Nagsilang na ang entrepreneur at dating aktres na si Neri Naig ng kanilang ikalawang anak ni Parokya ni Edgar frontman Chito Miranda.
Sa isang post sa Instagram, ibinahagi ni Miranda ang larawan ng kanilang baby boy na si Manuel Alfonso Miranda, a.k.a. Cash.
Sina Naig at Miranda ay ikinasal noong Disyembre 2014 habang isinilang naman ang kanilang panganay na si Alfonso, III noong Nobyembre 2016.
Kinumpirma ng Philippine National Police (PNP) na hawak na ng Criminal Investigation and Detection Group (CIDG) ang mga dokumentong isinumite ng Armed Forces of the Philippines (AFP).
Ito’y may kaugnayan sa sandamukal na umano’y mga paglabag ng mga miyembro ng Communist Party of the Philippines – New People’s Army (CPP-NPA) sa karapatang pantao, gayundin sa International Humanitarian Law.
Ayon kay PNP Chief P/Gen. Guillermo Eleazar, aabot sa 1,672 ang mga kaso at paglabag sa karapatang pantao ng mga komunistang terrorista mula pa noong taong 2010 hanggang sa kasalukuyan.
Aniya, kabilang dito ang paggamit sa mga child warriors, pagpatay, paninira ng mga kagamitang sibilyan, paggamit sa mga anti-personnel mines at iba pa. —sa panulat ni Jaymark Dagala (Patrol 9)
Matapos ang bagyong Lannie, muling pinaghahanda ng pamunuan ng Philippine National Police
(PNP) ang mga tauhan nito sa epektong dulot naman ng bagyong Maring.
Ayon kay PNP Chief P/Gen. Guillermo Eleazar, kanya nang inatasan ang Police Regional Office 8 o Eastern Visayas at mga karatig na rehiyon nito na tutukan ang pinakahuling lagay ng panahon.
Inabisuhan niya ang mga kinauukulang yunit ng pulisya na palagiang alamin ang mga ulat mula sa PAGASA para sa pagkakasa ng maagang paglilikas kung kakailanganin. —sa ulat ni Jaymark Dagala (Patrol 9)
Sasampahan ng kaukulang kaso at hindi mangingimi ang Philippine National Police (PNP) na ipakulong ang sinumang kandidatong magbibigay ng ‘permit to campaign fee’ sa mga komunista.
Ayon kay PNP Chief P/Gen. Guillermo Eleazar, ang pakikipagsabwatan sa mga rebelde ay patunay lang na hindi karapat-dapat humawak ng anumang puwesto sa gobyerno ang isang kandidato dahil isa itong malinaw pagtataksil sa bayan.
Ipinaalala rin ng PNP Chief na kandidato man o sibilyan ay maaaring sampahan ng kaukulang kaso tulad ng paglabag sa Republic Act 10168 o Terrorism Financing Prevention and Suppression Act of 2012 ngayong nakalagay na sa listahan ng mga terrorista ang NPA. —sa ulat ni Jaymark Dagala (Patrol 9)
Nakatakdang isara sa daloy ng trapiko ang eastbound portion ng North Avenue sa Quezon City kung saan sa susunod na taon pa ito muling bubuksan.
Sa isang advisory, binanggit ng Metropolitan Manila Development Authority (MMDA) na gagawin ang hakbang upang bigyang daan ang kontruksiyon ng Metro Rail Transit Line 7 (MRT-7).
Ayon sa MMDA, ang bahagi ng North Avenue patungong Elliptical Road ay sarado mula Oktubre 15, 2021 hanggang Hunyo 1, 2022.
Ipinaliwanag ng ahensya na maaari pa rin namang dumaan ng North Avenue ang mga motoristang papasok ng Wildlife at Veterans Memorial Medical Center.
Inihirit ng isang kongresista sa Senado na bilisan ang pagpasa ng panukalang batas na nagsusulong na huwag nang patawan ng income at iba pang withholding taxes ang honoraria ng mga election servers tulad ng mga miyembro ng Board of Election Inspectors (BEIs).
Ayon kay ACT Teachers Rep. France Castro, ang pagpapataw ng buwis sa honoraria at allowances ng mga election service volunteers ay sumisira sa diwa at layunin ng Election Service Reform Act.
Matatandaang noong Agosto ay lumusot sa ikatlo at huling pagbasa sa Kongreso ang House Bill 9652 na nagbibigay ng income tax exemption sa kompensasyon ng mga election officers na karamihan ay mga guro.
Tumaas ng 700% ang mga kaso ng dengue sa lungsod ng Baguio.
Ito’y ayon sa City Health Services Office (CHSO) matapos makapagtala ng 1,036 cases mula Enero 1 hanggang Oktubre 4 ngayong taon na mas mataas kumpara sa 144 cases sa kaparehong panahon noong 2020.
Pahayag ni Dr. Donabel Tubera-Panes, CHSO epidemiology and surveillance unit head, karamihan sa mga dinapuan ng dengue sa kanilang lugar ay may edad isang buwan na gulang hanggang 90 taong gulang.
Aminado si Tubera-Panes na naaalarma sila sa datos kaya’t mahigpit nilang binabantayan ang pagsirit ng mga dengue cases sa kanilang lungsod.
Pinadapa ng Magnolia ang San Miguel Beer sa score na 100-90 sa 2021 PBA Philippine Cup sa Bacolor, Pampanga.
Si Paul Lee ang nanguna sa Hotshots matapos kumamada ng 32 points.
Sa isa pang laro, wagi naman ang NorthPort laban sa Rain or Shine sa score na 91-88 sa overtime ng kanilang laro sa katulad na venue.
Sa pagkakataong ito, si Greg Slaughter ang bumuhat sa Batang Pier sa pamamagitan ng kanyang 25 points, 11 rebounds, at six blocks.
Napatay ng security forces ang umano’y hardline leader ng isang grupong may kaugnayan sa ISIS o Islamic state sa Sulawesi island sa Indonesia.
Ayon kay Central Sulawesi regional military chief Brigadier General Farid Makruf, nanlaban sa joint operation ng militar at pulisya si Ali Kalora ng East Indonesia Mujahideen o MIT na ikinasawi ng suspek.
Nabatid na napatay din sa operasyon ang isa pang lider na si Jaka Ramadhan o mas kilala bilang Ikrima habang tinutugis pa ang apat pang miyembro ng grupo.
Narekober naman sa encounter site ang ilang pampasabog, isang M16 rifle at dalawang tabak o machete.
Patay ang pitong indibidwal habang sugatan naman ang 30 iba pa sa serye ng pagsabog sa mga lungsod ng Jalalabad at Kabul sa Afghanistan.
Batay sa ulat ng Al Jazeera, pinaghihinalaan ng Taliban ang Islamic State na siyang responsable sa mga pag-atake.
Sa Jalalabad ay apat ang nasawi kung saan naaresto na ang karamihan sa mga suspek.
Nagbanta naman ang Taliban na papanagutin nito ang lahat ng mga may kagagawan sa mga naturang krimen.