Gilbert Perdez

Maari nang mag-apply para magkaroon ng Civil Service Eligibility ang mga Job Order (JO) , contractual, casual at co-terminus employees na nagtatrabaho sa gobyerno ng kahit 10  taon.

Ito’y batay sa Resolution No. 2301123 ng Civil Service Commission o CSC kung saan saklaw nito ang JO, Contract of Service, Casual, Contractual, Coterminous status na may Category III at Category IV positions at career service employees na may first level eligibility.

Ang mga interesadong manggagawa na nais magkaroon ng Career Service Eligibility-Preference Rating o CSE-PR ay dapat sumalang sa nakatakdang Civil Service Examinations simula Marso 3 at dapat makakuha ng general rating na hindi bababa sa 70.

Sa ilalim ng resolusyon, ang mga manggagawa na nabigyan na ng CSE-PR ay awtomatikong magkakaroon ng 10 points sa CSC exam kaya’t 70 na lang ang kailangan nitong bunuin para makuha ang passing rate na 80.

Gumagamit na ng explosives at narcotics detection dogs ang mga pulis na nagbabantay sa Cotabato Airport matapos masabat ang bulto-bultong shabu sa Cotabato City at sa ilang bayan nitong mga nakaraang linggo.

Ayon sa Aviation Security Explosives and Canine Unit ng Philippine National Police, ang mas pinaigting na K9 anti-terror at  anti-illegal drugs operation ay bahagi ng joint police-military effort para protektahan ang paliparan na hinihinalang ginagamit bilang transshipment point ng mga sindikato ng droga at terorista.

Sinabi naman ni 6th Infantry Division commander Major Gen. Alex Rillera na patuloy ang paghihigpit nila ng seguridad upang mapigilan ang posibleng paghahasik ng kaguluhan ng Dawlah Islamiya at Bangsamoro Islamic Freedom Fighters o BIFF.

Pumanaw na si dating Ambassador Lauro Liboon Baja Jr. sa edad na 86 taong gulang.

Ayon sa pamangkin ni Baja na si Philippine Ambassador to Morocco Leslie Baja, inatake sa puso ang dating envoy noong Pebrero 8.

Si Baja ay naging ambassador ng Pilipinas sa Italy, Brazil, at maging sa UN nang makakuha ng upuan ang bansa sa UN Security Council mula 2004 hanggang 2006.

Nabatid na ihahatid sa kanyang huling hantungan si Baja sa The Heritage Memorial Park sa Taguig City.

DADALAW sa Malacañang si United Nations Special Rapporteur Irene Khan.

Kinumpirma ito ng Presidential Task Force on Media Security (PTFoMS) kung saan inaasahang makikipagpulong si Khan kay Executive Secretary Lucas Bersamin.

Ayon sa PTFoMS, ang pagpupulong ay nakatakdang gawin bandang alas-4:00 ngayong Huwebes ng hapon sa Bonifacio Hall ng Palasyo.

Si Khan ay narito sa Pilipinas para sa isang 10-araw na pagbisita upang suriin ang mga mekanismo ng karapatang pantao sa bansa na nakatuon lalo na sa
freedom of opinion and expression.

Ngunit hindi tinukoy ng task force kung pag-uusapan nina Khan at Bersamin ang mga isyu kaugnay ng madugong operasyon laban sa ipinagbabawal na gamot ng nakaraang administrasyon.

Lalong naging matatag ang relasyon sa depensa sa pagitan ng Pilipinas at Canada.

Ito’y matapos lagdaan ng mga opisyal ng dalawang bansa ang Memorandum of Understanding (MOU) na may kinalaman sa defense cooperation.

Nagpahayag naman ng kasiyahan si Defense Secretary Gilberto Teodoro Jr. sa ‘matibay na pangako’ na ipinakita ng dalawang bansa sa pagpapalalim ng kanilang ugnayan sa depensa.

Samantala, ipinaabot naman ni Canadian Ambassador to the Philippines David Bruce Hartman ang intensyon ng kanilang bansa na paunlarin pa ang ugnayan sa Pilipinas at sa rehiyon, sang-ayon na rin sa Indo-Pacific Strategy.

Ikinababahala ni Vice President at Education Sec. Sara Duterte ang inilabas na travel advisory ng pamahalaan ng Canada laban sa pagbiyahe sa ilang bahagi ng Pilipinas.

Ang pahayag ay ginawa ni Duterte matapos balaan ng Canada ang kanilang mga mamamayan na iwasang bumiyahe sa ilang lugar sa bansa dahil sa umano’y mga  insidente ng krimen, terorismo, armadong sagupaan, at kidnapping.

