Nagdaos ng mock elections ang Comelec o Commission on Elections sa San Juan Elementary School sa lungsod ng San Juan.
Ayon sa Comelec, sakop ng voting simulation ang Barangay Balong Bato at Barangay Ermitaño na mayroong 4,235 registered voters.
Ang mock elections ay bahagi ng paghahanda ng poll body upang matiyak ang seguridad at kahusayan ng proseso ng pagboto, gayundin ang implementasyon ng basic health protocols.
Hinimok ni Presidential Adviser for Entrepreneurship Joey Concepcion ang Department of Labor and Employment na gawing mandatory ang pagpapabakuna sa mga economic frontliners at maging sa mga nagtatrabaho sa labor-intensive industries para sa ligtas na pagbubukas ng ekonomiya.
Ayon kay Concepcion, lumiham na siya kay Labor Secretary Silvestre Bello III tungkol sa kanyang proposal na obligahing magpabakuna ang mga manggagawa sa hotel, turismo, restoran, retail & personal care services, at maging ang mga nasa hanay ng construction, automotive, wearables & manufacturing, electronics & semiconductors at business process outsourcing.
Ipinaliwanag din ni Concepcion ang kahalagahan ng pagpapabakuna sa harap na rin ng unti-unting pagbaba ng bilang ng COVID-19 cases sa bansa.
Bilang tugon, sinabi naman ni Bello na pag-aaralan pa nila ang mungkahi ni Concepcion.
Hinikayat ng isang grupo ang publiko na huwag magkalat ng basura sa mga sementeryo.
Ginawa ng Ecowaste Coalition ang panawagan sa gitna ng pagdagsa ng mga tao sa mga sementeryo at kolumbaryo bago mag-Undas.
Ayon sa grupo, dapat iwasan ang pagtatapon ng basura kung saan-saan at sa halip ay gunitain ang All Saints’ Day sa pamamagitan ng pag-alala at paggalang sa mga yumao.
Mas maigi anilang huwag nang magdala ng single-use plastics at iba pang disposable materials para maiwasan ang pagkakalat ng basura.
Maaaring bumisita sa mga sementeryo at kolumbaryo anumang araw, maliban sa October 29 hanggang November 2.
UMANI ng suporta mula sa Governance in Justice o GOJUST Program ang itinutulak na clinical legal education ng Korte Suprema sa mga law schools sa iba’t ibang panig ng bansa.
Ayon sa Supreme Court Public Information Office o PIO, sinimulan na ng GOJUST ang pagbibigay ng pondo sa mga paaralan na naatasang magpatupad ng CLEP o clinical legal education programs.
Nabatid na isang milyong pisong pondo kada taon ang ibubuhos ng organisasyon sa loob ng dalawang taon sa mga pribado at pampublikong law schools.
Matatandaang noong 2019 ay kinatigan ng Korte Suprema ang inilatag na Revised Law Student Practice Rule kung saan binago nito ang ilang probisyon ng Rules of Court.
Papayagan nang pumasok sa Boracay sa Malay, Aklan ang mga bakunadong turista kahit walang ipapakitang negatibong swab test result.
Sa isang virtual press conference, binanggit ni Aklan Governor Florencio Miraflores na gagawin ang hakbang upang buhayin ang industriya ng turismo sa isla.
Bagama’t mandatory pa rin ngayon ang negative RT-PCR test, sinabi ni Miraflores na maglalabas siya ng executive order sa katapusan o sa susunod na buwan upang opisyal nang maalis ang nasabing requirement.
Gayunman, bago payagang pumasok sa isla, kailangang magpakita ng vaccination certificate ang mga turista mula sa www.vaxcert.gov.ph, maliban sa iba pang documentary requirements tulad ng reservations mula sa isang hotel na accredited ng Department of Tourism, travel details, valid identification card, at maging ang kanilang Swift, Safe and Smart Passage o S-PaSS enrollment.
IDINEPENSA ni Ombudsman Samuel Martires ang isinumite nitong draft bill sa Kongreso para sa isinusulong nitong pag-amyenda sa ilang probisyon ng Republic Act No. 6713 o mas kilala bilang Code of Conduct and Ethical Standards for Public Officials and Employees.
