Patay ang isang barangay councilor matapos pagbabarilin ng hindi pa nakikilalang salarin sa Pasig City.
Kinilala ni Pasig Police Chief Col. Roman Arugay ang biktima na si Nicky Cruz, nasa hustong gulang, at residente ng Barangay Rosario.
Sa imbestigasyon, nakaupo lang sa bungad ng isang tindahan si Cruz nang lapitan ng salarin at walang awang pinagbabaril.
Inaalam pa ang motibo sa pamamaslang, gayundin ang pagkakakilanlan ng gunman na mabilis na tumakas sakay ng motorsiklo.
Obligado nang gumamit ng body cameras ang mga opisyal at empleyado ng Bureau of Customs bilang pagtalima sa ipinalabas na mga panuntunan ng Korte Suprema ukol dito.
Batay sa sampung pahinang memorandum order, binanggit ng BOC na epektibo ang rules sa paggamit ng body-worn cameras at iba pang alternative recording devices noong Oktubre 1.
Ayon sa ahensya, dapat nakasuot ng body cameras ang mga empleyado o opisyal tuwing nagsasagawa ng controlled delivery operations, boarding formalities, auction sales, pagsira at pagbiyahe ng mga ‘goods’ patungo sa mga itinalagang pasilidad, e-tracking-related operations, at iba pa.
Arestado ang anak na lalaki ng isang Junior Minister sa India dahil sa umano’y pagkakasangkot sa pagpatay sa mga magsasaka.
Ayon kay Police Officer Upendra Agarwal, idinetine si Ashish Mishra nang araruhin ng kanilang sasakyan ang mga nagpoprotestang magsasaka na ikinasawi ng apat sa mga ito.
Depensa naman ng Prime Minister na si Ajay Mishra, hindi ang kanyang anak kundi ang kanilang driver ang nasa loob ng sasakyan nang mangyari ang insidente.
Sinugod umano ng mga magsasaka na may dalang pamalo at tabak ang driver at pinagbabato ito kaya’t nawalan ito ng kontrol sa manibela hanggang sa mabundol ang mga biktima.
Ipinasara ng pamahalaang lungsod ng Makati ang tatlong restawran dahil sa umano’y kawalan ng business permit.
Ayon sa Makati LGU, kabilang sa mga sinilbihan ng closure order ay ang Alama Filipino Pub, Resaurante de Poblacion Inc., at Restaurante Felipe na pawang matatagpuan sa Barangay Poblacion.
Matatandaang ipinag-utos ng lokal na pamahalaan ang crackdown laban sa mga commercial establishments na illegal na nag-o-operate sa lungsod.
Nagbukas na ang Philippine Statistics Authority ng online booking para sa Philippine Identification System o PhilSys Step 2 process sa tatlong probinsya at lungsod sa Bangsamoro Autonomous Region in Muslim Mindanao o BARMM.
Ayon sa PSA, simula noong Setyembre 6 ay tumatanggap na ng appointment ang Marawi City sa Lanao del Sur; Cotabato City, Datu Odin Sinsuat, Datu Abdullah Sangki, at Matanog sa Maguindanao; at Jolo, Sulu.
Noong Septyembre 28 naman umarangkada ang PhilSys Step 2 process sa Isabela City, Lamitan City, Sumisip sa Basilan; at Parang, Sulu.
Sa Step 2 registration ay bina-validate ang demographic data na isinumite online ng isang registrant at kinukunan ng biometrics ang aplikante tulad ng larawan, fingerprints, at iris scans.
Tiniyak ni National Task Force against COVID-19 Chief Implementer Carlito Galvez Jr. na may sapat na storage space o pasilidad na pag-iimbakan ng mga bagong dating na COVID-19 vaccines.
Ginawa ni Galvez ang pahayag kasunod ng pagdating ng mahigit 100,000,000 doses ng Moderna vaccines sa bansa.
Sinabi ni Galvez na nakikipag-ugnayan na rin ang Department of Health (DOH) sa mga rehiyon, lalawigan, at munisipalidad para hindi masayang ang mga bakuna at mapabilis ang vaccination program ng pamahalaan.
Isiniwalat ng aktres na si Andrea Brillantes na tinamaan siya ng COVID-19.
Sa isang programa sa telebisyon, nilinaw naman ni Andrea na wala siyang nararamdamang anumang sintomas ng impeksiyon.
Binanggit din ng aktres na nakaapekto rin sa kanyang mental health ang insomnia at anxiety habang naka-quarantine.
Samantala, inamin din ni Andrea na madalas siyang binabangungot at nakakaranas ng sleep paralysis.
Nadepensahan ni Tyson Fury ang kanyang WBC heavyweight boxing title.
Ito’y makaraang patulugin ni Fury sa ika-labing isang round ang challenger na si Deontay Wilder sa kanilang bakbakan sa T-Mobile Arena sa Las Vegas.
Ilang beses ding nagkaroon ng knockdown incidents sa laban pero mas nangibabaw sa bandang huli si Fury matapos masapol ng malakas na right hook si Wilder.
Inihayag ng Department of Health na kailangan pang i-review ng mga eksperto ang COVID-19 treatment drug na Ronapreve bago ito gawing available sa publiko.
Ang pahayag ay ginawa ni Health Undersecretary Maria Rosario Vergeire kahit binigyan na ng emergency use authorization o EUA ng Food and Drug Administration ang Ronapreve noong Oktubre 1.
Nilinaw din ni Vergeire na sa kabila ng EUA, magagamit lamang ito ng mga ospital kung aprubado na ng DOH at ng mga medical experts.
Maliban dito, iginiit din ng DOH na maaari lamang gamitin ang Ronapreve sa mga kumpirmadong COVID-19 patients na labindalawang taong gulang pataas na nakakaranas ng banayad hanggang katamtamang mga sintomas.
Napauwi na ng Department of Foreign Affairs (DFA) ang walong Pilipinong biktima ng human trafficking sa Syria.
Ayon kay DFA Undersecretary for Migrant Workers’ Affairs Sarah Lou Arriola, ang mga repatriates ay sasailalim sa facility-based quarantine ng Overseas Workers Welfare Administration o OWWA.
Bukod dito, sasalang din sa RT-PCR o swab testing ang mga ito sa ika-pitong araw ng kanilang quarantine.
Samantala, nangako naman si Arriola na gagawin nila ang lahat upang matulungan ang mga kababayan nating stranded pa rin hanggang ngayon sa ibayong dagat.