Nakakulong ngayon ang isang tindero ng isda matapos mahulihan ng baril sa C5 Road, Brgy. New Lower Bicutan sa Taguig City.
Kinilala ang suspek na si Mark James Dela Cruz, 40 taong gulang at nakatira sa nasabing lugar.
Nabatid na nasita si dela Cruz sa inilatag na Oplan Bakal ng mga pulis kung saan nakuha mula rito ang isang kalibre .38 baril na may dalawang bala at isang sling bag.
Nakatakdang sampahan ng kaukulang kaso ang naturang suspek.
Nagwakas ang maliligayang araw ng dalawang hinihinalang tulak ng droga matapos madakip ng mga awtoridad sa Capistrano Extension, Hagonoy, Taguig City.
Ang mga suspek na sina Noel Ronquillo at Glenn Sanchez ay nahuli sa ikinasang anti-criminality operation sa nasabing lugar.
Nakumpiska mula sa kanila ang dalawang pakete ng umano’y shabu na nagkakahalaga ng 13,600 pesos.
Inihahanda na ang kaukulang kasong isasampa laban sa mga suspek.
Laglag sa kamay ng mga awtoridad ang isang kilabot umanong tulak ng droga sa ikinasang buy-bust operation sa San Miguel Street, Barangay Pembo, Makati City.
Ayon sa Makati PNP, nakilala ang suspek na si Elviro Aragon, 39 na taong gulang.
Bukod sa 500 pisong buy-bust money, nasabat din mula kay Aragon ang dalawang plastic sachets na naglalaman ng umano’y shabu at nagkakahalaga ng 61,200 pesos.
Sasampahan ang suspek ng kasong paglabag sa Comprehensive Dangerous Drugs Act.
Kulong ang isang mag-ama dahil sa umano’y pagtutulak ng droga sa Hontiveros Compound, Brgy. San Antonio, Parañaque City.
Kinilala ang mga suspek na sina Danilo Cachuela Tomas at Danilo Cachuela Tomas the second, parehong nakatira sa nasabing lugar.
Maliban sa isang libong pisong buy-bust money, nakumpiska din mula sa mga suspek ang tatlong daang pisong pera at ilang sachets ng umano’y shabu na nagkakahalaga ng 34,000 pesos.
Kasong paglabag sa comprehensive dangerous drugs act ang isasampa laban sa mga suspek.
ISINIWALAT ng Department of Health (DOH) na may na-detect itong ibang COVID-19 variant sa isang biyahero mula South Africa.
Sa isang public briefing, inilarawan ni Health Undersecretary Maria Rosario Vergeire ang variant bilang ‘B.1.1.203’ na aniya’y lumitaw sa biosurveillance results ng Philippine Genome Center o PGC.
Ngunit nilinaw naman ni Vergeire na hindi ito ang omicron na binabantayan ng mga eksperto at hindi rin ito maituturing na ‘variant of concern’.
Hindi naman binanggit ng opisyal kung nakikitaan ng mga sintomas ng COVID-19 ang pasyenteng nagpositibo sa bagong variant.
NASUNGKIT ng nag-iisang mananaya mula Laguna ang 83 million pesos na jackpot prize sa Mega Lotto 6/45.
Ayon sa Philippine Charity Sweepstakes Office o PCSO, natumbok ng masuwerteng bettor ang winning combination na 33-27-18-42-03-23.
Limampu’t tatlong mananaya naman ang nanalo ang 32,000 pesos bawat isa matapos mahulaan ang limang kumbinasyon.
Ang Mega Lotto 6/45 ay binobola tuwing Lunes, Miyerkules, at Biyernes.
HINIMOK ng Philippine Genome Center ang mga laboratoryo na accredited ng Department of Health o DOH na bilisan ang pagsusumite ng COVID-19 samples.
Ang panawagan ay ginawa ni PGC Executive Director Dr. Cynthia Saloma sa gitna ng paghahanda ng pamahalaan laban sa omicron variant.
Sinabi ni Saloma na kung magdodoble-kayod ang mga laboratoryo ay maaaring umabot sa 750 samples ang masusuri nila kada linggo.
Sa kasalukuyan, wala pang naitatalang kaso ng omicron variant sa Pilipinas pero may recorded cases na sa Thailand, Malaysia, Hong Kong, at Singapore na pawang katabi lamang ng ating bansa.
BINALASA ng Pangasinan Police ang mga nakatalagang pulis sa mga regional border checkpoints sa probinsya.
Ayon kay Provincial Police Officer-In-Charge, Col. Richmond Tadina, ginawa ang hakbang upang hindi na maulit ang umano’y extortion incident na kinasasangkutan ng isang alagad ng batas sa Barangay Pantol sa bayan ng Bayambang.
Matatandaang naaresto ng anti-scalawag unit ng Philippine National Police o PNP sa isang entrapment operation si Police Corporal Danile Penuliar ng Bayambang municipal police.
Nangongolekta umano si Penuliar ng limang daang piso sa mga motoristang walang vaccination card sa kanilang checkpoint area.
Umatras si Filipino boxer John Riel Casimero sa kanyang WBO bantamweight title defense laban kay Paul Butler ng United Kingdom sa Coca Cola Arena sa Dubai.
Ayon sa ulat, hindi nakasalang sa official weigh-in si Casimero matapos tamaan ng viral gastritis.
Napaulat naman na hinubaran na ng korona ang Pinoy boxing champion pero wala pang statement ang WBO ukol sa naturang usapin.
Kinoronahan bilang Miss Interglobal ang pambato ng Pilipinas na si Ms. Miriam Damoah.
Ito’y makaraang mag-resign ang Miss Thailand na si Nachita ‘Hera’ Jantana na siyang orihinal na nanalo sa pageant.
Sa isang statement na inilabas sa social media ng organizer, binanggit na ipinagbigay-alam sa kanila ni Jantana na hindi niya kayang gampanan ang tungkulin bilang Miss Interglobal 2021.
Dahil dito, awtomatikong iginawad kay Damoah ang korona na runner-up lamang sa pageant na ginanap noong December 5.