Paliwanag ni Martires, kung babasahing maigi ang proposed draft bill at original text ng batas ay konti lang naman ang mababago nito sakaling paboran ng mga mambabatas dahil layon lamang nitong gawing klaro ang ilang probisyon ng RA 6713.
Ginawa ni Martires ang pahayag matapos batikusin ng Philippine Center for Investigative Journalism o PCIJ ang ipinasa nitong draft bill dahil tila gusto umano nitong busalan ang mga mamamahayag.
Una unang nilinaw ni Bayan Muna Rep. Carlos Zarate na hindi pa naman final version ang naturang draft bill.
INIREKOMENDA ni dating Chief Justice Lucas Bersamin si Commission on Audit Chairperson Michael Aguinaldo bilang susunod na mahistrado ng Korte Suprema.
Ginawa ni Bersamin ang rekomendasyon bunsod ng nalalapit na pagreretiro ni Associate Justice Rosmari Carandang.
Sa dalawang pahinang liham ni Bersamin kay Judicial and Bar Council Chairman at Chief Justice Alexander Gesmundo, binanggit ng dating punong mahistrado na ‘fully qualified’ si Aguinaldo para sa nasabing posisyon.
Si Aguinaldo ay naging COA chairperson noong April 2015 at magtatapos ang kanyang termino sa susunod na taon.
Mahigpit na binabantayan ng Philippine Drug Enforcement Agency sa Region 12 o Soccsksargen ang posibleng pagkakasangkot sa illegal drug trade ng ilang lokal na kandidato sa May 2022 elections.
Ang pahayag ay ginawa ni PDEA-Region 12 Spokesperson Katryn Gaye Abad matapos masabat ang higit P3milyong halaga ng umano’y shabu mula sa isang kandidato sa pagka-alkalde sa Maguindanao sa ikinasang operasyon sa North Cotabato.
Sinabi ni Abad na hawak na ng kanilang intelligence at enforcement units ang isang listahan ng mga target personalities at nagsasagawa na rin ng surveillance operations ang mga ito bilang pagtalima sa direktiba ni PDEA Director General Wilkins Villanueva.
Matatandaang sinalakay ng PDEA ang tahanan ni Tom Nandang sa Midsayap kung saan nakumpiska mula rito ang bultong-bultong ipinagbabawal na droga.
Ayon sa PDEA, si Nandang na mayoralty candidate sa Northern Kabuntalan ay nasa listahan ng mga high-value targets at sangkot umano sa laganap na bentahan ng droga sa lalawigan.
Arestado ang 3 drug suspects habang nasabat mula sa mga ito ang P3.4 million na halaga ng umano’y shabu sa Bacoor, Cavite.
Kinilala ng Philippine Drug Enforcement Agency ang mga suspek na sina Marvin Espiritu, John Paul Reyes, 26, at Christine Alvaran na nadakip sa Barangay Panapaan.
Maliban sa 500 gramo ng hinihinalang shabu, nakumpiska rin mula sa mga ito ang isang Toyota Avanza, isang cell phone at iba’t-ibang identification cards.
Kasong paglabag sa Comprehensive Dangerous Drugs Act ang isasampa laban sa mga suspek.
IPINAG-UTOS ng Korte Suprema ang agarang pagpapalaya sa isang drug convict dahil sa hindi nasunod ng mga pulis ang ‘chain of custody’ rule sa ilalim ng Comprehensive Dangerous Drugs Act.
Ang akusadong si Maricel Medina ay nahulihan ng dalawang sachets ng umano’y shabu noong April 2016 sa Quezon City.
Ngunit natuklasan na walang miyembro ng media o kinatawan mula sa Department of Justice o DOJ nang isalang sa inventory at kunan ng larawan ang ebidensya laban kay Medina.
Dahil dito, ipinag-utos ng Supreme Court sa pamunuan ng Correctional Institution for Women sa Mandaluyong City na palayain ang naturang akusado.