Jenn Patrolla

Pinapayagan ng Impeachment Court ang posibilidad na mag-abogado sa sarili si Vice President Sara Duterte.

Ito mismo ang kinumpirma ni Senate President Chiz Escudero sa oras na umpisahan na ang trial o paglilitis sa impeachment laban sa pangalawang pangulo.

Ayon sa Senate President, maging ama nitong si dating Pangulong Rodrigo Duterte ay maaaring maging abugado, gayundin ang kanyang asawa dahil isa rin itong lawyer.

Ipinaliwanag ni Senador Escudero, na walang legal constraints o batas ang nasasabing bawal ito.

Hinikayat naman ni Senate President Escudero ang mga Senador at Kongresista na pag-aralan ang mga kaso at paghandaan ang impeachment trial.

Iginiit ni Political Analyst Professor Froilan Calilung na minadali ng mga mambabatas ang mga dokumento o proseso para sa pagpapatalsik kay Vice President Sara Duterte.

Sa panayam ng DWIZ, sinabi ni Professor Calilung, na dapat maging maingat ang mga mambabatas sa proseso sa impeachment complaint laban kay VP Sara lalo na’t ito ang kauna-unang bise na in-impeach ng Kamara.

Nakikita rin ni Prof. Calilung na may paglabag sa konstitusyon ang ginawa ng mga mambabatas.

Target ng Department of the Interior and Local Government na gawing “Shared lane” ang bicycle lane sa mga motor rider.

Ayon kay Local Government Secretary Jonvic Remulla, layon nito na maiwasan ang mga kinasasangkutang aksidente ng mga nagmomotorsiklo na dumaraan sa edsa lalo na’t tuwing rush hour.

Maliban dito, tinitignan na rin anyang iakyat sa anim ang mga ilalagay na tulay sa Ilog Pasig upang palakasin ang inter-connectivity at makapagbigay ng alternatibong daan sa mga motorista.

Doble kayod na rin ang gobyerno sa pag-aaral sa rehabilitasyon ng Magallanes at Guadalupe Interchange lalo na’t long overdue na ang naturang proyekto.

Bumaba ang bilang ng mga Pilipinong walang trabaho noong nakaraang taon.

Batay sa datos ng Philippine Statistics Authority, umabot sa 1.63 milyong ang unemployment rate noong December 2024, na mas mataas ito kumpara sa 1.66 milyon o 3.2% na naitala noong Nobyembre.

Bahagya namang tumaas ang employment rate sa bansa sa 96.9% o 50.19 milyong Pilipino ang may trabaho.

Tinutulan ng Department of Transportation ang hirit ng Metropolitan Manila Development Authority na tanggalin ang Edsa Busway para mabawasan ang mga sasakyang bumabiyahe sa nabanggit na kalsada.

Sa panayam ng DWIZ, sinabi ni Transportation Executive Director Joni Gesmundo, na pinag-aaralan na nila kung paano maituturn-over ng kagawaran ang Edsa sa private sektor para mas lalo pa itong mapaganda.

Paliwanag ng DOTR Official na naging epektibo ang Edsa Busway dahil maraming mga lalawigan ang gumaya sa naturang proyekto.

Pinalagan ng poll watchdog ang panukala ng Commission on Elections na ipagbawal ang lahat ng uri ng ayuda o anumang tulong, sampung araw bago ang eleksyon.

Ayon kay Kontra Daya Convenor Danilo Arao, isa sa kanilang tinitignang problema ay dumaraming pamilya o pilipino ang nangangailangan ng tulong sa oras na may krisis.

Hindi dapat anya palawakin ang pagbabawal sa ayuda at sa halip ay dapat palakasin ng COMELEC ang kanilang monitoring mechanisms.

Una nang ipinagbawal ng COMELEC ang pamamahagi ng Assistance to Individuals in Crisis Situation (AICS), 10 araw bago ang botohan.

Kumpiyansa ang Department of Health na malaki ang maiaambag sa healthcare system sa bansa ang bagong talagang Pangulo at Chief Executive Officer ng PhilHealth na si Doctor Edwin Mercado.

Ayon kay Health Secretary Teodoro Herbosa, hindi matatawaran ang karanasan at kakayahan ni Doctor Mercado lalo na’t nagtapos ito ng medisina sa University of the Philippines, nagkaroon ng masters degree sa Harvard University, nagtrabaho sa North Carolina, at isang magaling na Orthopedic Surgeon.

Kasabay nito, pinasalamatan naman ng kalihim si dating PhilHealth President at ceo Emmanuel Ledesma Junior sa inilaan nitong panahon sa paglilingkod at pagpapalawak ng mga programa ng healthcare system sa bansa sa ilalim ng marcos administration.

Pumalo sa mahigit 10,000 cybercrime complaints ang naitala ng Cybercrime Investigation and Coordinating Center noong nakaraang taon.

Mas mataas ito ng tatlong beses kumpara noong 2023.

Batay sa complaints statistics ng CICC, umabot sa 3,000 kaso ang kabuuang complaints ang kanilang natanggap.

Dahil dito, umabot sa 198 million pesos ang kabuuang nawalang pera dahil sa scam noong nakalipas na taon.

Paliwanag ng ahensya, hindi alam ng publiko na sila ay naii-scam na at walang ding ideya kung saan isusumbong ang naturang insidente.

Ipinareregulate ng Department of Information and Communications Technology ang artificial intelligence sa bansa.

Ayon kay DICT Secretary Ivan John Uy, mahalaga na magkaroon ng balanse ang ai sa pagitan ng innovation at governance.

Binalaan din ng kagawaran ang paghihigpit ng paggamit ng AI ay isang dis-advantage sa technological advancement ng bansa.

Idinagdag pa ng Kalihim, na marapat na isunod ang batas sa ipinapatupad na global best practices para magamit ng tama ang AI.

Nanindigan si House Quad Committee Co-Chairman at Laguna Representative Dan Fernandez na walang nilabag ang komite sa imbestigasyon nito sa iligal na operasyon ng Philippine Offshore Gaming Operator o POGO.

Sa panayam ng DWIZ, sinabi ng Kongresista, na pinepersonal lamang siya ng legal counsel ni Cassandra Li Ong na si Attorney Ferdinand Topacio, lalo na’t siya lamang ang inireklamo.

Handa namang harapin ni Co-Chairman Fernandez ang inihaing ethics complaint.

Sinagot naman ng mambabatas ang paratang ni Atty. Topacio na gumagamit lamang siya ng google tuwing may isinasagawang pagdinig.