Gilbert Perdez

Nakaamba na namang tumaas ang presyo ng mga produktong petrolyo simula sa darating na Martes.

Ayon sa mga source mula sa industriya, maglalaro sa 0.20 hanggang 0.40 kada litro ang magiging dagdag-presyo sa gasolina.

Papalo naman sa 0.10 hanggang 0.20 kada litro ang imamahal sa diesel at kerosene.

Isiniwalat naman ng ilang kompanya ng langis na sumipa raw ang halaga ng ethanol kaya posibleng makadagdag pa ito sa pagmahal ng imported na gasolina.

Wala pang pahayag ang Department of Energy o DOE hinggil sa napipintong oil price hike.

Bagama’t nakalabas na ng bansa ang Bagyong Ompong, oil price hike naman ang hahagupit sa mga motorista sa susunod na linggo.

Ayon sa mga source mula sa industriya, maglalaro mula singkwenta sentimos hanggang anim na pung sentimos ang taas-presyo sa kada litro ng gasolina habang sampu hanggang dalawampung sentimos naman sa bawat litro ng diesel.

Papalo naman sa sampu hanggang dalawampung sentimos ang magiging dagdag-singil sa kada litro ng gas o kerosene.

Higit dalawang piso na ang iminahal ng gasolina, diesel, at gas sa loob lamang ng limang linggong magkakasunod na oil price hikes mula noong nakaraang buwan.

Tulad ng inaasahan, ang oil price adjustments ay dulot pa rin ng paggalaw ng presyo ng langis sa pandaigdigang merkado.

Planong bisitahin ni Pangulong Rodrigo Duterte ang mga lugar na sinalanta ng Bagyong Ompong.

Ayon kay Special Assistant to the President Bong Go, unang dadalawin ng Pangulo ang mga accessible o pinakamadaling puntahan na lalawigan.

Magugunitang dumalo si Duterte sa isinagawang command conference kasama ang mga ahensya ng pamahalaan bago nag-landfall ang bagyo.

Subalit mula noon ay hindi na nagpakita sa publiko si Pangulong Duterte hanggang sa manalanta si Ompong.

Inihayag ng Department of Foreign Affairs o DFA na iniimbestigahan na ng Philippine Embassy sa Wellington ang sinasabing ‘exploitation’ o pananamantalang nararanasan ng mga manggagawang Pinoy sa New Zealand.

Ayon kay DFA Assistant Secretary Elmer Cato, nakipagpulong na ang mga kinatawan ng embahada sa mga apektadong Overseas Filipino Workers (OFWs) sa naturang bansa.

Una nang natuklasan sa pag-aaral ng Etū Union na tinatayang 45 Filipino respondents ang nalalantad sa nabanggit na karanasan.

Sinasabing nasa 16 hanggang 19 US dollars lamang kada oras ang natatanggap na sahod ng ilang Filipino construction workers na malayo kumpara sa suweldo ng mga residente sa lugar na 35 US dollars kada oras.

—-

Nanawagan si Senate Minority Leader Franklin Drilon kay Senior Associate Justice Antonio Carpio na tanggapin ang kanyang napipintong nominasyon ng Judicial and Bar Council o JBC bilang susunod na Punong Mahistrado.

Ayon kay Drilon, hindi na ‘applicable’ ang paliwanag ni Carpio nang tanggihan niya ang nauna niyang nominasyon.

Si Carpio ay kabilang sa limang senior justices ng mataas na hukuman na awtomatikong nominado bilang susunod na Chief Justice kapalit ni Teresita Leonardo-De Castro na magreretiro sa Oktubre.

Magugunitang idinahilan ni Carpio na ayaw niyang makinabang sa nangyaring pagpapatalsik sa puwesto kay dating Chief Justice Maria Lourdes Sereno kaya tinanggihan niya ang naturang nominasyon.

—-

Muling nag-donate ang Japanese government ng tatlong high-speed boats sa Philippine Coast Guard (PCG) sa Maynila.

Ang handover ceremony ay dinaluhan nina Japanese Ambassador Koji Haneda, Executive Secretary Salvador Medialdea, at PCG Commandant Elson Hermogino.

Labis naman ang pasasalamat ni Medialdea sa suporta ng Japan sa ating bansa.

Ang tulong ng mga Japanese ay bahagi pa rin ng grant aid ng nabanggit na bansa na nagkakahalaga ng 600 million yen o katumbas ng 270 million pesos.

—-