Gilbert Perdez

Pinaiimbestigahan na ng Philippine National Police sa Anti-Cybercrime Group ang ilang social media pages na umano’y nag-aalok ng passport appointments na may kapalit na processing fee.

Ayon kay PNP Chief Gen. Guillermo Eleazar, ang hakbang ay ginawa nila matapos humingi ng tulong ang Department of Foreign Affairs sa PNP at National Bureau of Investigation hinggil sa nasabing scam.

Matatandaang inihirit din ng DFA sa pamunuan ng Facebook na tanggalin sa kanilang platform ang ilang accounts upang hindi na makapambiktima ang mga ito.

Nilinaw din ng ahensya na libre ang appointment slots para sa pagkuha ng pasaporte at iba pang consular services.

Aarangkada na ang pagbabakuna sa mga kabataan sa mga lokal na pamahalaan sa iba’t-ibang panig ng bansa sa Oktubre 29.

Ito ang kinumpirma ni Secretary Carlito Galvez Jr., chief implementer ng National Task Force Against Covid-19, kasunod ng pilot roll-out sa National Capital Region noong Oktubre 15 at 22 para sa 12-17 age group  na may comorbidities.

Umaasa si Galvez na mas marami pang kabataan ang magpapabakuna sa susunod na linggo.

Naghahanda na rin ang mga lokal na pamahalaan at mga ospital para sa naturang programa.

Maulap na papawirin na may kalat-kalat na pag-ulan at thunderstorms ang patuloy na iiral sa Metro Manila, ilang parte ng Luzon at Visayas dahil sa low pressure area.

Ayon sa PAGASA, ang LPA ay huling namataan na nasa bisinidad ng San Vicente, Palawan at nakakaapekto rin sa Southern Luzon, Visayas, at Mindanao.

Ibinabala naman ng PAGASA na posibelng maging tropical depression ang nasabing sama ng panahon sa loob ng 48 oras at papangalanan itong “Odette”.

Samantala, isa pang bagong tropical depression ang namataan ng weather agency sa labas ng na nasa layong higit 1,000 kilometro silangan ng Visayas.

Kinumpirma ni Davao City Mayor Sara Duterte-Carpio na nagkita sila nina presidential candidate Ferdinand “Bongbong” Marcos Jr. at Sen. Imee Marcos sa Cebu City.

Ang pahayag ay ginawa ng alkalde sa harap ng mga espekulasyon kung tatakbo ba siya o hindi sa mas mataas na posisyon sa susunod na taon.

Sinabi ni Duterte-Carpio na dumalo siya, kasama ang magkapatid na Marcos, sa pagdiriwang ng kaarawan ng maybahay ni House Majority Leader Martin Romualdez na si Yedda sa nasabing lungsod.

Hindi naman binanggit ni Inday Sara kung anu-ano ang mga napag-usapan nila sa naturang event.

2 low-pressure areas ang kasalukuyang binabantayan ng PAGASA na nasa loob ng bansa.

Ayon sa state weather agency, ang LPA sa Eastern Visayas ay huling namataan na nasa bisinidad ng Santa Rita, Samar ngunit inaasahang malulusaw ito habang tinatahak ang Visayas.

Ang isa pang namumuong sama ng panahon o LPA na nasa bahagi naman ng Sulu Sea ay binabaybay ngayon ang karagatang sakop ng Hadji Muhtamad, Basilan.

Ang nasabing weather disturbance ay posibleng maging tropical depression sa susunod na 48 hours.

Dahil dito, inaasahan ang mahina hanggang katamtamang pag-ulan sa Bicol Region, MIMAROPA, Visayas, Zamboanga Peninsula, Quezon, Tawi-Tawi, Basilan, at Sulu.