Gilbert Perdez

Nasagip ng mga awtoridad ang limang tinedyer habang arestado naman ang dalawang indibidwal sa magkakahiwalay na operasyon laban sa online sexual exploitation sa Mandaluyong City at Taguig City.

Ayon sa Philippine National Police Women and Children Protection Center (WCPC), ang unang operasyon ay ikinasa matapos makatanggap ng impormasyon mula sa Anti-Trafficking in Person division kaya’t na-rescue ang mga menor de edad.

Sa tulong naman ng Australian Federal Police (AFP), United Kingdom National Crime Agency, International Justice Mission at Taguig City Police Station ay naisagawa ang isa pang entrapment operation sa Bonifacio Global City.

Ayon kay WCPC Chief Brig. Gen. Alessandro Abella, ginagamit umano ang mga tinedyer sa livestream o online sexual abuse at napapanood ng mga parukyano sa labas ng bansa.

Nagkaroon ng 203 na bagong kaso ng Coronavirus Disease 2019 (COVID-19) at isang insidente ng pagkamatay sa hanay ng Philippine National Police (PNP).

Ayon kay PNP Chief Gen. Guillermo Eleazar, ang pinakahuling nasawi ay 55 taong gulang na may ranggong Police Master Sgt. at nakatalaga sa Cagayan de Oro City.

Nabatid na nagkaroon ng ubo at lagnat ang nasabing pulis noong Mayo 24 ngunit pumanaw ito kinabukasan.

Sa kasalukuyan, mayroon nang 24,691 na total confirmed cases sa PNP kung saan nasa 1,733 ang active cases.

Dahil naman sa 104 na bagong recoveries, sumirit na sa 22,890 ang kabuuang bilang ng mga gumaling sa hanay ng Pambansang Pulisya.

Nakatanggap ng P20 milyong pondo ang bayan ng Rizal sa Kalinga Province bunsod ng anti-insurgency projects nito sa isang Barangay doon.

Kasabay nito, nagpasalamat naman ang Rizal LGU sa National Task Force to End Local Communist Armed Conflict (NTF- ELCAC) dahil sa inilatag nitong Barangay Development Program (BDP) na naging dahilan upang mapagkalooban ng pondo ang Brgy. Balabag East.

Dahil dito, sinasabing malaya na rin sa New People’s Army (NPA) ang nasabing barangay.

Nabatid na ang P15 milyong na bahagi ng pondo ay ilalaan para sa rehabilitasyon ng Barroga-Baggas farm-to-market road.

Idineklara na ng PAGASA ang pagsisimula ng rainy season o tag-ulan sa ating bansa.

Ayon sa PAGASA, pumasok na ang tag-ulan kasunod ng pagdaan ni Bagyong Dante.

Ibig sabihin, ayon sa PAGASA ay patuloy na mararanasan ang intermittent rains bunsod ng southwest monsoon sa metro manila at sa kanlurang bahagi ng bansa.

Bukod pa rito, mataas din ang tsansa na umiral ang above normal rainfall conditions hanggang sa buwan ng Hulyo.

Kasunod nito, siniguro nn PAGASA na patuloy nilang tututukan ang lagay ng panahon sa mga susunod na araw.

Nadagdagan ng higit 100 ang bilang mga Pilipinong tinamaan ng COVID-19 sa labas ng bansa.

Ayon sa Department of Foreign Affairs (DFA), nagkaroon ng 102 na bagong kaso kaya’t sumampa na sa 19,876 ang total confirmed cases doon.

Umakyat naman sa 12,053 ang bilang ng mga gumaling bunsod ng siyam na bagong recoveries.

Samantala, nananatili sa 1,194 ang death toll dahil walang nadagdag sa bilang ng mga nasawi sa hanay ng mga Pinoy sa ibayong dagat.

Sugatan ang walong indibidwal sa salpukan ng isang bus at ambulansya sa lungsod ng Mandaluyong kagabi.

Pahayag ni retired col. Bong Nebrija, hepe ng MMDA-EDSA special traffic & transport zone division, inaalam pa ang pagkakakilanlan ng mga nasaktang pasahero.

Sa paunang imbestigasyon, sumingit sa isang lane ang ambulansya sa EDSA-Shaw tunnel kaya’t bumangga ito sa bus sa kanyang pagsingit.

Nabatid na sa sobrang lakas ng impact ay tumama ang bus sa poste ng MRT sa center island ng tunnel na ikinasira nito.

Agad namang isinugod sa Mandaluyong Medical Center ang mga sugatang indibidwal habang patuloy ang imbestigasyon sa insidente.

Ibinabala ng isang grupo ng mga private schools na marami pang magsasarang eskwelahan.

Ito’y bunsod ng ipinalabas na bagong regulasyon ng Bureau of Internal Revenue o BIR na nagpapataw ng higit dobleng buwis sa mga ito.

Ayon kay Atty. Joseph Noel Estrada, managing director ng Coordinating Council of Private Educational Associations of the Philippines, dahil sa bagong Revenue Regulation ng BIR ay aakyat sa 10 hanggang 25 percent ang tax rate sa proprietary educational institutions.

Giit ni Estrada, kung itutuloy ito ng ahensya ay maraming maaapektuhang paaralan at mapipilitang magsara.

Lusot na sa ikatlo at huling pagbasa sa Kongreso ang panukalang One Town, One Product (OTOP) Philippines Program.

Sa ilalim ng House Bill 9350, isinusulong ang pagkakaloob ng assistance sa mga maliliit na negosto o Micro, Small and Medium Enterprises (MSMEs).

Sinasabing sa pamamagitan nito ay mas tatangkilikin ang kanilang mga produkto at mabilis na makakabangon ang lugmok na ekonomiya ng bansa.