Gilbert Perdez

Ipagpapatuloy nang muli ng Commission on Elections o Comelec ang voter registration bukas, Oktubre 11.

Ayon kay Comelec Spokesman James Jimenez, muling tatanggap ang poll body ng mga aplikasyon para makaboto sa 2022 national and local elections.

Maliban sa mga satellite registration sites, bukas ang mga tanggapan ng Comelec para sa mga nais magpatala mula Lunes hanggang Biyernes, bandang alas-otso ng umaga hanggang alas-singko ng hapon, gayundin sa Oktubre 30.

Kasabay nito, inihayag ni Comelec Chairman Sheriff Abas na gagawin nila ang lahat ng kanilang makakaya upang maging malinis at tapat ang halalan sa susunod na taon.

Bakunado na halos lahat ng mga myembro ng Armed Forces of the Philippines.

Sa ginanap na AFP command conference, sinabi ni AFP Surgeon General Col. Fatima Claire Navarro na fully-vaccinated na kontra COVID-19 ang 73 porsiyento ng 140,000 members ng Sandatahang Lakas.

Dahil naman sa pagdating ng mga bakuna, inaaasahang mababakunahan na ang 93 porsiyento hanggang 96 porsiyento ngayong Oktubre o sa susunod na buwan.

Target din ng AFP na maabot ang 100 percent vaccination status sa Disyembre ngayong taon.

Babalik sa private media si Presidential Communications Operations Office Secretary Martin Andanar pagkatapos ng termino ni Pangulong Rodrigo Duterte sa June 2022.

Ayon kay Andanar, hindi siya tumakbo sa pagka-senador dahil ang kanyang commitment ay itaguyod ang mga pamana ni Duterte hanggang sa dulo ng kanyang termino.

Nangako rin aniya siya sa Pangulo na patuloy nitong ipagbibigay-alam sa publiko ang mga accomplishments ng kasalukuyang administrasyon.

Matatandaang kasama si Andanar sa initial Senate slate ng PDP-Laban pero hindi ito naghain ng kandidatura.