Pag-aaralang mabuti ng Metropolitan Manila Development Authority (MMDA) ang panukalang pagsasara ng EDSA-North Avenue intersection sa Quezon City.
Ayon kay MMDA Chairman Benhur Abalos, ang sinasabing proposal ng Department of Transportation (DOTr) na isara sa publiko ang isang bahagi ng intersection ay tatagal ng 30 araw.
Isinusulong umano ng DOTr ang ‘temporary closure’ ng kalsada upang mapabilis ang konstruksiyon ng Metro Rail Transit (MRT) Unified Grand Central Station.
Dalawang milyong doses pa ng Sinovac vaccine ang ido-donate ng China sa Philippine government.
Ayon kay Chinese Ambassador Huang Xilian, sa susunod na linggo inaasahang darating sa Pilipinas ang mga nasabing bakuna.
Aabot na sa mahigit 50 million doses na bakuna ang naipadala ng China sa bansa sa pamamagitan ng procurement at donasyon.
Wala nang COVID-19 patients sa ilang quarantine facilities sa Negros Occidental.
Ayon kay provincial inter-agency task force officer Rayfrando Diaz, tumatanggap na rin ng non-COVID patients ang mga district hospitals sa mga bayan ng Valladolid at Cadiz, gayundin ang Valeriano Gatuslao Memorial Hospital sa Himamaylan City.
Maliban dito, binanggit din ng provincial incident management team na 321 na lamang ang actives cases sa lalawigan na mas mababa kumpara sa 4,400 noong Oktubre ngayong taon.
Inihayag ng Philippine National Police (PNP) na isang lugar na lang sa Metro Manila ang nasa ilalim ng granular lockdown dahil sa COVID-19.
Batay sa report ng PNP, isang residential building sa Quezon City ang naka-lockdown dulot ng banta ng virus.
Nasa 24 na residente ang nakatira sa gusali na kasalukuyang binabantayan ng apat na pulis at apat na
force multipliers.
Mas mababa ito ng 96.96% kumpara sa 33 areas na isinailalim sa lockdown noong Nobyembre a-10.
Samantala, binanggit din ng PNP na sa kabuuan ay nasa 42 lugar ang naka-granular lockdown sa buong bansa na nakakaapekto sa 48 families o katumbas ng 136 individuals.
Mas pinaigting pa ng National Capital Region Police Office (NCRPO) ang mga operasyon ng Regional Task Group on Letter of Instruction (LOI) Bawi sa iba’t ibang bahagi ng rehiyon.
Katunayan, ayon kay NCRPO Chief Police Major General Vicente Danao Jr., matagumpay na nabawi ng task group ang isang Glock 9mm caliber pistol na may tatlong magasin mula sa isang AWOL na pulis sa Pasig.
Narekober din ng grupo ang isang Beretta 9mm pistol mula sa isang suspendidong pulis sa Tondo, Maynila at Glock 9mm na baril mula sa isa pang suspendidong alagad ng batas sa kaparehong lugar.
Kasabay nito, nagbabala naman si Danao na hindi niya hahayaang manatili pa sa hanay ng NCRPO ang mga abusado at adik na pulis.
Nahulog sa kamay ng mga awtoridad ang anim na drug personalities sa ikinasang buy-bust operation sa Sampaguita St., Brgy. San Dionisio, Parañaque City.
Kinilala ang ilan sa mga suspek na sina Armando Joaquin, Mark Anthony Pabua, Edmundo Cahoy, Arsenio Manaois, at dalawang iba pa.
Bukod sa isang libong pisong buy-bust money at siyam na raang pisong drug money, narekober din sa operasyon ang labing-anim na plastic sachets ng hinihinalang shabu at tinatayang ng nagkakahalaga ng 40,800 pesos.
Nakakulong na ang mga suspek sa custodial facility ng Parañaque Police at nakatakdang sampahan ng kaukulang kaso.
Kalaboso ang isang lolo dahil sa umano’y pagtutulak ng shabu sa Sta. Teresa, North Daang Hari, Taguig City.
Kinilala ang suspek na si Dennis Pecson, 61 taong gulang, isang empleyado ng Department of Foreign Affairs (DFA) at nakatira sa Parañaque City.
Maliban sa 200 pisong buy-bust money, nasabat din mula kay Pecson ang isang pitaka at higit 50,000 pisong halaga ng hinihinalang shabu.
Nakakulong na ngayon ang suspek at nakatakdang sampahan ng kasong paglabag sa Dangerous Drugs Act.
Nagwakas ang maliligayang araw ng isang umano’y drug pusher matapos madakip sa isinagawang buy-bust operation sa Williams St. Brgy. 13, Pasay City.
Nakakulong na ngayon ang suspek na si Mark Joseph Bernadas, tatlumpu’t apat na taong gulang, at nasa drug watchlist ng Pasay PNP.
Nakuha mula sa suspek ang nasa 36,000 pesos na halaga ng umano’y shabu, kasama ang ilang drug paraphernalia, at 500 pisong buy-bust money.
Kasong paglabag sa dangerous drugs act ang isasampa laban sa suspek.
Laglag sa kamay ng mga awtoridad ang tatlong drug suspects matapos mabitag sa buy-bust operation sa Gen. Luna St. Brgy. Ususan, Taguig City.
Ayon sa Taguig PNP, nakilala ang mga suspek na sina Joshua Guevarra, dalawampu’t tatlong taong gulang, Joanne Guevarra, dalawampu’t siyam na taong gulang, at isang Paolo Pascual, tatlumpung taong gulang, parehong residente ng lungsod.
Nasamsam sa operasyon ang tinatayang sampung gramo ng umano’y shabu na tinatayang nagkakahalaga ng 71,400 pesos, limang daang pisong buy-bust money at isang pitaka.
Nakakulong na ngayon ang mga suspek at nakatakdang sampahan ng kaukulang kaso.
Arestado ang isang hinihinalang kilabot na tulak ng droga matapos umanong mahuling nagbebenta ng shabu sa Brgy. Sta. Ana, Pateros.
Kinilala ang suspek na si Christian Jay Villagomez, 23 taong gulang, at kasama sa unified drugs watchlist ng pulisya.
Nasabat mula sa suspek ang halos 7,000 pisong halaga ng umano’y shabu, ilang drug paraphernalia, at tatlong daang pisong buy-bust money.
Nakatakdang sampahan ng kaukulang kaso ang naturang suspek.