May nakaamba na namang taas-presyo sa mga produktong petrolyo sa susunod na linggo.
Ayon sa mga sources sa industriya, nasa P1.05 hanggang P1.10 ang magiging dagdag sa presyo sa gasolina hanggang P0.60 hanggang P0.70 naman sa diesel at kerosene.
Ang isa sa mga itinuturong dahilan ng oil price hikes ay ang patuloy na paghina ng palitan ng piso kontra dolyar habang umaakyat ang demand o pangangailangan ng langis sa Europa, China, at Estados Unidos.
Nasa 23 Chinese nationals na lumabag sa travel protocols ang dinampot ng mga awtoridad sa lungsod ng Ilagan sa Isabela.
Bukod dito, ayon sa Ilagan LGU, natuklasan ding gumamit ng mga pekeng RT-PCR results ang mga dayuhan para makapunta sa lungsod.
Bagama’t nag-negatibo sa COVID-19, kakasuhan pa rin ang mga Tsino dahil sa paglabag sa health at travel protocols.
Kabilang sina dating Pangulong Fidel V. Ramos at Maj. Maximo Young sa halos dalawang daang beterano mula sa Philippine Expeditionary Force to Korea o PEFTOK na buhay pa hanggang sa kasalukuyan.
Sina Ramos at Young ay kasama rin sa mga nakatanggap ng prestihiyosong “Taegeuk Medal” o Medal of Valor na siyang pinakamataas na military award sa South Korea para sa mga magigiting na sundalong sumabak sa giyera.
Tinanggap ng mga beterano ang kanilang parangal noong Biyernes kasabay ng 71st anniversary ng Korean War kung saan sinalakay ng mga puwersa ng China at North Korean ang SoKor.
Muling nanawagan sa mga miyembro ng New People’s Army o NPA si Pangulong Rodrigo Duterte na magbaba ng armas at magbalik-loob sa pamahalaan.
Sa kanyang talumpati sa Camp Crame, Quezon City, tiniyak din ni Pangulong Duterte na bibigyan ng libreng pabahay ang mga susukong rebelde, bukod pa sa financial at food assistance.
Ayon sa Pangulo, ang mga rebeldeng magbabalik sa malayang lipunan ay isasalang din sa training sa Technical Education and Skills Development Authority o TESDA.
Patuloy na isusulong ng Department of Foreign Affairs (DFA) ang karapatan at kapakanan ng tinatayang 300,000 Filipino nationals sa maritime industry.
Ito ang inihayag ni DFA Secretary Teodoro Locsin, Jr. kasabay ng pagdiriwang ng International Seafarers Day sa buong mundo kung saan nangako rin itong aapurahin ang pagpapauwi sa mga stranded na seafarers sa ibayong dagat.
Giit ni Locsin, dahil sa pandemya ay maraming seafarers din ang nawalan ng trabaho at nagkaroon ng problema sa mental health.
Ibinunyag ni Pangulong Rodrigo Duterte na tinanggihan niya ang alok ng ilang pribadong kompanya para magsagawa ng malawakang land reclamation activities sa Manila Bay dahil sa umano’y corruption issues.
Sa kanyang talumpati sa Camp Crame sa Quezon City, binanggit ng Presidente na itinigil ang pagpoproseso ng libu-libong aplikasyon para sa proyekto sa lugar dulot ng sinasabing korapsiyon.
Bagama’t walang binanggit na mga kompanya, ipinahiwatig ng Pangulong Duterte na kumita ito ng limpak-limpak na salapi sa mga reclamation proposals.
Inihirit ng National Task Force to End Local Armed Conflict (NTF-ELCAC) sa Commission on Elections (Comelec) na kanselahin ang registration ng Kabataan Party-list dahil sa umano’y pagiging legal front-organization nito ng teroristang grupo.
Ayon kay Atty. Marlon Bosantog, NTF-ELCAC spokesperson for Legal Affairs and Indigenous Peoples Concerns, layon ng hakbang nila wakasan ang anila’y mapanlinlang na pangre-recruit ng Communist Party of the Philippines – New People’s Army – National Democratic Front (CPP-NPA-NDF) sa pamamagitan ng nasabing party-list.
Ang paghahain ng petisyon laban sa Kabataan ay natapat sa 32nd anniversary ng Rano Massacre sa Digos, Davao del Sur kung saan nasa 39 miyembro ng Bagobo-Tagabawa tribe ang nasawi.
Wala pang pahayag ang Kabataan Party-list ukol sa naturang alegasyon.
Umarangkada na ang institutional registration ng Philippine Identification System (PhilSys) para sa mga opisyal at empleyado ng Department of the Interior and Local Government (DILG) sa Quezon City.
Sa unang araw ng programa, halos isang daan ang mga nagparehistro, kasama ang kanilang mga pamilya, gayundin sina Secretary Eduardo Año at Undersecretaries Jonathan Malaya, Epimaco Densing III, Martin Diño, at Marjorie Jalosjos.
Ayon kay Año, hanggang Hulyo 5 ang nasabing pilot on-site registration sa kanilang departamento.
May sapat pang tubig ang Pantabangan Dam sa Nueva Ecija para sa irrigation at power requirements ng Central Luzon sa susunod na buwan.
Ito’y ayon sa Philippine Atmospheric, Geophysical and Astronomical Services Administration (PAGASA) sa kabila ng unti-unting pagbaba ng antas ng tubig sa nasabing dam.
Sinabi ni PAGASA hydrologist Edgar dela Cruz na ang water level sa Pantabangan Dam nitong Sabado ay nasa 187.71 meters o mas mababa kumpara sa normal-high water level na 216 meters.
Pumalo na sa 1,314,220 ang kabuuang bilang ng mga gumaling sa COVID-19 sa Pilipinas matapos maitala ang 8,720 na bagong recoveries.
Batay sa case bulletin, binanggit ng Department of Health (DOH) na sumirit na sa 1,391,911 ang total cases bunsod ng 6,871 na pinakahuling tinamaan ng impeksiyon.
Sa nasabing bilang, nasa 53,447 ang active cases.
Samantala, dahil naman sa pagpanaw ng 92 pang pasyente, sumampa na sa 24,244 ang death toll sa buong kapuluan.