Gilbert Perdez

Nangako ang Pangulong Rodrigo Duterte na magdodoble-kayod ang kanyang administrasyon upang mabilis na makumpleto ang rehabilitation projects sa Marawi City.

Ang pahayag ay ginawa ni Pangulong Duterte matapos pangunahan ang paggunita sa ika-4 na taong anibersaryo ng paglaya ng lungsod mula sa terorismo.

Sa kanyang talumpati sa Rizal Park sa Marawi, sinabi ng punong ehekutibo na mahalagang maibalik sa normal ang pamumuhay ng mga residente at maibangon ang siyudad mula sa matinding epekto ng giyera sa pagitan ng militar at Islamic state na nagsimula noong May 23, 2017.

Kasabay nito, pinuri naman ng pangulo ang Task Force Bangon Marawi o TFBM, mga lokal na opisyal, at iba pang mga katuwang nito sa rehabilitasyon ng naturang lungsod.

Isinailalim na ang buong lalawigan ng La Union sa state of calamity kasunod ng pananalasa ng bagyong Maring.

Batay sa resolusyon ng Sangguniang Panlalawigan, binanggit na aabot sa 259 barangays, 38,812 families, 135,881 persons, at 4,263 houses ang apektado ng kalamidad.

Bukod dito, nasa P369.3 million din ang naging pinsala sa agrikultura.

Samantala, maging ang Dagupan City ay isinailalim na rin sa state of calamity dulot ng matinding epekto ng bagyo sa lungsod.

Tinatayang aabot sa P187 million ang jackpot sa susunod na bola ng Ultra Lotto 6/58.

Ayon kay Royina Garma, general manager ng Philippine Charity Sweepstakes Office, walang nakatumbok sa six-digit winning combination na 03-30-45-19-16-32 na may katapat na premyo na higit P181 million.

Matatandaang noong Hunyo pa ngayong taon nagkaroon ng winner sa Ultra Lotto kung saan isang bettor mula sa Calbayog City ang nakasungkit ng P49.5 million na jackpot prize.