Gilbert Perdez

Maaari nang magpa-book ng online appointment para sa Step 2 registration ang mga Philippine Identification System (PhilSys) registrants.

Ito’y makaraang isiwalat ng Philippine Statistics Authority (PSA) na mula noong Mayo 24, 2021 ay activated na sa ilang lugar sa bansa ang ‘digital appointment para sa Step 2 ng pagpaparehistro o ang biometrics capture.

Ang mga nasabing lugar ay kinabibilangan ng mga sumusunod:

*Ilocos Sur – Candon City

*Ilocos Sur – Vigan City

*La Union – San Fernando City

*Pangasinan – Lingayen

*Isabela – Echague

*Nueva Ecija – Science City of Muñoz

*Camarines Sur – Naga City

*Masbate – Masbate City

*Antique – San Jose de Buenavista

*Capiz – Roxas City

*Bohol – Jagna

*Cebu – Bantayan

*Negros Oriental – Dumaguete City

*Leyte – Baybay City

Samantala, nananawagan din ang PSA sa mga nais magparehistro na mag- log in gamit ang email address o mobile number na ibinigay nila sa Step 1 registration o demographics.

Nabatid na magkakaroon din ng online appointment booking sa ilang lugar sa bansa sa mga susunod na araw.

Napanalunan ng nag-iisang mananaya na taga-Rizal province ang P10 milyong jackpot prize sa regular Lotto 6/42.

Ayon sa Philippine Charity Sweepstakes Office (PCSO), natumbok ng masuwerteng bettor ang winning combination na 21-05 -09-03-01-12 kung saan nabili nito ang ticket sa bayan ng San Mateo.

Makakatanggap naman ng tig-P24,000 ang 69 pang mananaya matapos mahulaan ang limang kumbinasyon.

Ang 6/42 lotto ay binobola tuwing Martes, Huwebes at Sabado.

Boluntaryong nagbalik-loob sa pamahalaan ang 61 miyembro ng Anakpawis makaraang kumalas sa Communist Party of the Philippines-New People’s Army-National Democratic Front (CPP-NPA-NDF).

Ayon sa Cagayan Provincial Police Office (PPO), ang hindi pinangalanang mga militante ay ni-recruit umano nina Randy Batara at Marilou Atendido sa ilalim ng liderato ng isang Isabelo Adviento.

Isiniwalat ng ilan sa mga miyembro ng Anakpawis na kasali sila sa mga rally sa iba’t ibang lugar sa Cagayan at maging sa tuwing ginugunita ang anibersaryo ng CPP-NPA.

Sumuko umano ang mga Anakpawis members bunsod ng mas pinaigting na community-related activities at kampanya laban sa insurgency ng Alcala Police Station.

Naniniwala naman si Cagayan Police Director Col. Ariel Quilang na malaking dagok sa CPP-NPA ang pagsuko ng mga nasabing militante.

Hindi magagamit ng mga pulitiko ang P19 bilyong pondo ng National Task Force to End Local Communist Armed Conflict (NTF-ELCAC).

Ito ang tiniyak ni Presidential Communications Operations Office Undersecretary Lorraine Marie Badoy matapos paratangan ni Bayan Muna Representative Carlos Zarate ang NTF-ELCAC na nawawaldas ang pondo nito sa paggawa ng mga tarpaulins at iba pang campaign propaganda ng mga pinapaborang kandidato ng task force.

Ayon kay Badoy, ginagamit ang pondo ng NTF-ELCAC sa pagpapaunlad ng mahigit walong daang barangay sa bansa upang makalaya o makaiwas sa impluwensiya ng New People’s Army.

Giit ni Badoy, hindi na siya nagulat sa naging pahayag ni Zarate dahil ito umano ang “mouthpiece” ni Communist Party of the Philippines o CPP-NPA founding chair Jose Maria “Joma” Sison.

Bumagsak sa kamay ng mga awtoridad ang tatlong drug suspects na tinaguriang high-value targets sa magkakahiwalay na buy-bust operations sa lungsod ng Quezon.

Unang natimbog ng QCPD Station 1 ang hindi pinangalanang top 10 drug personality sa Barangay San Isidro Labrador kung saan nasabat mula rito ang P13,600 halaga ng hinihinalang shabu.

Sa isa pang operasyon sa Barangay E. Rodriguez sa Cubao, nadakip ng QCPD Station 7 ang number 4 drug personality at narekober mula sa kanya ang P238,000 halaga ng umano’y shabu.

Sa Tandang Sora, nasakote naman ng QCPD Station 3 ang top 9 drug personality at kasama nitong babae kung saan nakuha mula sa kanila ang pinaniniwalaang bawal na droga na may street value na P68,000.

Kasong paglabag sa Comprehensive Dangerous Drugs Act ang isasampa laban sa mga suspek.

Bagama’t may mga natuwa ay marami ring negosyo na apektado ng mas mahigpit na restrictions sa Davao.

Ito’y kasunod ng pagpapatupad ng Modified Enhanced Community Quarantine o MECQ sa lungsod mula ika-5 hanggang ika-20 ng Hunyo bunsod ng pagtaas ng COVID-19 cases doon.

Samantala, pinaiiral din ang local lockdown sa iba pang bahagi ng mga rehiyon ng Visayas at Mindanao.