Gilbert Perdez

Inihayag ni Presidential aspirant Ferdinand “Bongbong” Marcos, Jr. na masusing pagpaplano ang kailangan upang maging handa ang bansa ngayong nagsisimula nang bumangon ang pandaigdigang ekonomiya mula sa krisis na dulot ng COVID-19.

Nakita ni Marcos  ang pangangailangan matapos magdesisyon ang gobyerno ng Australia na alisin na ang ban sa canned pineapple products na galing Pilipinas na aniya’y magandang development hindi lang para sa agrikultura kundi maging sa iba pang sektor.

“Eto na nagsisimula nang magbukas ang global economy, mabuti in this particular case nasabayan natin dahil may produkto tayong mai-export sa kanila (Australia). Dapat ang positioning natin sa iba’t ibang sector ng global economy ay ganyan din. Kapag nakapag-umpisa na sila, ready na dapat tayo na mag-trade, makipagnegosyo, makipagpartner, or magsupply sa kanila,” ayon sa standard-bearer ng Partido Federal ng Pilipinas (PFP).

Sinabi ni Marcos na ang ganitong istratehiya ay kasama sa kanyang “Tawid COVID, Beyond COVID” program na naglalayong makagawa ng mga hakbang kung paano makakatulong sa taumbayan at sa ekonomiya ng bansa habang nasa kalagitnaan at pagkatapos ng pandemya.

Kasama sa programa ang pagbuo ng mga istratehiya ukol sa pagbibigay solusyon sa mga problema ng iba’t ibang sektor gaya ng agrikultura, enerhiya, telecommunication, imprastraktura, edukasyon, kalusugan, at iba pa.

“Lahat yan ay kailangan gawin para makasabay tayo sa development ng global economy,” dagdag pa ng dating senador.

Itinalaga ni Pangulong Rodrigo Duterte si Undersecretary Bernie Cruz bilang acting chief ng Department of Agrarian Reform o DAR.

Ayon kay Presidential Spokesperson Harry Roque, ang appointment ni Cruz ay nilagdaan ng Presidente noon pang Oct. 28.

Si Cruz ang papalit kay DAR Secretary John Castriciones na bumaba sa puwesto para sumabak sa 2022 senatorial elections.

MAS pinaigting pa ng Philippine National Police o PNP ang seguridad sa mga terminal at pantalan bunsod ng inaasahang pagdagsa ng mga tao na uuwi sa mga probinsya ngayong Undas.

Ayon kay PNP chief Gen. Guillermo Eleazar, inatasan niya ang mga unit commanders na mag-deploy ng sapat na bilang ng mga personnel sa mga transportation hubs para tiyakin ang kaligtasan ng mga biyahero.

Pinapayuhan naman ni Eleazar ang mga mananakay na siguruhing dala nila ang mga kinakailangang dokumento sa kanilang pagbiyahe.

Maliban dito, pinatitiyak din ni Eleazar sa mga awtoridad na nasusunod ang minimum public health standards.

INANUNSIYO ng Land Transportation Franchising and Regulatory Board o LTFRB na aprubado na ang isang bilyong pisong fuel subsidy para sa mga public utility vehicle drivers sa gitna ng pagtaas ng presyo ng mga produktong petrolyo.

Ngunit ipinaliwanag ni LTFRB Chairman Martin Delgra na ang pondo ay para lamang sa mga lehitimo o kwalipikadong franchise holders at maging ng kanilang mga driver, partikular ang mga nasa sektor ng traditional public utility jeepney o PUJ.

Sinabi ni Delgra na ilalabas ang pondo sa ilalim ng Pantawid Pasada Program ng LTFRB na unang ipinakilala noong 2018 at 2019.

Gayunman, nilinaw ng opisyal na hindi pa tiyak kung kailan ire-release ang nasabing subsidy.

NAGSAGAWA ng protesta ang ilang militanteng grupo sa isang restoran sa New York City bilang pagpapakita ng pagtutol sa nominasyon ni Presidential Spokesperson Harry Roque sa International Law Commission o ILC.

Kabilang sa mga lumahok sa pagkilos ay ang mga miyembro ng Bayan USA at iba pang mga kaalyadong organisasyon na inilarawan si Roque bilang ‘cheerleader’ ni Pangulong Rodrigo Duterte sa kabila ng madugo nitong giyera kontra droga,

Bagama’t naitaboy ng mga security personnel ang mga raliyista, sinasabing dalawang matatandang waiter ang nasugatan habang may mga nasira ring ari-arian dahil sa insidente.

Si Roque ay isa sa 11 indibidwal na nominado para sa puwesto sa ILC.

Bigo sa kanyang apela ang isang propesor na dumulog sa Korte Suprema matapos sibakin ng Saint Louis University (SLU) dahil wala itong master’s degree.

Batay sa desisyon, kinatigan ng Supreme Court ang hatol ng National Labor Relations Commission (NLRC) at Court of Appeals sa kaso ni Fe Burcio na naghain ng illegal termination laban sa SLU nang alisan ito ng full teaching load noong 2012.

Ayon sa mataas na hukuman, malinaw sa Collective Bargaining Agreement (CBA) ng unibersidad na hindi maaaring bigyan ng permanent employment status ang isang propesor hangga’t hindi nakakumpleto ng masteral degree.

Giit pa ng mga mahistrado, bagama’t walang nakasaad na resignation ay malinaw din sa isang liham ni Burcio sa SLU na siya mismo ang kumalas sa unibersidad nang tanggihan niya noon ang inalok nitong labinlimang units na teaching load kahit wala pa itong master’s degree.

Pinagtibay ng Korte Suprema ang life sentence na ipinataw ng lower court at Court of Appeals laban sa isang lalaki na pumatay ng nakaalitan nitong kapitbahay sa Cebu City noong November 20, 2005.

Batay sa hatol ng Supreme Court, kinatigan nito ang sentensya laban sa akusadong si Michael Gumban na napatunayang guilty sa pagpatay sa isang Solomon Garbo Jr.

Mas pinaboran ng korte ang testimonya ng isang testigo na pinalo ng bakal ni Gumban si Garbo, kasama ang limang iba pa habang sinaksak din ito sa dibdib ng isa pang kasabwat na ikinasawi ng biktima.

Maliban sa habambuhay na pagkakabilanggo, pinagbabayad din ang akusado ng 275,000 pesos sa pamilya ng biktika bilang danyos, maliban sa anim na porsiyentong interes hanggang sa maisapinal ang hatol sa naturang kaso.

Muling pinalawig muli ng Korte Suprema ng anim na buwan o hanggang June 30, 2022 ang validity ng notarial commissions na napaso noong Disyembre 2020.

Sa isang resolusyon, pinagtibay ng Supreme Court En Banc ang hirit ng isang Atty. Rameses Villagonzalo na i-extend muli ang validity ng kanyang notarial commission.

Una nang pinalawig ng mataas na hukuman ang bisa ng mga notarial commissions hanggang June 30, 2021 at na-extend pa ng hanggang sa December 31, 2021.

Matatandaang humirit ng extension ng notarial commission ang mga abogado dahil sa delay at hirap sa pagkuha ng mga documentation requirements bunsod ng travel restrictions at work disruptions na dala ng pandemya.