Hya Ludivico

Tutol ang nasa 50% ng mga Pilipino sa paghain ng Kamara ng impeachment case laban kay Vice Pres. Sara Duterte.

Batay sa survey ng Pulse Asia Research, Inc., 28% ng mga rehistradong botante ang sang-ayon sa paghain ng impeachment case laban kay VP Sara, habang 21% ang nasabing hindi nila masabi kung sang-ayon sila o hindi.

1% naman ang nagsabing wala silang sapat na kaalaman upang magbigay ng opinyon sa nasabing usapin.

Isinagawa ang nasabing survey mula Mayo 6-9, isang linggo bago ang 2025 elections.

Iginiit ni Sen. Risa Hontiveros na hindi uubra ang sinasabing plano ni Pangulong Ferdinand Marcos Jr., na dumalo sa deliberasyon ng panukalang 2026 budget sa Bicameral Conference Committee.

Hindi aniya ito dapat gawin ng pangulo dahil wala itong papel sa pagtalakay ng senado at kamara sa national budget.

Babala pa ni Sen. Hontiveros, posibleng makasuhan ang pangulo kapag nagpumilit ito na dumalo sa mga pulong ng mga senador at kongresista ukol sa pambansang pondo.

Tuturuan ng basic Korean language ang mga pulis na itatalaga sa mga Tourist Protection desks.

Ito’y matapos na makapagtala ng mga krimen laban sa mga south korean at iba pang dayuhang turista sa bansa.

Ayon kay Presidential Anti-Organized Crime Commission Usec. Gilbert Cruz, mismong South Korean authorities na ang nag-alok na magturo ng basic Korean language training sa mga pulis.

Kabilang sa mga napaulat na karaniwang krimen sa ilang south korean national ang pagnanakaw, fraud, at homicide.

Walang na-monitor na tangkang hacking o phishing sa sistema ng Commission on Elections ang itinatag na 24/7 Threat Monitoring Center ng pamahalaan sa katatapos lamang na eleksyon.

Sa Bagong Pilipinas Ngayon, sinabi ni DICT Assistant Secretary at Spokesman Renato Paraiso na patunay lamang ito na naging epektibo ang mga paghahanda at technical procedures ng poll body.

Gayunman, ibang usapin aniya ang mga nagpakalat ng fake news.

Ayon kay Asec. Paraiso, kabilang sa kanilang namonitor at agad na inaksyunan ang kumalat na impormasyon na nalipat ang petsa ng halalan at mayroon ding mga nagpakalat ng deepfakes laban sa mga kandidato.

Tiniyak naman ng opisyal na mabilis naman itong natugunan ng pamahalaan at na-take down at naituwid agad ang mga server ng mga nagpakalat ng maling impormasyon.—ulat mula kay Gilbert Perdez (Patrol 13)

Lumobo sa P16.68 trillion pesos ang kabuuang utang ng Pilipinas sa pagtatapos ng buwan ng Marso.

Ayon sa Bureau of the Treasury, mas mataas ito ng 0.31 percent mula sa P16.63 trillion pesos na utang ng bansa noong Pebrero.

Sa kabuuang utang, 68.2% o P11.38 trillion pesos ang domestic debt, habang 31.8% o P5.30 trillion pesos ang external debt.

Sa kabila nito, tiniyak ng ahensya na nananatiling manageable ang utang ng Pilipinas.

Napabilang ang silvanas ng Pilipinas sa  ‘50 best cookies in the world.’

Batay sa listahan ng TasteAtlas, nasa ika-29 na pwesto ang naturang Filipino frozen cookie sandwich, na may 4.0 na rating.

Inilarawan ang silvanas bilang bersyon ng isang traditional Filipino dessert na sans rival.

Hinirang naman na ‘best cookie in the world’ ang alfajores ng Argentina.

Nakatakdang magtipon-tipon ang mga Catholic Cardinal upang pumili ng bagong Santo Papa, kasunod ng pagpanaw ni Pope Francis.

Ayon sa Vatican, sisimulan sa darating na Mayo a-siyete ang conclave o pagpili ng mga kardinal sa susunod na Santo Papa.

Napagdesisyunan ang nasabing petsa sa closed-door meeting ng mga Kardinal sa Vatican.

Kaugnay nito, isinara na sa publiko ang sistine chapel bilang para paghahanda sa Papal Conclave.

Itinanggi ng Malacañang ang lumabas na ulat na nakuha na ng China ang Sandy Cay, isang maliit na isla na matatagpuan sa pagitan ng Pag-asa Island.

Sa Palace briefing, sinabi ni Palace Press Officer at PCO Undersecretary Claire Castro na noong linggo ay nagsagawa pa ng inter-agency maritime operation ang Pilipinas sa Pag-asa Cays 1, 2, at 3.

Pinasinungalingan din aniya ni National Security Council Assistant Director General Jonathan Malaya na kontrolado ng nasabing bansa ang Sandy Cay.

Muli namang binigyang diin ng palasyo na nagpapatuloy ang pagdepensa sa karapatan ng Pilipinas sa West Philippine Sea.—ulat mula kay Gilbert Perdez (Patrol 13)

Naniniwala si Vice President Sara Duterte na kabilang siya sa mga personalidad na posibleng ipaaresto ng International Criminal Court.

Ayon sa Bise Presidente, may nakalap silang impormasyon at kabilang siya sa listahan ng mga nais ipaaresto ng ICC.

Sumagi aniya sa kanyang isip ang posibilidad na ipaaresto rin siya nang unti-unting higpitan ang kanyang pagdalaw sa amang si dating Pangulong Rodrigo Duterte na nakakulong sa ICC sa The Hague, Netherlands.

Maliban sa kanya, nasa listahan din aniya sina Senador Bong Go, Senador Ronald Dela Rosa at ilang mga dating opisyal ng Philippine National Police.

Nagsampa na ng kasong qualified human trafficking ang Department of Justice laban kina dating presidential Spokesman Harry Roque, Cassandra Li Ong, at mahigit 40 iba pa.

Kaugnay ito ng ni-raid na Lucky South 99 POGO firm sa Porac, Pampanga.

Ayon kay Justice Usec. Nicholas Felix Ty, isinampa ang kaso sa Angeles City Regional Trial Court.

Inutos na rin aniya ni Justice Sec. Jesus Crispin Remulla na ipaalam sa Netherlands na may nakitang basehan ang doj para kasuhan si Roque.

Inaasahan namang ililipat ang kaso sa Pasig Regional Trial Court, kung saan dinidinig ang kaso ni Alice Guo kaugnay ng operasyon ng POGO sa Bamban, Tarlac.