag-aaral gayundin ang mga magulang.

Iginiit ni House Committee on Basic Education and Culture Chairman at Pasig City Representative Roman Romulo na kailangang dumaan sa tamang proseso ang comprehensive sexuality education.

Sa panayam ng DWIZ, kwinestiyon ni Congressman Romulo ang Department of Education kung kinuha ba nito ang consent ng mga magulang para ituro ang nakapaloob sa CSE at kung nagkaroon ito ng konsultasyon sa mga guro.

Kaugnay nito, tiniyak ng Kongresista na hindi titigil ang kongreso hangga’t hindi nagagawa ang tamang nilalaman ng CSE para sa mga mag-aaral.

Magsasagawa naman ng committee hearing ang kamara katuwang ang DEPED, sa Lunes upang malaman kung tinutugunan ba ito ng kagawaran.

Isinusulong sa Kamara ang Death Penalty for Corruption Act o panukalang magpapataw ng parusang kamatayan sa pamamagitan ng “Firing squad” sa mga opisyal ng pamahalaan na mahaharap sa kasong graft and corruption; malversation of public; at plunder.

Sa inihaing House Bill 11211 ni Zamboanga 1st District Representative Khymer Adan Olaso, dapat matiyak ang due process, proteksiyon, at ang mga hatol ay maaaring i-akyat sa Korte Suprema para isailalim sa pagrerepaso habang papayagan ang mga akusado na gumamit ng anumang legal remedies.

Sakop ng panukala ang lahat ng public officials mula sa pagkapangulo ng bansa hanggang sa mga opisyal ng bawat barangay sa mga lungsod.

Gayundin ang iba pang mga nasa ehekutibo, lehislatura, at hudikatura; maging ang mga nasa constitutional commissions; GOCCs; mga miyembro ng Armed Forces of the Philippines at philippine National Police.

Ayon sa Mambabatas, nananatili ang kurapsiyon sa bansa na isa sa matinding banta sa social, economic, at political development ng Pilipinas. – mula sa ulat ni Geli Mendez (Patrol 30)

Pinayuhan ng isang veteran Election Lawyer ang Commission on Election kaugnay sa patuloy na paglalabas ng temporary restraining order ng Korte Suprema sa mga diniskwalipikang kandidato.

Sa panayam ng DWIZ, binigyan-diin ni Atty. Romulo Macalintal na dapat isama na lamang ng COMELEC sa balota ang pangalan ng mga disqualified candidates na inapela ang naging desisyon ng poll body.

Sa ganitong paraan anya ay maiiwasan maantala ang preperasyon ng comelec sa halalan tulad ng pag-iimprenta ng mga balota.

Kaugnay nito, ipinunto pa ni Atty. Macalintal na hindi maaaring tanggalin sa balota ang pangalan ng disqualified candidate na tumatakbo sa ilalim ng isang political party, dahil anya may karapatan ang partido na palitan ito ng ibang kandidato.

US President Trump, magdedeklara ng national emergency

Magdedeklara ng national emergency at magpapadala ng mga armadong tropa sa Southern border si US President Donald Trump.

Isa ito sa mga highlight at prayoridad sa talumpati ni US President Trump.

Nilagdaan na rin US President Trump ang halos 100 executive orders, kabilang ang 10 nakatuon sa border security at immigration, na kaniyang pangunahing prayoridad.

Sisikapin din ni Trump na wakasan ang tinatawag na birthright citizenship para sa mga batang ipinanganak sa us, na ang mga magulang ay walang legal status, isang hakbang na pinaniniwalaang labag sa konstitusyon ng bansa.

Si Trump ay nakapanumpa na bilang ika-47 na pangulo ng Estados Unidos.

Bukod dito, inanunsyo ng Pangulo na dalawang kasarian lang ang kikilalanin ng kanyang administrasyon sa kabila ng patuloy na pakikipaglaban ng LGBTQ+ community para sa kanilang mga karapatan.

Tinitingnan ng Malakanyang ang posibilidad na mapalawig pa ang termino ni Philippine National Police Chief, General Rommel Marbil hanggang matapos ang eleksyon sa Mayo ngayong taon.

Ito ang sinabi ni Pangulong Ferdinand Marcos Jr. sa harap ng mga mungkahi at argumento hinggil dito.

Binigyang-diin ni Pangulong Marcos ang malakas na argumento na nagsasabing hindi makabubuti sa katatagan ng bansa kung papalitan sa kalagitnan ng panahon ng kampanya at sa nalalapit na eleksyon ang pinuno ng PNP.

Idinagdag pa ng Pangulo, na pinag-aaralan nila ang argumentong ito na nakikita niyang malakas na dahilan para panatilihin muna si General Marbil sa puwesto hangga’t hindi natatapos ang eleksyon.

Si Marbil ay nakatakdang magretiro sa pebrero ngayong taon. - Mula sa ulat ni Gilbert Perdez (Patrol 13)

Walang nakikitang problema si Pangulong Ferdinand Marcos Jr. sa rekomendasyon ng Metropolitan Manila Development Authority na gawing alas syete ng umaga hanggang alas kwatro ng hapon ang pasok ng mga ahensya ng gobyerno.

Sinabi ng Pangulo, na pinag-aaralan nila ito kung maaari itong gawin.

Gayunpaman, binigyang-diin ng Pangulo na hindi sapat na tanging ang mga ahensya lamang ng pamahalaan manggaling ang mungkahing ito.

Kailangan din aniyang kuhanin ang punto de vista rito o opinyon ng publiko o mga pasahero na siyang maapektuhan ng panukala.

Una nang itinutulak ng MMDA, na ia-adjust ang pasok sa trabaho ng mga nasa gobyerno, mula alas-siyete ng umaga hanggang alas-kuwatro ng hapon, upang hindi magkasabay-sabay ang pasok ng lahat at maiwasan ang matinding trapiko sa Metro Manila. - Mula sa ulat ni Gilbert Perdez (Patrol 13)