Gilbert Perdez

Bakunado na ang 199,362 o 89.4% ng 223,000 members ng Philippine National Police (PNP).

Ayon kay PNP Chief Gen. Guillermo Eleazar, tinatayang 21,000 naman ang naghihintay pa ng kanilang second dose habang nasa 2,638 ang wala pang bakuna.

Sumadsad naman sa 538 ang active COVID-19 cases sa PNP habang sumampa sa 41,776 ang kabuuang bilang ng mga tinamaan ng impeksiyon sa kanilang hanay.

Samantala, sumirit na sa 123 ang mga nasawing pulis dahil sa naturang sakit.

Naglabas ng mga alituntunin ang Department of Labor and Employment (DOLE) sa pagbabayad ng 13th month pay ng pribadong sektor ngayong taon.

Sa Labor Advisory 8 na nilagdaan ni Labor Secretary Silvestre Bello III, nakasaad dito ang guidelines gamit ang basic wage sa Metro Manila na nasa 537 pesos kada araw.

Sa ilalim ng batas, obligadong magbigay ng 13th-month pay ang employer ng hindi bababa sa one-twelfth (1/12) ng kabuuang basic salary ng isang empleyado sa loob ng isang taon o calendar year.

Samantala, pinagsusumite rin ang mga kompanya ng report sa DOLE Establishment Report System hanggang January 15, 2022 bilang pagtalima sa kautusan ng labor department.

Inihayag ng Commission on Elections (COMELEC) na ang mga manggagawa na hindi makakaboto sa mismong araw ng eleksiyon sa May 9, 2022 ay maaari maghain ng aplikasyon para sa Local Absentee Voting (LAV).

Batay sa resolusyon, binanggit ng poll body na ang mga indibidwal na nais maging bahagi ng LAV ay puwedeng magsumite ng ‘duty accomplished form’ o ang LAV Form No. 01 hanggang March 7, 2022.

Saklaw ng absentee voting ang mga opisyal at empleyado ng gobyerno, kabilang ang mga miyembro ng Armed Forces of the Philippines o AFP, at Philippine National Police (PNP), gayundin ang mga kasapi ng media o media practitioners at ang kanilang technical & support staff.

Ang mga local absentee voters ay papayagang bumoto mula April 27 hanggang 29, 2022, bandang alas-otso ng umaga hanggang alas-singko ng hapon.

Umakyat na sa halos 41,000 ang bilang ng mga bilanggo na nakakumpleto ng bakuna kontra coronavirus disease 2019 o COVID-19.

Ayon sa Department of the Interior and Local Government (DILG) , ito’y halos kalahati sa higit 123,000 na mga presong nakapiit sa iba’t ibang bilangguan sa bansa na pinatatakbo ng Bureau of Jail Management and Penology (BJMP).

Nabatid na nasa 75,970 o 61.5 % na ang kabuuang bilang ng mga bilanggo na naturukan ng first dose ng bakuna laban sa impeksiyon.

Samantala, mahigit 18-K personnel na ng BJMP ang fully vaccinated.

Kinumpirma ng Department of Health (DOH) na nakapagtala ito ng higit 5-K bagong kaso ng COVID-19 nitong nakalipas na 24 oras.

Batay sa pinakabagong datos ng DOH, nagkaroon ng 7,312 na bagong recoveries.

Mahigit 2.7 milyon naman ang kabuuang bilang ng impeksiyon sa buong bansa.

Sa kasalukuyan, halos 70,000 na ang active cases habang nasa 2.6 milyon naman ang bilang ng mga gumaling.

Dahil naman sa pagpanaw ng mahigit 200 pang pasyente, sumirit na sa higit 41,000 ang death toll.

Nasikwat ni Filipino gymnast Carlos Yulo ang gintong medalya sa vault event ng Gymnastics World Championship sa Kitakyushu, Japan.

Sa nasabing event, inilampaso ni Yulo ang pito pang gymnasts dahilan upang masungkit niya ang kampeonato.

Nag-average si Yulo ng 14.916 sa dalawang vaults na nangyari isang araw matapos bigong madepensahan ang kanyang titulo sa floor exercise.