Gilbert Perdez

INIHAYAG ni Pangulong Ferdinand “Bongbong” Marcos Jr. na interesado ito sa waste-to-energy projects.

Sa kanyang talumpati sa harap ng mga malalaking negosyante sa Brunei na bahagi ng major players ng energy sector, ipinaabot ni PBBM ang intensyon na gumamit ang Pilipinas ng pinakabagong state-of-the-art technology para sa transition mula sa paggamit ng fossil fuels patungo sa renewables.

“There’s a great deal of interest in that (waste to energy). But right now, it is not at the very macro level. It’s very much at the micro level. Yeah, it’s basically local governments because there is the problem, the attendant problem of what do we do with our waste?” pahayag ni Pangulong Marcos.

Inamin naman ni Pangulong Marcos na kailangan ng akmang imprastraktura para mapakinabangan ang mga basura at gawing enerhiya kung kaya kailangan ang tulong mula sa local government units.

Maliban dito, kailangan din aniyang ayusin ang garbage collection.

“But I think the legislators are coming around to the understanding that there actually are viable and clean solutions to the problem of waste disposal. So you take care of two very difficult problems at the same time,” dagdag ng Pangulo.

Kasama rin sa mga nakapulong ni Pangulong Marcos ang mga negosyante mula sa Brunei Shell Petroleum
Company Sdn. Bhd (BSP), Brunei LNG Sdn. Bhd (BLNG), Total Energies in BruneI, Serikandi Oilfield Services Sdn Bhd, at Adinin Group of Companies.

Samantala, sumentro ang pag-usap sa oportunidad sa renewable energy sector. (Gilbert Perdez)

PINURI ni Pangulong Ferdinand Marcos Jr. ang National Grid Corporation of the Philippines (NGCP) matapos makumpleto ang Cebu-Negros-Panay (CNP) Backbone Project na kanyang inilarawan bilang isang mahalagang kaganapan sa pagsisikap nitong matamo ng bansa ang matatag at maaasahang power infrastructure.

Ginawa ni PBBM ang pahayag matapos pangunahan ang inagurasyon at sabayang pagpapagana ng CNP sa Bacolod City, Negros Occidental.

Ayon sa Pangulo, dapat kilalanin ang NGCP para sa matagumpay na pagtatapos ng 230 kilovolt backbone project na aniya’y nagpapakita ng matibay nitong pangako sa pamahalaan na ma-empower ang mga komunidad, mapalakas ang connectivity at magkaroon ng magandang kinabukasan para sa mga susunod na henerasyon.

“We must recognize NGCP for the successful completion of this CNP. The completion of this project is a milestone in our pursuit to enhance the resilience and reliability of our power infrastructure, especially in this area,” ayon kay Marcos.

Maliban sa pagkakaroon ng matibay na sistema ng transmisyon, binigyang-diin ni Pangulong Marcos ang pangangailangan para sa mas maraming power generation sa Visayas upang mapanatili ang pangangailangan ng lugar, kasabay ng panawagan sa mga stakeholders na tukuyin ang mga angkop na lokasyon na maaaring mag-host ng mga bagong baseload generation plants, renewable energy at energy storage systems.

“This will bolster energy sufficiency and sustainability in Negros and Panay,” sabi ng Presidente.

Kasabay nito, pinuri rin ng Pangulo ang pagsasanib-pwersa ng mga ahensya ng gobyerno, lokal na pamahalaan, at mga pribadong may-ari ng lupa, lalo na sa pag-iisyu ng mga permit para sa mga proyekto sa enerhiya, at pagpapabilis ng pagkuha ng right of way (ROW) para sa sistema ng transmisyon at distribusyon.

“This project serves as a testament to the fruits that we can all harvest if we continue to work together to drive our nation’s energy agenda and forge a more sustainable future for the Filipino people,” dagdag pa ni PBBM.

Samantala, sinabi naman ni Atty. Cynthia Alabanza, Assistant Vice President (AVP) at head ng Public Relations Department ng NGCP, na ang CNP ay makakatulong sa pagpapalakas ng resistensya ng Visayas sa panahon ng mga power interruptions.

