Gilbert Perdez

Umakyat na sa anim na pu’t tatlo  (63) ang kabuuang ng mga nasawi sa pananalasa ng bagyong Odette sa Bohol.

Sa isang post sa Facebook ni Gov. Art Yap, binanggit na pinakamarami ang namatay sa bayan ng Ubay na pumalo sa labindalawa (12) habang tigli-lima naman sa President C.P. Garcia at Loon na sinundan ng Inabanga, Catigbian, Buenavista, Tubigon, Alicia, Antequera, Maribojoc, Butuan, Getafe, at iba pang lugar.

Sinabi ni Yap na ‘verified’ ng Department of Health o DOH at lokal na pamahalaan ang inilabas nilang partial data hanggang kaninang alas-dose ng tanghali.

Kasabay nito, sinabi rin ng gobernador na nangangailangan sila ng tinatayang tatlong daang generator sets para paganahin ang mga water refilling stations sa mga bayan at lungsod sa kanilang probinsya.

Samantala, sa panayam naman ng programang BRGY. 882 sa DWIZ, sinabi ni NDRRMC spokesperson Mark Timbal na kasalukuyan pa nilang bineberipika sa mga lokal nilang tanggapan ang datos mula sa pamahalaang panlalawigan ng Bohol.

Tinanggal na ng PAGASA ang rainfall advisory na inisyu sa lahat ng forecast areas ng National Capital Region-Regional Services Division ng weather agency.

Gayunman, pinayuhan ang publiko at maging ang lahat ng Disaster Risk Reduction and Management offices na i-monitor ang lagay ng panahon sa kanilang lugar.

Batay sa 11:00 A.M. weather bulletin ng PAGASA, huling namataan ang bagyong Odette sa layong 380 kilometers kanluran hilagang-kanluran  ng Puerto Princesa City, Palawan o 155 kilometers silangan ng Pag-asa Island.

Napanatili naman ng bagyo ang lakas ng hanging aabot sa 155 kilometers bawat oras malapit sa gitna at pagbugsong aabot sa 190 kilometers kada oras.

Inaasahang lalabas na ng Philippine area of responsibility (PAR) ang bagyong Odette sa susunod na 24 na oras.

Nahigitan ng National Capital Region Police Office (NCRPO) ang iba pang rehiyon sa usapin ng pagresolba sa krimen at paglilinis sa mga lansangan sa Metro Manila.

Ito’y makaraang itanghal ang NCRPO bilang pangalawa sa pinakamataas na Regional Police Office kung saan umangat ang crime solution efficiency nito sa 4.73 %.

Mula kasi sa 77.89% noong Enero hanggang Nobyembre ng nakaraang taon ay humataw ito sa 82.62% sa kaparehong panahon ngayong 2021.

Nasungkit naman ng Region 11 ang unang puwesto habang pumangatlo ang Bangsamoro Autonomous Region.

Ayon kay NCRPO Director, Police Brig. General Vicente Danao Jr., nananatiling manageable ang crime situation sa Metro Manila.