Gilbert Perdez

Sa kauna-unahang pagkakataon ay bumaba mula sa kanilang komunidad ang mga miyembro ng Socorro Bayanihan Services Inc. O SBSI para makiisa sa bloodletting program ng lokal na pamahalaan ng Socorro, Surigao del Norte.

Ang grupo ay pinangunahan ng kanilang OIC o officer-in-charge na si Johanne Lasala na nag-donate din ng dugo.

Matatandaang sinisi ng ilang miyembro ng SBSI ang kanilang lider na si Jey Rence Quilario o “Senior Agila” sa pagkamatay ng kanilang mga anak matapos umano silang pagbawalang magpatingin sa duktor o magpagamot.

Maliban dito, sinasabing pinagbabawalan ding magpabakuna ang mga miyembro ng naturang grupo.

Tutulak patungong Australia si Pang. Ferdinand Marcos Jr. sa darating na Miyerkules, Pebrero 28.

Ayon sa Presidential Communications Office o PCO, nakatakdang magsalita si PBBM sa Australian Parliament.

Inaasahang tatalakayin ng Pangulo sa kanyang pagsasalita sa parliyamento ang strategic partnership sa pagitan ng Pilipinas at Australia na nilagdaan noong nakaraang taon.

Nabatid na may mga hiwalay ding pulong ang Presidente kasama ang mga senior officials ng Australia kung saan pag-uusapan ang ilang usapin tulad ng depensa at seguridad, kalakalan, pamumuhunan, people-to-people exchanges, multilateral cooperation, at regional issues.

Samantala, inaasahan ding pipirmahan ang mga bagong kasunduan sa ilang larangan upang mas mapalawak ang mutual capacity-building sa pagitan ng dalawang bansa.

Sa Nobyembre ng taong ito, nakatakdang ipagdiwang ang ika-78 anibersaryo ng diplomatic relations ng Pilipinas at Australia.

Mahigit 500 volunteers mula sa Philippine College of Criminology o PCCR ang nakilahok sa isinagawang coastal cleanup sa Baseco Beach sa Port Area, Maynila.

Ito’y bilang suporta sa “Kalinisan sa Bagong Pilipinas” program ng administrasyong Marcos.

Ayon kay PCCR Community Extension and Services chief Vincent Jerome Agustin, kabilang sa mga nilinis nila ang mga kalsada, kanal, pamilihan at paaralan.

Sinabi ni Agustin na bahagi ito ng pakikiisa nila sa hangarin ng pamahalaan ni Pang. Ferdinand Marcos Jr. na ibalik ang kagandahan at sigla ng Manila Bay.

Nagpasalamat naman ang PCCR sa suporta ng mga opisyal ng Philippine Reclamation Authority o PRA, kasama si Manila Vice Mayor Yul Servo Nieto at mga opisyal ng Barangay 649.

Nanawagan si Pangulong Ferdinand Marcos Jr. sa mga Pilipino na magtulong-tulong para protektahan ang mga yamang dagat sa bansa.

Sa kanyang talumpati na binasa ni Department of Tourism Secretary Christina Frasco  sa pagbubukas ng Philippine International Dive Expo o PHIDEX 2024 sa Pasay City, nangako si PBBM na pananatilihin niya ang katayuan ng Pilipinas bilang hotspot ng biodiversity at underwater adventure sa pamamagitan ng strategic investment at sustainable tourism.

Kasabay nito, binigyang diin ng  Pangulo ang kahalagahan ng partisipasyon ng pribadong sektor sa pagtiyak na ang bansa ay mananatili bilang nangungunang destinasyon para sa mga diving enthusiasts at professionals mula sa buong mundo.

Matatandaang itinanghal ng World Travel Awards 2023 ang Pilipinas bilang leading beach destination at leading dive destination sa mundo noong Disyembre 2023.

Pinatawan ng 90-day preventive suspension ng Office of the President (OP) ang isang komisyoner ng National Commission on of Senior Citizens (NCSC) dahil sa iba’t ibang reklamo.

Batay sa apat na pahinang notice of charge na pirmado ni Executive Sec. Lucas Bersamin at may petsang Pebrero 2, 2024, binanggit na epektibo ang suspensiyon laban kay Comm. Reymar Mansilungan pagkatapos nitong matanggap ang abiso.

Nag-ugat ang suspensiyon kay Mansilungan sa reklamo nina Senior Citizen Party-list Reps. Rodolfo “Ompong” Ordanes at Miguelito Garcia, kabilang ang serious dishonesty, gross neglect of duty, grave misconduct, gross insubordination, at conduct prejudicial to the best interest of the service.

Kasunod ng ikinasang preliminary investigation, lumitaw umano na may mga sapat na basehan ang mga alegasyon laban kay Mansilungan.

