Gilbert Perdez

Nagpuyos sa galit ang ilang Filipino migrant workers sa Taiwan bunsod ng umano’y mas mahigpit na implementasyon ng COVID-19 protocols doon.

Ayon sa isang Pinoy electronics factory worker, bukod sa maliit ang nalipatan niyang kuwarto ay siksikan pa na posible pang maging dahilan ng pagkalat ng COVID-19.

Nabatid sa Manila Economic and Cultural Office (MECO) sa Taipei na muli umanong isinalang sa swab testing ang lahat ng factory workers na naglipatan ng dormitoryo.

Kasabay nito, nakipagpulong na rin ang isang kinatawan ng Philippine Overseas Labor Office (POLO) sa Bureau of Labor ukol sa nasabing usapin.

Aarangkada na ngayong linggo ang 24-hour mega vaccination site sa Fort Bonifacio sa Taguig City.

Ayon sa Taguig LGU, sisimulan na ng Mega Vaccination Hub ang midnight operations nito para sa economic frontliners (A4 category).

 Para naman hindi masita ng mga awtoridad dahil sa curfew, pinayuhan ng pamahalaang lokal ang mga residente na ipakita lamang ang kanilang appointment slip.

 Ang katulad na night-time vaccinations ay ginagawa na rin sa Quezon City at Valenzuela City.

Sumampa na sa 1,321,050 ang kabuuang bilang ng mga gumaling sa COVID-19 sa Pilipinas.

Ito’y matapos makapagtala ang Department of Health (DOH) ng 6,912 na bagong recoveries.

Batay sa case bulletin ng DOH, nagkaroon naman ng 6,096 na bagong kaso dahilan upang sumirit sa 1,397,992 ang bilang ng mga tinamaan ng impeksiyon sa bansa.

Sa nasabing bilang, ayon sa DOH, nasa 52,570 ang active cases.

Samantala, nadagdagan naman ng 128 ang bilang ng mga nasawi kaya’t pumalo na sa 24,372 ang death toll sa buong kapuluan.