Nakatanggap ng farm equipment na nagkakahalaga ng 2-milyon mula sa Department of Agriculture (DA) 13 (Caraga Region) ang dalawang cassava farmers’ associations sa Agusan del Norte.
Ayon kay Regional Executive Director Abel James Monteagudo, layon nitong mapalaki ang produksiyon at kita ng mga magsasaka sa lalawigan.
Sinabi ni Monteagudo na kailangan ng tulong ng mga magsasaka sa probinsya bunsod ng nararanasang krisis sa gitna ng COVID-19 pandemic.
Niyanig ng magnitude 4.1 na lindol ang Eastern Samar.
Ayon sa Phivolcs, natunton ang sentro nito sa layong 17 kilometro sa timog kanluran ng bayan ng Maydolong.
Sinasabing ‘tectonic’ ang pinagmulan ng lindol na may lalim na 32 kilometro.
Wala namang iniulat na danyos at wala ring inaasahang aftershocks sa naturang pagyanig.
Pinasinayaan na ang molecular laboratory at coronavirus disease 2019 (COVID-19) facility sa Butuan Medical Center sa Butuan City.
Ang event ay pinangunahan ni City Mayor Ronnie Vicente Lagnada, kasama sina Department of Health (DOH) 13 (Caraga region) Director Jose Llacuna Jr. at Department of Science and Technology (DOST) 13 Director Dominga Mallonga.
Sinasabing naisakatuparan ang pagpapatayo ng laboratoryo sa pangunguna ng lokal na pamahlaaan at ilang partners nito.
Ayon kay Llacuna, inaasahang magsisimula na ang operasyon ng nabanggit na molecular laboratory sa susunod na buwan.
Nag-donate ang Bureau of Customs (BOC) ng mahigit 700 forfeited vehicles upang makatipid ang gobyerno sa pagbili ng mga bagong sasakyan.
Ayon kay Customs Assistant Deputy Commissioner Jet Maronilla, ang mga nabanggit na sasakyan ay nasabat mula sa Port of Aparri sa Cagayan noong 2013.
Matatandaang nagpalabas ng Executive Order 156 si dating Presidente Gloria Macapagal-Arroyo noong 2002 na nagbabawal sa pang-angkat o importasyon ng mga segunda-manong sasakyan.
Kabilang naman sa mga nakinabang sa donasyon ay ang Philippine National Police (PNP), Armed Forces of the Philippines (AFP), Presidential Security Group (PSG), at iba pang sangay ng gobyerno.
Pumalo na sa 9,192 ang bilang ng mga Pilipinong tinamaan ng coronavirus disease (Covid-19) sa labas ng bansa.
Ito’y makaraang makapagtala ang Department of Foreign Affairs (DFA) ng 27 bagong impeksiyon.
Nadagdagan naman ng siyam ang bilang ng mga gumaling dahilan upang umakyat na sa 5,378 ang total recoveries.
Nananatili naman sa 647 ang mga nasawi dahil walang naitalang bagong
fatalities o insidente ng pagkamatay sa hanay ng mga Pinoy abroad.
Patay ang 45 katao, kabilang ang ilang sibilyan at Taliban fighters, sa panibagong pambobomba sa Afghanistan.
Ayon kay Ali Ahmad Faqir Yar, gobernador ng Adraskan district sa probinsya ng Herat, kasama sa mga nasawi sa air strikes ng security forces ang walong residente.
Samantala, binigyang diin ng defense ministry na iniimbestigahan na nila ang alegasyon tungkol sa civilian casualties.
Ibinunyag ng aktres na si Liza Soberano na may mga nag-alok ng bayad mula sa mga unknown parties para makuha ang fan accounts nila ni Enrique Gil.
Sa kanyang post sa social media, sinabi ni Liza na proud siya sa may mga hawak ng LizQuen fan accounts dahil hindi nagpabayad ang mga ito.
Matatandaang bago ang revelations ni Liza, nabunyag din na may mga sumubok na bilhin ang fan pages nina Bea Alonzo at Angel Locsin.
Binigyang diin naman ni tech news editor Art Samaniego na ang mga ganitong istilo ay gawain ng mga trolls.
Sumalang na sa kauna-unahang pagkakataon sa panig ng Denver si rookie Bol Bol kung saan pinadapa nila ang Washington Wizards sa score na 89-82 sa Walt Disney World Complex sa Orlando, Florida.
Matatandaang nakuha ng Nuggets ang 20-anyos at 7-foot-2 na manlalaro sa second round ng Rookie Draft noong nakaraang taon pero hindi ito nakasabak sa regular season dahil sa foot injury.
Si Bol na anak ni NBA legend Manute Bol ay kumamada ng 16 points, 10 rebounds, at six blocks para sa Nuggets.
Sa unang practice game, wagi ang Los Angeles Clippers laban sa Orlando Magic sa score na 99-90 habang nasungkit naman ng New Orleans Pelicans ang 99-68 win laban sa Brooklyn Nets sa hiwalay na laro.
Naabot na ng Makati City ang 100 porsiyentong enrollment target para sa school year 2020-2021.
Ayon kay Mayor Abigail Binay, ito’y dahil nakapagtala na sila ng 77,339 students na mas mataas kumpara noong nakaraang taon na 76,599 enrollees.
Una nang inanunsiyo ni Binay na mamamahagi ito ng educational supplies sa tinatayang 85,000 public students at mga bagong laptops para sa 2,500 public school teachers sa kanilang lungsod.
Nakapag-enroll na ang tinatayang 91 porsiyento ng mga mag-aaral sa mga pampublikong paaralan sa buong bansa para sa nalalapit na school year na magsisimula sa ika-24 ng Agosto.
Ito’y batay sa datos ng Department of Education (DepEd) kung saan mahigit 20.5-milyong estudyante na ang nakapagpatala sa mga public schools habang mahigit 1.2-milyon naman sa mga pribadong paaralan.
Nanguna naman sa may pinakamaraming enrollees ang Calabarzon region na mayroong higit 2.9-milyon habang pinaka-kaunti sa Cordillera Administrative Region (CAR) na mayroong mahigit 333,000 enrollees.