Aniya, para maiwasan ang blackout at magkaroon ng tuloy-tuloy na suplay ng kuryente, mahalagang magkaroon pa ng mga planta sa rehiyon.

“Pero hindi lang tayo d’yan dapat nakasalalay. Kailangan natin ng mas maraming stable power supply in each island para maiwasan na ang blackout,” pahayag ni Alabanza.

Nakatakdang lagdaan ni Pangulong Ferdinand Marcos Jr. ang panukalang batas na magkakaloob ng benepisyo para sa mga Filipino octogenarians at nonagenarians, maliban sa mga centenarians.

Nagpasalamat naman kay PBBM si Sen. Bong Revilla, principal author ng bill, sa napipintong pagsasabatas ng pangunahing panukala upang amyendahan ang Centenarians Law.

Sinabi ni Revilla na maituturing itong tagumpay sa matagal na niyang ipinaglalaban para sa mga lolo at lola.

Sa ilalim ng proposed measure, lahat ng mga Pilipino na may edad na 80, 85, 90, at 95 ay pagkakalooban ng cash gift na nagkakahalaga ng P10,000 habang patuloy pa ring makakatanggap ng P100,000 ang mga 100 taong gulang.

Muling bubuksan ng Taiwan sa darating na Hunyo ang internship program nito para sa panibagong batch ng mga kabataang Filipino farmers.

Ayon sa Taipei Economic and Cultural Office o TECO, ang mga natanggap na aplikasyon mula sa unang Filipino Young Farmer Internship Program in Taiwan o FYFIPT ay kasalukuyan pang nire-review.

Ang internship program ay magkatuwang na itinataguyod ng TECO at Manila Economic and Cultural Office o MECO sa pakikipagtulungan ng Philippine Agricultural Training Institute of the Department of Agriculture o DA-ATI mula pa noong 2021.

Sa ilalim ng programa, tinuturuan ang mga kabataang magsasaka mula sa Pilipinas  upang maging farmer leaders at agricultural entrepreneurs sa pamamagitan ng internships sa Taiwan.

Hinikayat ng Civil Service Commission o CSC ang mga ahensya ng gobyerno sa Metro Manila na magpatupad ng Flexible Working Arrangements o FWAs bilang suporta sa mga inisyatibo sa pagpapaluwag ng daloy ng trapiko.

Ayon kay CSC Chairperson Karlo Nograles, ang National Capital Region o NCR ang may pinakamaraming government workers sa buong bansa na nasa mahigit apat na raang libo (440,009) o 22.30 percent ng career at non-career personnel.

Sinabi ni Nograles na dahil sa kondisyon ng trapiko sa Kalakhang Maynila ay apektado ang productivity ng mga kawani ng gobyerno.

Aniya, sa pamamagitan ng pagpapatupad ng FWAs ay mas magiging epektibo ang mga manggagawa  sa kanilang trabaho at masisiguro rin ang kanilang kapakanan at kaligtasan.

Subalit nilinaw naman ni Nograles na ang implementasyon ng flexible working arrangements ay nasa discretion pa rin ng ‘head of the agency’ kung saan dapat aniyang tuloy-tuloy ang serbisyo ng ahensya mula alas-8:00 ng umaga hanggang alas-5:00 ng hapon sa isang buong linggo.

Inaasahang aaprubahan na ng Metro Manila Council o MMC ang panukalang patawan ng multa ang mga e-bikes at e-tricycles na dumadaan sa national roads.

Ito ang inanunsiyo ng Metropolitan Manila Development Authority o MMDA kasunod na rin ng proposal nito na i-regulate ang mga de-bateryang sasakyan.

Ayon kay MMDA Director for Traffic Enforcement Group Atty. Victor Nuñez, nagpulong na ang technical working group o TWG hinggil dito kung saan nagkasundo aniya ang mga miyembro na magkaroon ng tamang regulasyon dito.

Ipinunto ni Nunez na may inilabas nang administrative order ang  Land Transportation Office o LTO noong 2021 na may kinalaman sa guidelines para sa mga e-vehicles, e-bikes, e-motorcycles, at e-trikes.

Gayunman, hindi binanggit ni  Nuñez ang mga penalties o fines laban sa mga lalabag dito.