Mas pinaigting pa ang contact tracing sa bayan ng Taytay sa pamamagitan ng kanilang Trail contact tracing app.
Na-integrate na rin ang nasabing app sa ValTrace, Antipolo Bantay Covid-19, MandaTrack, at PasigPass.
Batay sa nilagdaang network consortium agreement ng Taytay LGU, maaari na ring gamitin ang quick response o QR codes sa apat pang kalapit na lungsod.
Sa kasalukuyan, karamihan sa mga establisimyento sa bansa ay nagpapatupad ng “no QR code, no entry” policy.
Umakyat na sa mahigit siyam na milyon ang bilang ng mga na-administer na bakuna kontra COVID-19 sa buong bansa.
Ayon kay Secretary Carlito Galvez Jr., Chief Implementer ng National Task Force (NTF) Against COVID-19, nasa 9,281,235 na ang kabuuang bilang ng mga coronavirus jabs na naibigay sa mga prayoridad na sektor na kinabibilangan ng mga health care workers, matatanda, mga taong may comorbidities, economic front-liners, at indigent population sa mga piling lugar.
Ipinagmalaki ni Galvez na patunay ito na maganda ang tinatahak ng vaccination program ng pamahalaan.
Kasabay nito, inanunsiyo ng kalihim na limang libo pang vaccination sites ang target na mabuksan ng gobyerno habang nasa labing-isang milyong doses pa ng bakuna ang darating sa susunod na buwan.
Nakatabla ang Milwaukee Bucks sa kanilang Eastern Conference finals series laban sa Atlanta Hawks.
Ito’y makaraang magwagi ang Bucks sa score na 125-91 sa Game 2 ng kanilang serye laban sa Hawks.
Si Giannis Antetokounmpo ang nanguna sa Bucks sa pamamagitan ng kanyang 25 puntos at siyam na rebounds habang nagdagdag naman si Brook Lopez ng 16 na puntos.
Dapat payagan na sumalang sa home quarantine ang mga ‘fully vaccinated’ na returning residents at Overseas Filipino workers o OFWs sa kanilang pagdating sa bansa.
Ito ang panawagan ni Sen. Richard Gordon sa Inter-Agency Task Force for Emerging Infectious Diseases o IATF-EID.
Maliban dito, ayon kay Gordon, saka lamang aniya dapat isalang sa COVID-19 testing ang mga ito sa ika-lima o ika-pitong araw ng kanilang home quarantine.
Sa kanyang rekomendasyon kay IATF Chief Implementer Secretary Carlito Galvez Jr., binigyang diin ni Gordon na kung isasailalim pa sa 14-day quarantine period ang mga returning residents at OFWs ay mapapagastos lamang sila ng malaki at mababawasan ng oras na dapat ay inilaan na sana nila sa kanilang mga pamilya na ilang taon ding nawalay sa mga ito.
Malala na ang nararanasang kakulangan ng mga health workers, gamot, at equipment sa mga ospital sa Iloilo City.
Dahil dito, nagpasaklolo na ang lokal na pamahalaan sa Department of Health o DOH upang matugunan ito sa lalong madaling panahon.
Bagama’t sinasabing nagbigay na ng dagdag na mga health workers ang DOH at nag-hire na ang LGU ay hindi pa rin ito sapat para masolusyunan ito.
Maliban dito, problema rin ng pamahalaang lokal ng lungsod ng Iloilo ang hindi nababayarang utang ng Philippine Health Insurance Corporation o Philhealth sa mga pagamutan sa kanilang lugar.
Bawal munang lumipat sa ibang kompanya ang mga migrant workers sa Taiwan.
Ang kautusan ay ibinaba ng labor at health ministry bilang bahagi ng kampanya laban sa pagkalat ng COVID-19 sa kanilang bansa.
Tinatayang tatlong daang Pinoy ang nagpositibo sa coronavirus infection sa Miaoli county.
Ngunit inihayag naman ng Manila Economic and Cultural Office o MECO na nilinaw na rin ng Taiwan na pansamantala lamang ang nasabing polisiya.
Papayagan pa ring umuwi ng Pilipinas ang mga Pilipinong nasa India at sa anim pang bansa bilang bahagi ng repatriation programs ng pamahalaan.
Ito’y ayon kay Presidential spokesperson Harry Roque sa kabila ng travel ban na ipinatutupad laban sa mga panggagalingan nilang bansa.
Matatandaang pinalawig pa ng gobyerno hanggang Hunyo a-trenta ang travel restrictions laban sa India, Pakistan, Bangladesh, Sri Lanka, Nepal, United Arab Emirates, at Oman bilang bahagi ng pag-iingat laban sa Delta COVID-19 variant na unang nadiskubre sa India.
Gayunman, ayon kay Roque, isasalang pa rin sa quarantine at testing protocols ang mga uuwing Pinoy.
Nabigyan na ng first dose ng bakuna kontra COVID-19 ang pinakamatandang tao sa bayan ng Altavas sa Aklan.
Ayon sa local health office, ito ang ikalawang pandemya na nasaksihan ng 105 years old na si Brigida Panadero ng Barangay Poblacion.
Sinasabing musmos pa lamang si Panadero nang tumama naman ang Spanish flu sa buong mundo noong taong 1918 kung saan tinatayang 500 milyong tao ang dinapuan.
Hanggang nitong Hunyo 18,2021, nakapagtala naman ang bayan ng Altavas ng halos 100 kaso ng coronavirus infections.
Nakapagtala ang Eastern Visayas ng 712 na dagdag na COVID-19 cases.
Ito’y batay sa pinakabagong ulat ng OCTA Research Group kung saan nakitaan din ng pagsirit ng mga impeksiyon ang Valencia, Bukidnon; Cebu City; Davao City, at Polomolok, South Cotabato.
Nabatid naman na maliban sa Iloilo ay halos sagad na rin ang kapasidad ng mga ospital sa Koronadal, South Cotabato at Bacoor, Cavite habang malapit na ring mapuno ang mga ICU o intensive care units sa Davao City, Tuguegarao, at Cotabato City.
Mapupunta sa Visayas at Mindanao ang higit kalahati ng mga bagong dating na bakuna kontra COVID-19.
Ayon kay Department of Health o DOH Spokesperson Maria Rosario Vergeire, ito’y dahil sa nararanasang pagsipa ng mga kaso ng sakit sa mga nasabing lugar.
Gayunman, sinabi ni Vergeire na bagama’t mapupunta sa VisMin ang 55% ng mga bagong dating na bakuna ay mas pinaka-tinututukan pa rin ang National Capital Region o NCR Plus 8 na kinabibilangan ng Metro Manila, Metro Cebu, Metro Davao, Bulacan, Batangas, Cavite, Laguna, Pampanga, at Rizal.