Halos 600,000 ang mga Filipino voters abroad na maaaring makaboto sa 2022 elections.
Ayon kay Atty. Philip Luis Marin ng Office for Overseas Voting (OFOV) ng COMELEC, tinatayang 1.6 milyon overseas voters ang inaasahan nilang magpaparehistro para sa susunod na halalan.
Samantala, umaasa rin ang poll body na makakaboto sa eleksiyon ang lahat ng mga bagong registrants.
Dapat itabi o ingatan ng mga ‘fully vaccinated individuals’ ang kanilang vaccination cards.
Ito’y dahil ayon kay Department of Trade and Industry (DTI) Secretary Ramon Lopez, naghahanda na ang gobyerno para sa ipatutupad na digital identification system na magbe-verify sa vaccination status ng isang indibidwal.
katunayan, sinabi ni Lopez na inaasahang mailulunsad na ngayong buwan ng Department of Information and Communications Technology ang digital vaccine ID.
Nadagdagan ng 3,190 ang bilang ng mga gumaling sa Coronavirus Disease 2019 (COVID-19) sa Pilipinas.
Dahil dito, ayon sa Department Of Health o DOH, sumampa na sa 1,216,497 ang total recoveries o katumbas ng 93.6 percent ng kabuuang bilang ng impeksiyon sa bansa.
Nabatid na bunga ng 6,686 na bagong kaso ay sumirit na sa 1,300,349 ang total infections mula nang manalasa ang pandemya noong nakaraang taon.
Sa nasabing bilang, ayon sa DOH, nasa 61,345 naman ang mga aktibong kaso.
Samantala, dahil naman sa pagpanaw ng halos dalawang daang pasyente (196) ay pumalo na sa 22,507 ang death toll sa buong kapuluan.
Umakyat na sa 132 ang bilang ng mga nasawi sa paglusob ng isang grupo ng mga armadong lalaki sa isang village sa Burkina Faso.
Ayon sa mga awtoridad, pinasok ng mga salarin ang Solhan Village sa Yagha province kung saan bukod sa pinagpapatay ang mga sibilyan ay sinunog din ng mga ito ang mga bahay at palengke sa lugar.
Sinasabing ito na ang pinamadugong pag-atake sa kasaysayan sa kanilang bansa.
Wala pang umaakong grupo sa pag-atake ngunit nagbanta ang pangulo ng Burkina Faso na Roch Marc Christian Kabore na tutugisin ng gobyerno at papanagutin ang mga salarin.
Nagdeklara na ng 72 oras na “national mourning” sa nasabing bansa.
Huwag magtapon ng basura sa maling lugar.
Ito ang panawagan sa publiko ni Metropolitan Manila Development Authority (MMDA) chairman Benhur Abalos matapos ideklara ng PAGASA ang pagsisimula ng panahon ng tag-ulan.
Ayon kay Abalos, dapat itapon nang maayos ang mga basura upang hindi ito magdulot ng pagbaha lalo na ngayong rainy season.
Sinabi ng opisyal na basura ang dahilan ng pagbabaha at pagbabara ng mga daluyan ng tubig sa iba’t ibang lugar sa Metro Manila.
Nabatid na gumagana pa rin ang 67 pumping stations ng MMDA.
Patay ang isang hinihinalang Abu Sayyaf bomb maker matapos makasagupa ng mga pulis sa Basilan.
Ayon kay Philippine National Police (PNP) Chief Gen. Guillermo Eleazar, ang suspek na si Aroy Ittot o mas kilala bilang “Oroy” ay sisilbihan sana ng warrant of arrest para sa kasong murder nang paputukan nito ang mga arresting officers gamit ang M16 rifle.
Dito na napilitang gumanti ang mga awtoridad na nagresulta sa kamatayan ni Oroy.
Isa umano si Oroy sa mga tauhan ng yumaong Abu Sayyaf Group sub-leader na si Furuji Indama at sinasabing sangkot sa pambobomba sa convoy ni Mayor Durie Kalahal ng Tuburan, Basilan noong 2018.
Narekober sa pinangyarihan ng insidente ang isang M16 rifle, isang M14 rifle, ilang piraso ng bala, at grenade rifles.
Nabuking ng mga awtoridad ang P4-milyong halaga ng sigarilyo na idineklara bilang “paper hand towel” sa Ninoy Aquino International Airport (NAIA) sa Pasay City.
Ayon sa Bureau of Customs (BOC), ipupuslit sana patungong Australia ng isang lokal na kompanyang nakabase sa Novaliches, Quezon City ang nasabing kargamento.
Ngunit nang suriin ng mga taga-customs ang shipment ay nadiskubreng hindi pala mga paper towel ang laman kundi nasa 2,520 reams ng sigarilyo.
Agad na nagpalabas ng warrant of seizure & detention laban sa mga nasabat na yosi bunsod ng misdeclaration habang posible ring sampahan ng kaukulang kaso ang mga nasa likod ng illegal exportation ng mga nasabing produkto.
Arestado ang pitong turista matapos mabuking ang paggamit ng umano’y mga pekeng RT-PCR test results sa Boracay Island.
Ayon sa Malay PNP, apat sa mga turista ay galing Cavite at tig-isa naman ang galing Quezon City, Maynila at Bulacan na kapwa pumnasok sa Boracay noong Biyernes.
Ngunit nang isalang sa verification ay natuklasang huwad ang ipinakitang swab test results ng mga ito.
Mahaharap ang mga suspek sa mga kasong falsification of documents at paglabag sa Mandatory Reporting of Notifiable Diseases & Health Events of Public Health Concern Act.
Mahigit P2 milyong halaga ng hinihinalang shabu ang nasabat ng mga awtoridad sa tatlong suspek sa anti-illegal drug operation sa bayan ng Kalilangan sa Bukidnon.
Kinilala ni PNP Chief Gen. Guillermo Eleazar ang mga suspek na sina Jabir Dacula Mandok, Jucair Mandok at Sittie Mandok na parehong kasama sa drugs watch-list ng pulisya.
Nasa 300 gramo ng hinihinalang shabu na may halagang P2.04 million ang nasabat mula sa mga suspek na ngayo’y nahaharap sa kasong paglabag sa Comprehensive Dangerous Drugs Act.
Pinuri ng Department of the Interior and Local Government (DILG) ang mga makabagong hakbang at istratehiya ng mga local government units (LGUs) sa pagbabakuna kontra COVID-19.
Ayon kay DILG Secretary Eduardo Año, nakakabilib ang ‘out of the box’ strategies ng ilang lokal na pamahalaan upang mapalakas ang kumpiyansa ng publiko sa bakuna.
Sa San Luis, Pampanga, inilatag ang “Baka Para sa Bakuna” project kung saan simula sa Hulyo ay magpapa-raffle ng baka ang LGU para sa lahat ng mga bakunadong indibidwal.
Tuloy naman ang lingguhang pa-raffle ng 25 kilograms ng bigas sa Sucat, Muntinlupa habang nagsasagawa ng Pagbangon Census 2021 sa Baliwag, Bulacan upang mabatid ang pulso ng mamamayan ukol sa bakuna.
Ayon kay Año, akma sa ‘new normal’ ang aniya’y ‘strategize efforts’ ng mga lokal na pamahalaan na mahalaga upang maabot ang target na ‘herd immunity’ ngayong taon.