PINATAOB ng Washington Wizards ang Utah Jazz sa kanilang laro sa NBA o National Basketball Association sa score na 109-103.
Bumida sa panig ng Wizards si Bradley Beal sa pamamagitan ng kanyang 37 points.
Dahil sa panalong ito, naputol ang four-game losing streak ng Washington habang nalugmok naman sa ikalawang sunod na pagkatalo ang Jazz.
PATAY ang 12 indibidwal habang sugatan naman ang dalawang iba pa matapos sumiklab ang panibagong karahasan sa Chiquix, Guatemala.
Ayon sa mga awtoridad, kabilang sa mga nasawi ang ilang babae, tatlong bata at isang pulis.
Posible umanong agawan sa lupa o land dispute ang ugat ng karahasan na matagal nang problema sa lugar.
Samantala, inirekomenda naman ng tanggapan ng Human Rights Ombudsman ang agarang pagpapaigting ng police visibility sa naturang village.
PINADAPA ng Toronto Raptors ang Golden State Warriors sa kanilang laban sa NBA sa score na 119-100.
Sina Fred VanVleet at Scottie Barnes ang nanguna sa Raptors makaraang kumamada ng pinagsamang 48 points.
Nabatid na walong manlalaro lamang ng Warriors ang humarap sa Toronto kaya’t nahirapan ito sa nasabing laban.
Kabilang sa mga hindi nakasalang sa laro sa panig ng Golden State si Jordan Poole dahil sa isyu sa health & safety protocols.
ARESTADO ang apat na miyembro ng Taguig Police habang patay naman ang kasabwat nitong sibilyan makaraang makipagbarilan sa mga awtoridad nang looban umano ng mga ito ang bahay ng isang Japanese national bago tinangay ang sampung milyong pisong pera sa Pasig City.
Hindi naman tinukoy ni National Capital Region Police Office o NCRPO chief Maj Gen. Vicente Danao Jr. ang pagkakakilanlan ng mga alagad ng batas na agad ding sinibak sa kanilang puwesto matapos ang insidente.
Sa imbestigasyon, pinasok umano ng mga nakasibilyan at armadong pulis ang tahanan ng dayuhan sa Barangay Kapitolyo bago binuksan ang vault na naglalaman ng sampung milyong pisong cash at agad na tumakas dala ang pera at gadgets ng biktima.
Mabilis namang nakapagsumbong sa mga nagpapatrulyang pulis sa lugar ang hapones kaya’t nagkaroon ng barilan na ikinasawi ng isang kasabwat na sibilyan at ikinasugat ng isa pang suspek.
Nakakulong na ngayon sa Pasig police station ang mga arestadong pulis at nahaharap sa kasong robbery-extortion.
INIHAYAG ni Negros Occidental Governor Eugenio Jose Lacson na magdedeklara ito ng State of Calamity sa buong probinsya.
Ito’y kasunod ng pananalasa ng bagyong Odette na kumitil sa buhay ng walong indibidwal at nakaapekto sa halos isang daang libong mamamayan sa lalawigan.
Sinabi ni Lacson na idedeklara ang state of calamity upang mas mapabilis ang paglalabas ng Quick Response Fund para sa mga nasalantang lugar.
KINUMPIRMA ng National Disaster Risk Reduction and Management Council (NDRRMC) na pumalo na sa 181,500 families sa 2,209 barangays ang apektado ng pananalasa ng Bagyong Odette.
Ayon sa NDRRMC, ang mga apektadong barangay ay mula sa Mimaropa, Regions 5 (Bicol), 6 (Western Visayas), 8 (Eastern Visayas), 10 (Northern Mindanao), 11 (Davao), 12 (Soccsksargen), 13 (Caraga), at Bangsamoro Autonomous Region in Muslim Mindanao (BARMM).
Binuksan naman ang tinatayang 2,861 evacuation centers kung saan pansamantalang tumutuloy dito ang 107,816 families o katumbas ng 427,903 individuals habang ang iba pa ay nanunuluyan sa kanilang mga kamag-anak at kaibigan.
Pinataob ng Houston Rockets ang Detroit Pistons sa score na 116-107 sa kanilang laro sa NBA.
Sinasabing ito na ang ika-labing-apat na sunod na pagkatalo ng Pistons.
Kumamada si Christian Wood ng 21 points para sa Rockets habang nagdagdag naman si Eric Gordon ng 18 points.
Wala pa ring suplay ng kuryente sa ilang bayan ng Antique kasunod ng pananalanta ng bagyong Odette na nagdulot ng total blackout sa probinsya.
Ayon kay Ruth Ann Fadrigo, information officer ng Antique Electric Cooperative o ANTECO, aabutin pa ng isang linggo bago maibalik nang tuluyan ang power supply sa mga munisipalidad ng San Jose de Buenavista, Anini-y at Tobias Fornier.
Nanawagan naman si Fadrigo sa mga residente na gumamit muna ng generator set, kung mayroon man, at tipirin ang battery charge ng kanilang mobile phones.
Magpapadala ng mga offshore patrol vessels ang Philippine Coast Guard o PCG sa mga rehiyon at probinsyang apektado ng bagyong Odette.
Nabatid na ang BRP Gabriela Silang ay tutulak patungong Surigao del Norte mula Port Area, Maynila bilang suporta sa relief operations ng pamahalaan.
Samantala, ang BRP Tubbataha sa Palawan at BRP Malabrigo sa Batangas ay maglalaan naman ng food packs, kumot, hygiene kits, at inuming tubig para sa mga pamilyang nasalanta ng bagyo sa Visayas.
Tiniyak ng mga power stakeholders sa Cebu na maibabalik nila ang suplay ng kuryente sa ilang bahagi ng probinsya sa loob ng isang linggo.
Ito’y makaraang makipagpulong kay Cebu Governor Gwendolyn Garcia ang mga kinatawan mula sa Visayan Electric Co. (VECO), Cebu Electric Cooperative (CEBECO), at National Grid Corporation of the Philippines (NGCP) kasunod ng pananalasa ng bagyong Odette.
Ayon kay VECO president Raul Lucero, patuloy ang ginagawa nilang clearing operations at assessment sa mga apektadong poste ng kuryente.