Lumagda na ng kontrata sa pinakamalaking music label sa mundo ang South Korean K-pop group na BTS.
Ang pagpirma ng distribution at marketing deal sa Universal Music Group ay ginawa ng grupo kasunod ng pagkalas nito sa Columbia Records.
Bagama’t hindi tinukoy ang financial terms ng kasunduan, sinasabing ang Universal ang magdi-distribute at magpo-promote ng mga kanta ng BTS sa Estados Unidos at iba pang mga rehiyon.
KINATIGAN ng Korte Suprema ang naging hatol ng mababang hukuman laban sa isang lalaki matapos pagbabarilin at pagtatagain ang kanyang kapitbahay na ikinasawi nito sa Romblon noong Marso 2014.
Sa hatol ng Supreme Court, binanggit na walang mali sa desisyon ng lower court nang patawan nito ng life sentence ang akusadong Jovencio Rollan matapos mapatunayang pinatay nito ang biktimang si Efren Reaño sa Barangay Lumbang West, Cajidiocan, Romblon.
Batay sa rekord ng korte, nakikipag-inuman si Reaño sa kanyang mga kaibigan nang pagbabarilin ni Rollan kung saan tinamaan ito sa leeg bago pinagtataga hanggang sa masawi.
Maliban sa habambuhay na pagkakakulong, pinagbabayad din ng korte si Rollan ng dalawang daang libong piso sa pamilya ng biktima bilang danyos, maliban sa anim na porsiyentong interes kada taon hanggang sa maisapinal ang hatol sa kaso.
Kumpiyansa si English coach Scott Cooper na kayang talunin ng Pilipinas ang tatlong malalakas nitong kalaban sa AFC Under-23 Asian Cup Group H qualifiers, kabilang ang kasalukuyang Asian Under-23 champion na South Korea.
Sa isang online press conference, binanggit ni Cooper na maliban sa SoKor ay makakasagupa rin ng mga Pinoy ang Singapore at Timor Leste.
Maghaharap naman ang mga koponan ng South Korea at Pilipinas sa Lunes, October 25, sa Jalan Besar Stadium sa Singapore.
Humataw na naman si Partido Federal ng Pilipinas (PFP) standard-bearer Ferdinand ‘Bongbong’ Marcos, Jr. sa panibagong survey sa hanay ng mga tumatakbo sa pagka-pangulo sa May 2022 elections.
Batay sa pinakahuling presidential preference survey ng PUBLiCUS Asia Inc., lumabas na nakakuha si Marcos ng 49.3% ng mga boto mula sa mga respondents.
Pangalawa naman si Vice President Leni Robredo na may 21.3% habang pumangatlo si Manila Mayor Isko Moreno na may 8.8% at sinundan nina Sen. Ping Lacson (2.9%) at Sen. Manny Pacquiao (2.8%).
Milya-milya ang kalamangan ni Marcos kumpara sa iba pang presidential hopefuls dahil sa National Capital Region (NCR) pa lamang ay nakasungkit na ito ng 40% na boto habang humakot din ang dating senador ng 55.7% na boto sa North at Central Luzon at 38.2% sa South Luzon.
Nasa 44.7% naman ang nakuhang boto ni Marcos sa Visayas habang nakakalulang 62.5% sa Mindanao.
Ang Pahayag survey ay ang latest presidential preference survey na lumabas makaraang magdeklara si Davao City Mayor Sara Duterte na hindi ito tatakbo sa pagka-presidente sa darating na halalan.
Magugunitang maging sa mga informal surveys gaya ng Kalye Surveys ng ilang vloggers sa iba’t ibang bahagi ng bansa ay lumitaw na si Marcos ang gustong iboto ng mga tao sa darating na eleksyon.
Hindi makatao at labag sa batas ang sinasabing pagpapatupad ng ilang employers ng “no vaccine, no salary” scheme sa kanilang kompanya.
Ito ang binigyang diin ng Trade Union Congress of the Philippines o TUCP kasabay ng panawagan sa Department of Labor and Employment (DOLE) na aksiyunan ang nasabing usapin.
Sa isang pahayag, sinabi ng grupo na nakatanggap sila ng ulat na iniipit ng ilang employers ang sahod ng mga hindi bakunadong empleyado at hindi ito ibinibigay hangga’t hindi nakapagpapakita ng vaccination cards.
Dahil dito, hinikayat ng TUCP ang DOLE na magsagawa ng inspeksiyon sa mga kompanya upang matiyak na natatanggap ng mga hindi bakunadong manggagawa ang kanilang sahod.
Sumampa na sa 40,191 ang bilang ng mga gumaling sa COVID-19 sa hanay ng Philippine National Police (PNP).
Ito ay makaraang makapagtala ang PNP Health Service ng 54 na bagong recoveries.
Nagkaroon naman ng 66 na bagong kaso kaya’t sumirit na sa 41,266 ang bilang ng impeksiyon sa PNP.
Sa kasaluyan, nasa 953 ang active cases habang umakyat naman sa 122 ang bilang ng mga nasawi.
Dinukot ng mga armadong lalaki ang 17 American Christian missionaries, kasama ang pamilya ng mga ito, at mga bata sa Haiti.
Ayon sa ilang security officials sa Port-au-Prince, lulan ng bus ang mga biktima at patungo sanang airport nang mangyari ang insidente.
Umaasa naman ang Christian Aid Ministries na palalayain ng mga salarin ang mga misyunaryo at ipinaliwanag na kaya nasa Haiti ang mga ito ay dahil sa ipinatatayong orphanage o bahay-ampunan sa nasabing bansa.
Tinatayang aabot sa higit anim na raan ang bilang ng mga naitalang insidente ng kidnapping sa Haiti ngayong taon.
Nagsilang ng baby girl ang indie actress na si Anna Luna.
Sa Instagram, sinabi ni Luna na ang kanilang bagong anghel ni Clark Alpuerto ay pinangalanan nilang Anne Clarke.
Matatandaang bumida si Luna sa ilang independent films tulad ng “Citizen Jake”, “Emir”, “Maestra”, at iba pang pelikula.
Si Luna ay miyembro ng 2018 Star Magic Circle at ikinasal kay Alpuerto noong Mayo ngayong taon.
Nasakote ng militar at pulisya ang isang umano’y miyembro ng Abu Sayyaf Group (ASG) na hinihinalang sangkot sa Samal Island kidnapping at pagpatay sa dalawang bihag sa Zamboanga City.
Kinilala ang suspek na si Adzrimar Sali Ammat, kilala sa mga alyas na “Adz”, “Abu Omar” at “Guru Adin”, at tubong Tabu Batu, Maimbung, Sulu.
Nabatid na nahuli si Ammat ng mga pulis at sundalo sa Campo Islam sa nasabing lungsod.
Si Ammat ay sinasabing may nakabinbin na mga kasong kidnapping with homicide sa isang korte sa Panabo City, Davao del Sur at isa pang kaso ng kidnapping with ransom sa Bongao, Tawi-Tawi.
Hinihintay pa ng Department of Health ang opisyal na rekomendasyon ng World Health Organization ukol sa pagbibigay ng karagdagang doses ng Covid-19 vaccine sa mga immune-compromised persons, senior citizens, at health care workers.
Sa Laging Handa briefing, sinabi ni DOH Undersecretary Maria Rosario Vergeire na inaasahan nilang maglalabas na ng final recommendation ang organisasyon sa susunod na buwan.
Nilinaw naman ni Vergeire na ang booster shots at dagdag na doses ay magkaiba at hindi pa inirerekomenda ng WHO ang pagbibigay ng 3rd shot sa general population.