Kabilang sa mga lugar na ito ang Davao de Oro, Davao del Norte, Davao del Sur (maliban sa Davao City), Davao Occidental, Davao Oriental, Basilan, Sulu, Tawi-Tawi, Lanao del Sur, Maguindanao, Bukidnon, Camiguin, Lanao del Norte, Misamis Occidental, Misamis Oriental, Cotabato at Sarangani.

Tinukoy din ang South Cotabato, Sultan Kudarat, Zamboanga del Sur, Zamboanga del Norte, Zamboanga Sibugay, Agusan del Norte, Agusan del Sur, Dinagat Islands, at Surigao del Norte, maliban sa Siargao Island at Surigao del Sur.

Samantala, sinabi ni Duterte na ang mas higit na nakakabahala ay ang mga pangamba na maaaring hudyat lamang ito ng mas seryosong mga problema sa seguridad at kaayusan sa ating mga komunidad.

Isiniwalat ni Vice Pres. Sara Duterte na ‘pera kapalit ng pirma para sa people’s initiative’  ay patuloy na nangyayari araw-araw sa siyudad ng Davao at sa iba pang bahagi ng bansa.

Ayon kay Duterte, isa itong repleksyon ng pagkahilig ng mga pulitiko na bumili ng boto tuwing eleksyon at pagsasamantala sa kahirapan ng ating mga mamamayan at kawalan ng respeto sa kanilang karapatan na magdesisyon nang malaya, walang takot, o impluwensya gamit ang salapi.

Subalit ibinabala ni Duterte na maaaring ang sukli sa suhol kapalit ng pirma sa people’s initiative ay may seryosong consequences sa buhay, kalayaan, at kinabukasan ng mga Pinoy.

Aniya, ang patuloy na pagsulong sa people’s initiative at charter change ay masakit na palatandaan sa kabiguang matukoy ang tunay na mga  problema ng mga Pilipino at solusyunan ang mga ito.

Patuloy na lilinisin ng Philippine National Police (PNP) ang mga ‘bulok na itlog’ sa kanilang hanay na sumisira at nagbibigay ng kahihiyan sa imahe ng pulisya.

Ito ang binigyang diin ni PNP chief Gen. Benjamin Acorda Jr. matapos madakip sa magkahiwalay na buy-bust operations ang dalawang pulis sa San Fernando, Pampanga, at Cagayan de Oro City.

Sa 71st founding anniversary ng Criminal Investigation and Detection Group o CIDG sa Camp Crame, sinabi ni Acorda na walang puwang sa PNP ang mga iskalawag na pulis na nagkukubli sa kanilang uniporme.

Hanggang nitong Enero 1, umabot na sa labing-anim na police personnel ang nasibak dahil sa iba’t ibang krimen.

Nilinaw ng pamahalaan na hindi ‘exempted’ ang Davao City sa public utility vehicle modernization program (PUVMP) .

Ayon sa Department of Transportation o DOTr, ang Davao Public Transport Modernization Project o Davao Bus ay expanded version  ng EDSA Busway kung saan mayroon itong sariling bus lanes, depots at terminals.

Ginawa ng DOTr ang paglilinaw matapos mapaulat na hindi maaapektuhan ng modernisasyon ang mga jeepney sa lungsod.

Pinondohan ng Asian Development Bank o ADB, ang Davao Bus project ay mayroong anim na ruta na kokonekta sa Davao City, Panabo City, at Davao del Norte.

Ibinida ng pamahalaan na kabilang na ngayon ang mga homeless na pawang sa mga kalsada lamang nakatira sa mabebenepisyuhan ng Pag-abot Program ng  Department of Social Welfare and Development (DSWD).

Ito’y matapos maglabas ng Executive Order No. 52 si Pangulong Ferdinand Marcos Jr. na naglalayong mailayo ang mga street dwellers at iba pang mahihirap mula sa kalsada at matulungan na maging produktibong miyembro ng lipunan.

Pahayag ng Pangulo, hindi lamang financial assistance ang kabilang sa assistance packages sa ilalim ng Pag-abot Program, kundi mayroon ding relocation, transitory shelter assistance, livelihood, at maging employment assistance habang magkakaloob din ng psychosocial support.

Sa ilalim ng EO, magkakaroon ng Inter-Agency Committee na titiyak sa implementasyon ng programa na pamumunuan ng kalihim ng DSWD habang magsisilbing Vice Chairman ang DILG secretary.

Sinabi ng Pangulo na ang programa ay magbibigay ng katiyakan para sa epektibong pagbibigay ng serbisyo patungo sa pagsugpo ng kahirapan.