Gilbert Perdez

Iminungkahi ng Land Transportation Franchising and Regulatory Board (LTFRB) sa Department of Transportation (DOTr) ang pag-waive ng ilang regulatory fees na ipinatutupad laban sa ilang public utility vehicle operators (PUVs).

Ayon kay LTFRB Chairman Martin Delgra III, ito ay maituturing na tugon sa panawagan ni Provincial Bus Operations Association of the Philippines Director Alex Yague.

Batay aniya sa Bayanihan 2, may nakalaan din namang pondo ang DOTr para sa mga apektadong industriya tulad ng transport sector.

Maliban dito, ayon kay Delgra, makatatanggap din ang mga PUV operators ng cash at fuel subsidies mula sa Bayanihan 2 allotment.

Magugunitang nagpalabas ng Memorandum Circular ang LTFRB kung saan pinapayagan na nito ang muling pagbiyahe ng 286 buses sa ilang ruta papasok at palabas ng Metro Manila at maging sa Region 3 at Region 4-A.

Inihirit ni Senate Minority Leader Franklin Drilon na taasan ang pondo ng Department of Health (DOH) at Department of Social Welfare and Development (DSWD) para sa 2021.

Ayon kay Drilon, ito’y upang mapaigting ang kapasidad ng dalawang ahensya na tumugon sa COVID-19 pandemic, gayundin sa pangangailangan ng mga mahihirap na Pilipino.

Mahalaga rin aniyang maisama pa rin ang special amelioration program (SAP) sa pambansang badyet para sa susunod na taon.

Binigyang diin pa ni Drilon na ang panukalang P4.5 trillion na national budget ay hindi makatutugon sa hinaharap na pandemya ng bansa

Tila inaalisan na ng sandata ang publiko laban sa mga tiwaling government officials.

Ito ang pahayag ni Presidential Anti-Corruption Commission (PACC) Chair Dante Jimenez matapos magpalabas ng memorandum circular si Ombudsman Samuel Martires na naglilimita sa public access ng Statements of Assets, Liabilities, and Net Worth (SALN) ng mga opisyal ng gobyerno.

Dahil dito, hinamon ni Jimenez si Ombudsman Martires na suriin muli ang ipinaglabas nitong memorandum upang hindi tuluyang masira ang reputasyon ng kanyang tanggapan.

Binatikos ni Vice President Leni Robredo ang Ombudsman bunsod ng paglilimita sa public access ng Statements of Assets, Liabilities and Net Worth (SALN) ng mga government officials.

Ginawa ni Robredo ang pahayag matapos magpalabas ng direktiba ang anti-graft office na nagsasaad na papayagan lamang nito ang paglalabas ng SALN kung ito’y para sa ginagawang imbestigasyon, kautusan mula sa korte, at awtoridad mula sa mismong opisyal na nagmamay-ari ng dokumento.

Giit ni Robredo, sa pamamagitan nito ay tila binibigyan lamang ng lisensya ng Ombudsman ang mga opisyal ng pamahalaan para maitago ang kanilang kayamanan.

Idinepensa ng Malacañang ang Office of the Ombudsman sa pasya nitong limitahan ang public access sa statements of assets, liabilities, and net worth (SALN) ng mga opisyal ng pamahalaan.

Ayon kay Chief Presidential Legal Counsel Secretary Salvador Panelo, may katwiran naman ang anti-graft office sa naging paghihigpit nito lalo pa’t posible itong gamitin ng mga kalaban o mapunta sa maling kamay at baka manganib ang buhay ng pamilya ng nagmamay-ari ng dokumento.

Una nang ipinag-utos ng Ombudsman na magre-release lamang ito ng SALN para sa mga opisyal na imbestigasyon, sa pamamagitan ng court order, o awtoridad mula mismo sa opisyal.

Nakaamba na namang tumaas muli ang presyo ng gasolina at kerosene sa susunod na Linggo.

Ayon sa source mula sa mga taga-industriya, posibleng pumalo mula P0.15 hanggang P0.25 kada litro ang magiging dagdag-presyo sa gasolina habang P0.40 hanggang P0.50 kada litro sa gas.

Wala namang inaasahang dagdag-presyo sa halaga ng diesel.

Ang oil price hike ay sinasabing dulot ng paggalaw ng presyo ng mga produktong petrolyo sa pandaigdigang pamilihan.