Napag-alaman na mali ang inilagay na educational attainment ni Mansilungan sa kanyang aplikasyon bilang komisyoner ng NCSC habang sinasabing tumanggap din ito ng bayad mula sa pondo ng gobyerno sa pag-upa sa isang bahay sa Lucena City nang walang resibo.

Maliban dito, inakusahan din si Mansilungan ng paggamit ng pondo ng ahensya para sa kanyang mga pagkain at mga nakakalasing na inumin.

Naglunsad ng pa-contest ang MRT-3 na pinamagatang ‘Emotero at Emotera sa Love Train’.

Ayon sa abiso ng MRT, inaanyayahan ang  mga mananakay na mag-post ng pinaka-cute, pinakamaganda at pinaka-creative nilang entry sa kanilang Facebook profile at gamitin ang official hashtag na #EmoteroAtEmotera #MRT3LoveTrain.

Para makasali, dapat ay i-like at i-share ang official #EmoteroAtEmotera graphics/posting sa inyong FB timeline at mag-tag ng limang FB friends.

Nabatid na ang tatlong mapipili na pinaka-cute, pinakamaganda at pinaka-creative na ‘Emotero at Emotera sa Love Train’ ay makakatanggap ng 1,000 pesos, 2,000 pesos at 3,000 pesos worth ng gift certificates.

Samantala, maaaring magsumite ng entry hanggang alas-dose ng tanghali ngayong Pebrero 12, araw ng Lunes.

Nasabat ng Philippine Drug Enforcement Agency ( PDEA ) ang 375,000 pesos na halaga ng hinihinalang shabu mula sa isang umano’y empleyado ng Bangsamoro government sa Cotabato City.

Kinilala ni PDEA-Bangsamoro Autonomous Region Director Gil Cesario Castro ang suspek na si Marco Abdul Saban  na nasakote sa Barangay Mother Tamontaka.

Nahuli si Saban sa tulong ng mga elemento  ng Police Regional Office-BARMM at isang senior personnel ng City Police Office na nagbunyag na nagtatrabaho ang suspek sa isa sa mga ahensya sa ilalim ng Bangsamoro region.

Mahaharap si Saba sa reklamong paglabag sa Comprehensive Dangerous Drugs Act of 2002.

Binatikos ng Free Legal Assistance Group (FLAG )ang isinagawang warrantless arrest laban kay film director Jade Castro at apat na iba pa.

Ayon kay FLAG chairperson, Atty. Chel Diokno, hindi nasunod ang ilang rekisitos sa pag-aresto kay Castro nang walang mandamiento de aresto.

Aniya, hindi naman kasi nahuli sa akto si Castro at iba pa habang ginagawa ang isang krimen, walang lehitimong hot pursuit operation, at hindi rin sila tumakas mula sa kulungan.

Matatandaang dinakip si Castro at apat na iba pa matapos masangkot sa umano’y panununog sa isang modern jeepney sa Catanauan, Quezon Province noong Enero 31 na itinanggi naman ng mga ito.

Hinikayat ni Pangulong Ferdinand Marcos Jr. ang lahat na magbalik-tanaw sa mga tagumpay noong nakaraang taon.

Ginawa ni PBBM ang panawagan kasabay ng  pagbati nito sa mga Filipino-Chinese sa pagdiriwang ng Chinese new year ngayong araw.

Ayon sa pangulo, umaasa siya na ang mga tagumpay ng 2023 ay magpapalakas sa ‘pagnanais at pag-asa’ ng lahat sa pag-angat at pagsulong ng bansa sa mas mataas na antas ngayong ‘year of the wood dragon’.

Kasabay nito, hinimok din ni Pangulong Marcos ang lahat na yakapin ang puso ng Dragon na sumisimbolo sa lakas, tapang at kapangyarihan sa gitna ng anumang posibilidad na magaganap ngayong taon.

Umaasa rin ang presidente na ang mga  tagumpay ng nagdaang taon ay magsisilbing ningas para mas maging masigasig at positibo pa ngayong 2024 at mas lalo pang maiangat ang bansa.

Inatasan ng Department of the Interior and Local Government o DILG ang mahigit 2,000  Local Government Units  (LGUs) na isurender ang mga baril na nakapangalan sa kanila.

Ito’y batay sa memo na nilagdaan ni Interior Secretary Benhur Abalos kung saan saklaw nito ang 2,247 LGUs sa buong bansa, kabilang ang mga barangay, na mayroong mga baril na paso na ang rehistro.

Pinaalalahanan ni Abalos ang mga lokal na pamahalaan na sumunod sa batas at ideposito ang kanilang mga baril ‘for safekeeping’ upang mabawasan ang pagkalat ng loose firearms sa bansa.

Kasabay  nito, ipinag-utos din ng DILG sa Philippine National Police na asistehan o alalayan ang mga LGUs sa pagsunod sa nasabing direktiba.