Gilbert Perdez

Inilarga na ng Land Transportation Franchising and Regulatory Board (LTFRB) ang pamamahagi ng ‘Pantawid Pasada’ fuel voucher cards sa mga drayber ng public utility jeepney (PUJ) at operators sa iba’t ibang sangay ng LTFRB sa buong bansa.

Ayon kay LTFRB Chairman Martin Delgra III, layon ng programa na maibsan ang matinding epekto ng serye ng oil price increases at mataas na excise taxes bunga ng tax reform for acceleration and inclusion o TRAIN law.

Sinasabing ang lumpsum subsidy na P5,000 ay ipamimigay sa halos 200,000 ‘legitimate PUJ franchise holders’ hanggang sa katapusan ng taong kasalukuyan.

Magugunitang inilunsad na ng LTFRB ang distribusyon ng pantawid pasada cards noong Hunyo 17 sa kalakhang Maynila.

—-

Ibinunyag ng Department of Foreign Affairs o DFA na dumarami ang bilang ng mga Filipino workers na pumupuslit papasok ng Iraq mula Dubai.

Ayon kay DFA Assistant Secretary Elmer Cato, ini-ulat ng Philippine Embassy sa Baghdad na nitong nakaraang linggo lamang ay nakapagtala sila ng siyam na Pinay na iligal na pumasok sa Iraq makaraang dumaan sa Kurdistan region.

Ilan naman umano sa mga ito ay nabiktima pa ng sexual harassment habang bumibiyahe patungong Baghdad at Basra.

Sinasabing karamihan sa mga biktima ay nakukuha ng mga illegal recruiters sa social media at pinangangakuan ng trabaho sa Dubai.

Naniningil din umano ang mga recruiter ng malaking halaga kapalit ng return ticket pauwi ng bansa kapag na-expire na ang kanilang tourism visa.

Laya na ang tatlong abogadong inaresto ng mga awtoridad sa kasagsagan ng paghahalughog nila sa isang bar sa lungsod ng Makati.

Sina Atty. Lenie Rocel Rocha, Atty. Jan Vincent Soliven, at Atty. Romulo Bernard Alarcon ay nahaharap sa mga kasong ‘obstruction of justice’, ‘pagpasok sa police line’, ‘resistance and disobedience upon agents of authorities’, at ‘constructive possession of illegal drugs’.

Pahayag naman ni Atty. Diane Desierto, non-resident partner ng tatlo sa law firm, lumaya na ang mga ito pasado alas-8 kagabi.

Maaalalang hinuli ang tatlong abogado matapos umanong tangkaing pigilan at guluhin ang mga pulis habang hinahalughog ang Time Bar na pag-aari ng kanilang kliyente.

Tinatayang 6.5 million pesos na halaga ng hinihinalang shabu ang nasabat ng mga awtoridad mula sa dalawang tulak ng droga sa ikinasang drug buy-bust operation sa New Antipolo St., Tondo, Maynila.

Kinilala ni National Capital Region Police Office Acting Director Guillermo Eleazar ang mga suspek na sina Girlie Lopez at Leah Carpio, kapwa residente sa nabanggit na lugar.

Ayon kay Eleazar, matagumpay na nakabili ng 5,000 pesos na halaga ng shabu mula sa dalawang suspek ang isang operatiba na nagpanggap na buyer at nang magkaabutan na ng pera at droga, mabilis na dinamba at pinosasan sina Lopez at Carpio.

Nakuha mula sa kanila ang 19 na pakete ng droga na tumitimbang ng halos isang kilo, kasama na rito ang buy-bust money.

Sasampahan ang mga suspek ng kasong paglabag sa Dangerous Drugs Act.

Nasakote ng mga operatiba ng National Bureau of Investigation ang isang illegal recruiter makaraang ireklamo dahil sa umano’y paniningil ng 25,000 pesos na processing fees kapalit ng trabaho bilang hotel staff sa Doha, Qatar.

Ayon kay NBI Director Dante Gierran, ang suspek na si Sarah Jane Esteban ay nadakip ng NBI International Airport Investigation Unit o NBI-IAIU nang magreklamo ang mga biktima.

Binigyan muna ni Esteban ang mga biktima ng tourist visas patungong Malaysia at pagkatapos ay nangakong doon na sila bibigyan ng proper working papers patungong Qatar.

Pero agad na dinampot ng mga ahente ng NBI si Esteban makaraang magsumbong ang mga biktima nang ma-offload sila sa kanilang flight.