DWIZ 882

Nakasubsob sa isang sulok malapit sa creek ang isang lalaki matapos umanong makipagbarilan sa mga pulis.

Patay ang 21 taong gulang na si John Philip Rodriguez matapos paputukan ng mga rumerespondeng pulis sa isang iligal na tupadahan sa lugar.

Ayon kay Police Lt. Col. Roldante Sarmiento, hindi naman talaga si Rodriguez ang kanilang target.

Matapos masita ng mga operatiba ay bigla na lamang aniya itong tumalon sa kaniyang motorsiklo atsaka bumunot ng baril.

Giit pa ni Sarmiento, dinipensahan lamang ng mga pulis ang kanilang sarili.

Aminado naman ang mga kaanak ng nasawi na may 3 kaso na ito dahil sa pagkakasangkot sa pamamaril ngunit anila, pinalabas lamang na nanlaban ang kapatid nila.

Giit naman ng mga otoridad, normal na sa kanila ang alibi mula sa mga kaanak ng mga suspek.

Narekober naman ang kalibre .38 na baril na ginamit ni Sarmiento at ang sinakyan nitong motorsiklo. - sa panunulat ni Hannah Oledan 

Iimbestigahan ng Department of Health (DOH) ang dahilan ng diarrhea outbreak sa Quezon Province.

Ayon sa DOH, tinamaan ng diarrhea ng ilang miyembro ng indigenous dumagat tribes sa lalawigan kung saan 36 na ang naiulat na kaso kabilang ang 6 na nasawi dahil sa severe dehydration mula Setyembre 26 hanggang Oktubre.

Sinabi naman ni Ariel Valencia, Regional Director ng DOH CALABARZON na marami ang namamtay dahil hindi agarang nadadala ang mga pasyente sa mga primary health care facilty para ma-diagnose.

Samantala, nakikipag-ugnayan na ang ahensya sa Integrated Provincial Health Office upang magpaabot ng tulong.

- sa panunulat ni Hannah Oledan

Inihayag ng embahada ng Pilipinas sa Thailand na wala itong natanggap na ulat hinggil sa Pilipinong nasaktan sa mass shooting sa isang daycare center sa Thailand nitong Huwebes.

Ayon sa Embahada, nakikipag-ugnayan na ito sa mga otoridad ng Thailand upang suriin kung mayroong Pilipino sa 37 katao na namatay kabilang ang 24 na bata.

Sinabi rin ni Philippine Ambassador to Thailand millicent cruz-paredes na handa ang embahada na magbigay ng karampatang tulong sa sinumang pilipinong apektado.

Samantala, nagpahayag naman ng pakikiramay ang embahada sa mga indibidwal na nasawi.

Kinilala naman ni Police Colonel Jakkapat Vijitraithaya ang gunman na si Panya Khamrab na dating pulis.

Kalaunan, binaril ni Khamrab ang asawa’t anak sa kanilang tahanan at saka pinatay ang sarili. – Sa panunulat ni Hannah Oledan 

Iminungkahi ng miyembro ng Interim Bangsamoro Parliament na bumuo ng ahensya na tututok sa pagpapalago ng turismo sa Bangsamoro Autonomous Region in Muslim Mindanao (BARMM)

Ayon kay Amir Mawallil, napapanahon ang pagbuo ng isang ministry dahil sa mabilis na paglago ng tourism sector

Kaya naman isinusulong ni Mawallil ang BTA Proposed Bill no. 13 na bubuo ng ministry ng turismo.

Sa kasalukuyan ay sakop ng Ministry of Trade, Industry and Tourism (MTIT) ang turismo sa rehiyon.

Ayon kay Mawallil, ang Ministry of Tourism ang tututok sa pagpapaunlad at pagsulong ng turismo sa BARMM bilang isang major socio-economic activity na lilikha ng trabaho.

Tututukan din ng ministry of tourism ang pagpapakalat ng benepisyo ng turismo sa mas malawak na populasyon ng Bangsamoro. - sa panunulat ni Hannah Oledan 

Bugbog-sarado ang isang radio broadcaster at block-time host matapos pagtulungan ng 4 na lalaki sa Iloilo City kahapon.

Paalis na sana ng DYRI RMN Iloilo Station si Florencio “Flo” Hervias matapos mag-host ng sarili nitong programa nang mangyari ang insidente.

Agad naman itong nakatakbo sa opisina upang makahingi ng tulong at mabilis na rumesponde ang disaster risk reduction and management office ng Iloilo City upang gamutin ang biktima.

Kinondena naman ng National Union of Journalists of the Philippines – Iloilo ang pag-atake at sinabing mas naging talamak ang karahasan laban sa mga media workers sa bansa.

Mababatid na noong Lunes ay pumutok ang balita hinggil sa napaslang na broadcaster na si Percival “Percy Lapid” mabasa sa Las Piñas City.

Nanawagan naman ang NUJP at si Iloilo Mayor Jerry Trenas sa PNP upang tugunan ang insidente at hanapin ang mga salarin.

Samantala, patuloy pa rin ang imbestigasyon ng mga otoridad hinggil sa motibo ng pambubugbog sa blocktimer.

- sa panunulat ni Hannah Oledan